YOWIIRANEYA YA MOOKUMINI

Omuroromela Yehova Onniphwanyiha Mareeliho

Elavuliwe ni Malcolm Allen

Ikwaha sikina okumi onikhala wohisuwanyeya, wohiroromeleya ni wooxankiha. Masi Yehova onnaareeliha ale animuroromela, ahinroromela osuwela waya paahi. Nto ela ti etthu miyo ni amwaaraka eniiranenle mwa iyaakha sinci ni soohakalaliha. Masu anittharelana itthu vakhaani paahi mwa iye siniiranenle.

APAAPA ni amaama, yaasuwelanne mwaakha wa 1919 okongresuni a ilapo sotheene iiriwe ni Alipa-oomusoma Biibiliya wEstados Unidos wAmerika, oCedar Point Ohio. Muhoolo mwaya mwaakha yoole awo yaahithelana. Miyo kiyariwe 1922, nto muhima aka Paul, aayariwe nuuvira iyaakha piili. Amwaaraka ayariwe 1932. Apapaya aniihaniwa Roy nto amamaya ti Ruth Howell, yannuwale emusi ya alipa-oomusoma Biibiliya, nto taata ni piipi aya yaari atthu yaamusoma Biibiliya ni apatthani a munna Charles Taze Russell.

Mukhwaha woopacerya omoona Grace waari 1945, nto naathelanne 16 a Julyu 1949. Nihinatthi othelana, naahivaanela saana sa makhalelo ahu a muhoolo. Nto khuthanla onvarela muteko Muluku okathi wotheene, ni ohikhalana anamwane. Nihiku 1 na Outubro 1950, naahipacerya muteko wa opioneero. Nto, 1952 naahilattuliwa orumeela osirkwiitu.

MUTEKO WA OXEKURYA MILOKO NI OROWA EXIKOLA YA GILEADE

Otheene noona wira nahaana okhaliheriwa wira niwerye ovara saana muteko aavahiwe ahu. Okathi walakiheriwaka ni anna a miruku, kaahiveka-tho wira Grece okhaliheriwe. Nto kaahilavula ni Marvin Holien, mpatthani a khalai a emusi yoowo aatonko ovara muteko wa oxukurya miloko, khuhimya so: “Grace nlelo mmiravo khonsuwela itthu sinceene. Mookhala oomuthanla mutthu wira olaleeryeke hoothe ni Grece wira omukhaliherye?” Waakhula oomwi “Aayo. Edna Winke, owo pioneero okhuma khalai, onoowerya omukhaliherya”. Nuuvira okathi Gace aahilavula sa Edina ariki: “Owo aanikikhweiherya moota woolavula khula enupa, moota wowaakhula ale anivaanyiha, ni aahikiixuttiha onwiriyana mwaneene etthoko wira kisuweleke othanla etthu yowaakhula. Tthiri nlo naari nikhaliheryo nuulupale wa miyo”!

Grace ni miyo, noorumeela isirkwitu piili mittetthe sa Iowa, ohela muhina epantta ya Minnesota ni Suth Dakota. Muhoolo mwaya, naahithaamiheriwa oNova Iorque, Esirkwitu 1, yeeyo enihela muhina ipantta sa esidade ya Brooklyn ni Queens. Khaninrowa oliyala itthu sinceene soonale ahu siiraneyaka mmuteko ole. Esirkwitu eyo yaahela muhina Muloko wa Heights, yoowo onithukumana oSalau ya Omwene ya oBetheli, ni orina anna anceene oosuwela saana ari maBetelita. Nto, kaahilavula mwaha aka woopacerya wa muteko muloko yoole, nuumala mwaha, munna Nathan Knorr, aahirwa okilavuliha ni masu oophenta ariki “Malcolm, nyuwo moonivaha miruku sinitthuneya ahu weettela, nave ti sootthuneya. Muhiliyale, akhala wira nyuwo khamunnivaha miruku soophenta, khamunrowa okhalana efaita mmulokiheryo wa Yehova. Nvikaniheke ovara muteko wooloka”. Nuumala muthukumano, kahimuleela Grace. Nto, naahirowa okwarto waamanke ahu opredio ya oBetheli. Nuuphiwa okwarto, naahinla mwaha wookhulumuwa.

Nuumala myeeri vakhaani, naahaakhela epaphelo yaanilattula orowa Exikola ya Gileade eturma 24 yeeyo yaarowa omala mweeri wa Fevereiro 1955. Naahileeliwa wira orowa omwiira kursu owo, khonitaphulela wira ninrowa okhala mamisionaario. Masi kursu owo aarowa onikhaliherya ovara saana muteko wa oxekurya miloko. Orowa exikola ele, yaari etthu yootepa oreera, eniixuttinhe okhala oowiiyeviha.

Nuumala kurso, nathanleliwe ovara muteko wa edistritu. Mittetthe saaxukurya ahu saahela muhina Indiana, Michigan, ni Ohio. Nto, mootutