Mukhale Epottha ya Yehova
‘Mukhomaleke mwilipiheryeke . . . [Mukhale epottha ya Yehova]’.—AROM. 12:11.
MUNOONELA SAI?
Exeeni enihela muhina okhala epottha ntoko sihimmwale aya ni aRoma 12:11?
Ninrowa osyaka sai okhala epottha ya Satana ni olumwenku awe?
Mareeliho xeeni Yehova onaavaha awe ale anikhala ipottha sawe?
1. Onivirikana sai moonelo wa anamunceene voohimya sa opottha ni ele elempwale va aRoma 12:11?
MAKRISTAU aakhalana moonelo woovirikana ni anamunceene voohimya sa nuulumo noowi epottha. Mmuupuwelo wa anamunceene mutthu yoole oniireliwa epottha ti yoole ohinooneliwa vatthu, onihaaxiwaka, ni ohinithokoreriwa mwa xariya. Masi Nuulumo nowuupuxeriwa ni Muluku, ninnihimya sa opottha mutthu mwaneene onithanla awe onvarela muteko Pwiya oophenta. Tivonto, okathi murummwa Paulo aatumererya awe maKristau a eseekulu yoopacerya okhala ‘murumeyi [epottha ya Yehova]’, owo aatumererya onvarela muteko Muluku mwaha womphenta. (aRom. 12:11) Nto okhala epottha moota owo onihela muhina exeeni? Ninrowa osyaka sai okhala epottha ya Satana ni olumwenku awe? Ni yootthuvela xeeni enikhala mutthu orumeela moororomeleya ntoko epottha ya Yehova?
MIYO ONNIKISIVELA PWIYA AKA
2. (a) Exeeni yaarowa omwiiriha mwIsarayeli ophavela ovikaniha okhala epottha? (b) Waathoonyerya exeeni epottha ottemuliwa niyaru nawe?
2 Nlamulo na Muluku naavahiwe aIsarayeli, ninniixutta etthu voohimya sa enamuna ya opottha Yehova ennivekela awe. Wira epottha ya muHeeberi ekhale yootaphuwa yahaana ovara muteko iyaakha thanu na mosa. (Okhum. 21:2) Masi epottha ele yoona wira tthiri yaanisiveliwa ni pwiyawe ni enaphavela nlelo onvarela muteko, Yehova aaneemya. Mwaneene epottha ahaana waattamiherya epottha eyo vamukhora wala waattamela mukhora, wira attemule niyaru na epottha awe eyo orumeelaka etthu enittemula. (Okhum. 21:5, 6) Nto ti vookhalela wuupuwela wira niyaru ti naattemuliwa. Mwa elavulelo ya eHéberi, nuulumo noowi wiiwelela ninvarihana ni nuulumo noowi wiiwa wala owiriyana. Nto wira mutthu ovikanihe okhala epottha ohaana ovikaniha ororomeleya wa ole oninvarela awe muteko. Ela enninikhaliherya osuwela saana ele enitaphulela aya wiivahererya wahu wa Yehova, eyo piiyo, omwiiwelela woohikhanyereriwa mwaha wa omphenta Muluku.
3. Exeeni ekhanle mathipelo a wiivahererya wahu wa Muluku?
3 Okathi oniivahererya ahu wira nibatiziwe ntoko muKristau, hiyo nniira nithanlale ene khalai omurumeela Yehova, niire so, okhala epottha awe. Wiivahererya wahu onooniherya ophavela wahu omwiiwelela Yehova ni weettela otthuna wawe. Khuuvo onikhanyereriwa opaka eyo. Hata amiravo khanibatiziwa aphavelaka paahi waahakalaliha anamuyari aya, masi anipaka eyo mwaha wa wiivahererya waya wa Yehova. Omphenta Pwiyahu a wiirimu Yehova, tari mathipelo a wiivahererya wahu. Murummwa Yohani olempe so: ‘Nto eyo tenitaphulela omphenta Muluku, nnimphenta Muluku nettelaka soruma sawe’.—1 Yoh. 5:3.
NOOTAPHUWA, HATA NIRYE ENE IPOTTHA
4. Etthu xeeni enitthuneya wira nikhale ‘ipottha sa xariya’?
4 Tthiri ninnimuxukhuru Yehova mwaha wooneemya okhala ipottha sawe! Waamini wahu mukuttho wa Kristu onniniiriha oleveleliwa itampi sahu. Vanaamwi nryeene atthu oohimalela, nihaana wiiyevihaka ni okupaleela okhulupale orina awe Yehova ni Yesu. Mwa epaphelo awe yowuupuxeriwa Paulo aahiiwanyeiha saana mwaha ola oriki: ‘Mwisupuwele wira mw’àtthu [akhwiiye mwaha wa] etampi, nanso mukhaleke mwa Muluku mwatànaka ni Yesu Kristu’. Nuumala-vo owo aahilopola ariki: ‘Khamunsuwela wira, mwanvarelaka muteko mutthu ntoko ipottha, muhana omwìwelela, khukhala ipottha sawe? Siso mwarumelaka etampi, munophwanya okhwa, mwamwiwelelaka Muluku munophwanya exariya. Nto vano, nimutthapele Muluku okhala wira nyuwo, mwari ipottha s’etampi, vano muhìwelela ni murim’anyu wothene molumo yixuttihiwanyu. Nyuwo muhàkiheriwa etampi, khukhalihiwa arumeyi àxariya’. (aRom. 6:11, 16-18) Nto moone wira va, Paulo onilavula sa ‘murima wowiwelela’. Tthiri wiivahererya wahu wa Yehova oniiriheke okhala ‘ipottha sa xariya’.
5. Etthu xeeni eniwanana ahu ni nthowa na xeeni?
5 Masi, sinnikhala mixankiho sinitthuneya ovikana wira nikhaleke moovarihana ni wiivahererya wahu wa Yehova. Sihaavo itthu piili siniwanana ahu. Yoopacerya: etthu emosaru yaawanana awe Paulo. Owo aalempe so: ‘Mmurimani mwaka kinnisiveliwa n’ikano sa Muluku, nto kinnona mwerutthuni mwaka makhalelo makina anvirikanya simphavelaya murim’aka. Makhalelo awo annikikhaliha epottha ya ikano s’etampi, eri mwerutthuni mwaka’. (aRom. 7:22, 23) Ntoko Paulo, hiyo ninniwana ni ohimalela wahu. Tivonto nihaana ovikaniha okhoottela soophavela soohiloka sa erutthu ahu. Murummwa Pedru onnitumererya so: ‘Mwetteke ntoko atthu òtaphuwa, nto muhetteleké otaphuwa iwo wira mukhunele sotakhala. Mwetteke ntoko [ipottha sa] Muluku’.—1 Ped. 2:16.
6, 7. Satana oniwerya sai wiiriha olumwenku ola okhala wootepexa okuxa murima?
6 Etthu ya nenli eniwanana ahu, ti olumwenku oneettihiwa ni minepa sootakhala. Satana, yoowo onilamulela olumwenku, onniwana ni hiyo ophavelaka ohonona ororomeleya wahu wa Yehova ni Yesu. Owo onimananiha wira nikhale ipottha sawe, tivonto onnineehererya wira nitthareke soophavela sawe soohiloka. (Mmusome aÉfeso 6:11, 12.) Enamuna emosa Satana enirumeela awe, ori wiiriha itthu sa mulaponi okhala sookuxa murima, sihinikhootteya. Murummwa Yohani aahilopola ariki: ‘Mwaphentaka itthu sa vathi-va, khamunkhalana ophenta w’Atithi; vekekhai, itthu iye sothene sotakhala khasinkhuma w’Atithi; ntoko ophavela itthu sonanara , ophavela okhalana itthu sothene sinònahu, ororomela ni wisona mwaha wa mihakhu sirinahu. Sothene iya sinkhuma mwa makhalelo òtakhala’.—1 Yoh. 2:15, 16.
7 Ophavelexa wuncererya mihakhu, ti etthu enitepa wooneya mulaponi. Satana onniwiiriha atthu okupaliki wira musurukhu paahi tonikumiherya ohakalala. Tivonto sinnitepa waatta ilooxa suulupale. Mwa ntakiheryo, alipa-oomulaleya nakoso anittittimiherya okhalana itthu sinci ni opuha paahi. Atthu anilaleya ilapo soorowa weetta, annitumererya orowa opuro onihimmwa oreera, nto aryeene ni atthu oosuwela itthu sa mulaponi. Tthiri itthu sotheene sinrukurenrye, sinnitumererya opaka itthu sinihakalaliha erutthu ahu, masi mwa enamuna ya mulaponi.
8, 9. Yowoopiha xeeni ekhanle, nto mwaha wa xeeni?
8 Olavulaka sa maKristau a eseekulu yoopacerya yaale yaatthara moonelo wa elapo, Pedru aalempe so: ‘Awo annòna [okhala] oreriwa ophavela opuha wonanara ohinlekela. Awo atthu ònanara ni òwùliha muru, anìttottopa mwaha wa sowototha saya, okathi vanlyaya vamosá ni nyuwo. Maitho aya àsareya oraruwa, etampi khenaphwèla. Annototha mirima solosowa; mirima saya simphavela wakhela pahi. Awo anihimya wira t’òtaphuwa, [masi ti] ipottha sa itthu’ sinaasivela.—2 Ped. 2:13, 18, 19.
9 Ophavelexa itthu ‘sinònahu’ khonimwiiriha mutthu okhala ootaphuwa. Mutthu owo onnikhala epottha ya ole ohinooneya oneettiha elapo, Satana Diabo. (1 Yoh. 5:19) Tivonto varya aya etthu yowoopiha mutthu ophavelexa mihakhu, maana vannivila mutthu otaphuwa mwa opottha wa mihakhu.
MUTEKO ONIKUMIHERYA OHAKALALA
10, 11. Atthu xeeni olelo-va Satana onitepa awe waalupattha, ni moota xeeni akursu a mulaponi anikumiherya aya mixankiho?
10 Okhuma wEdeni, Satana olelo-va onnaawoka-tho atthu ahinrumeela saana miruku. Satana onnitepa waalupattha amiravo. Satana khivammusivela waaweha amiravo, niire so, khuta mutthu oniphavela omurumeela Yehova. Awanani a Muluku aniphavela omala-maliha ororomeleya wa atthu otheene yiivaherenrye wa Yehova.
11 Nkahaya nitthikele wuupuwelela ntakiheryo na epottha yeemerenrye ottemuliwa niyaru. Epottha eyo yaanisuwela wira mwa okathi vakhaani yaamoona owereya, masi moohipisa owereya wammala, nto ehaleke ethoonyeryo ehinimala ya Pwiyawe. Vamosaru, othanla mweettelo onivirikana ni ele enaasivela apatthani onnikumiherya mixankiho wala owereya wa amiravo. Satana onnivuwiha muupuwelo oowi miteko sa mulaponi ti simphwanyiha ohakalala, masi maKristau ahaana okupali wira miteko sa Muluku ti simphwanyiha ohakalala wekeekhai. Yesu aahilavula ariki: ‘Òreriwa t’ale ari amasikhini [omunepani]’. (Math. 5:3) MaKristau owiivahererya anipaka otthuna wa Muluku ohiya wa Satana. Nto etthu enaasivela ti ikano sa Yehova, ni annitthokelela othana ni ohiyu. (Musome Esalimo 1:1-3.) Masi, akursu anceene a mahiku ala, khanivaha okathi wira murumeyi a Yehova aweryeke otthokelela ikano ni ohakalaliha mukhalelo awe womunepani.
12. Yoothanla xeeni amiravo anceene anikumana aya olelo?
12 Atthu a mulaponi yaari axineene ipottha pooti wira yaanikumiherya oxanka wa maKristau yaari ipottha. Tivonto mwa epaphelo awe yoopacerya wa aKorinto, Paulo aakonhe so: ‘Mwìhaniwe muri epottha?’ Nto aahaaleela wira: ‘Muhithokorerye opottha owo. Mwaphwanya enamuna y’okhuma, fatari muttottele murerelo owo’. (1 aKor. 7:21) Tthiri ole aahaaxiwa mwaha wa opottha, ahaana ophavelaka otaphuwa. Olelo-va, ilapo sinceene, eguvernu tenihimya iklaase amiravo sikhanle aya oosoma voohihiyererya. Nuumala-vo ale anisoma annivahiwa eparakha yoothanla. Nto ovikaniha osoma mwaha woophavela muteko onaakheliwa musurukhu munceenexa,onoomwiiriha mutthu ohikhalana otaphuwa woovara muteko wa Muluku okathi wotheene.—Mmusome 1 aKorinto 7:23.
NIIREKE OSOMA WA VASULUXA, WALA WOOTEPEXA OREERA?
13. Mukhalelo xeeni wa osoma onrowa waakhaliherya vanci arumeyi Yehova?
13 Paulo aahaalopola maKristau a oKolosi ariki: ‘Mwipasopeke: muhimuhiyé mutthu òvarakani ni molumo òwòtotha ni miruku sihikhanle etthu. Atthu ntoko awo khanimwamini Kristu, masi antthara solimalela s’atthu n’ikuru s’olumwenku’. (aKol. 2:8) Mahiku ala, alipa-oosomiha anceene aniixuttiha moolumo owoototha wala filosofia, miruku sihikhanle etthu ni soolema sa olumwenku. Ixikola sa universidade, sinisomiha moota owo, khinnimwiixuttiha mutthu osuwela ovara muteko ene onisoma awe, nto nuumala ograduwariwa nlelo ohaana wiixutta moota woovara miteko sa khula nihiku. Masi, arumeyi a Yehova anithanla osoma onrowa waakhaliherya wiixutta muteko, wira aweryeke okhalana okumi woohiixaattiherya itthu ni omurumeela Yehova. Awo anniiwelela miruku Paulo anvanhe awe Timootheyo ariki: ‘Vekekhai, omuttittimiha Muluku onnimphwanyiha muhakhu mulupale, mutthu onsiveliwa n’itthu sirinawe; tivó, nakhalanaka yolya ni sowara, nihakalaleke ni seiyo’. (1 Tim. 6:6, 8) MaKristau khaniphavelexa ograduwariwa wa mulaponi wala epaphelo enooniherya okhulupale aya, masi animananiha wira olempwa waya okhaleke vamurimani, avaraka saana muteko woolaleerya moovarihana ni ele eniwerya aya.—Mmusome 2 aKorinto 3:1-3.
14. Moovarihana ni aFilipi 3:8, Paulo oonela sai eparakha yaarina awe ya okhala epottha ya Muluku ni Kristu?
14 Nkahaya muthokorerye yowiiraneya ya murummwa Paulo. Owo aaxuttihiwe va inawu sa Gamaliyeli, muYuda aaxuttiha Nlamulo. Osoma wawe Paulo olelo-va pooti olikanyihiwa ni osoma wa universidade. Masi Paulo oonela sai osoma wawe alikanyiha ni eparakha awe ya woopoliwa waakhuma wa Muluku ni Kristu? Owo aalempe so: ‘Sorera sothene sa vathí kinona wira sinokihonona; etthu enònaka yulupalexa t’omusuwela Yesu Kristu, Pwiy’aka’. Khuncererya ariki: ‘Mwaha wa yowo, itthu sothene korihela osalani, kònaka seiyo ntoko ikokhola, wira kimphwanye Kristu’. (aFil. 3:8) Muupuwelo ola wa Paulo, onnaakhaliherya amiravo maKristau ni anamuyari animoova Muluku, opaka soothanla sa miruku voohimya sa osoma waya. (moone ifootu).
OTTOTTELA MUREERELO OSOMA WOOTEPEXA OREERA
15, 16. Exikola xeeni enikumiheriwa ni mulokiheryo wa Yehova, nto etthu xeeni enittittimiheriwa?
15 Makhalelo xeeni anikhala mwa ixikola sinceene sa universidade? Mapuro awo ikwaha sinci atthu khanoova onvaanyiha ni omurukunuwela Guvernu wala amahoolela akina. (aÉf. 2:2) Moovirikana ni eyo, nikhuuru notthokiheya na Yehova, ninnikumiherya osoma wootepexa oreera, oniireya mapuro a murettele, eyo piiyo, mmuloko wa eKristau. Khuta mmosa a hiyo, onnikhalana eparakha ya ottottela mureerelo Exikola ya Orummwa wa Muluku. Yookhala-tho exikola ekina, anna oohithela anirumeela ntoko pioneero annimwiira kursu a (Exikola ya Biibiliya ya Anna Oohithela), nto wa anna oothelana ari mapioneero, annimwiira kursu a (Exikola ya Biibiliya ya MaKristau Oothelana). Ixikola iyo sa Muluku sinninikhaliherya omwiiwelela Yehova, ori Pwiyahu a wiirimu.
16 Ohiya-vo, hiyo nookhalana Índice das Publicações da Torre de Vigia, aahiiso CD-ROM a Watchtower Library, okhanle ahu oorumeela wira nitokose ikheekhai soomunepani. Omukokhorela Yehova teri etthu yuulupale enittittimiheriwa mwa ixikola iyo. Enniniixuttiha-tho osuwela moota wowaakhaliherya akina wataana ni Muluku. (2 aKor. 5:20) Nto atthu awo anniixuttihiwa moota wowaakhaliherya akina.—2 Tim. 2:2.
MAREELIHO ANIKHUMELA
17. Othanla osoma wootepexa oreera oniruuha mareeliho xeeni?
17 Mwa nlikanyiho na Yesu voohimya sa italento, arumeyi anli yaahittottopeliwa ni yaahihakalala ni Pwiya aya khuncereriwa muteko. (Mmusome Matheyo 25:21, 23.) Mahiku ala othanla osoma wootepexa oreera onnikumiherya ohakalala ni mareeliho. Muthokorerye ntakiheryo na Mikael. Mwaha wookhala naxikola ookhumela saana, maprusoore yaahithukumana ni yena wira amuhimeerye wira vanweryaneya owo orowa oniversidade. Ovirikanyaka ele yaalipelela aya, mwaha woophavela okhala pioneero, Mikael aathanlale omwiira kursu oniixuttiha muteko ohinivekela ovikaniha osoma iyaakha sinceene. Niireke vano onoona wira oopweteiwa etthu? Owo onihimya so: ‘Exikola ya Muluku esommye aka ntoko pioneero, ohiya vo, orumeela mmulokoni ntoko mutokweene, onnikumiherya mireerelo sinceene. Mareeliho ni iparakha siniphwanya aka sinnivikana musurukhu waarowa aka waakhela. Tthiri kinnihakalala mwaha woohirowa osoma universidade’.
18. Mureerelo xeeni onikumiheriwa ni osoma wootepexa oreera?
18 Exikola yootepexa oreera enniniixuttiha yootthuna ya Muluku ni onikhaliherya okhala ipottha sa Yehova. Ennikumiherya eparakha ya ‘wòpoliwa nakhalihiwahu ipottha; mwapwetexiwahu, wira nikaweliwe otaphuwa n’uvuwa w’àna a Muluku’. (aRom. 8:21) Etthu yootepexa otthuneya, ninniixutta moota wowooniherya saana wira ninnimphenta Pwiya ahu a wiirimu, Yehova.—Okh. 21:5.
[Elatarato epaaxina 12]
[Ilatarato siri ipaaxina 14, 15]
Ti pani onrowa anyu omurumeela ntoko pwiya anyu?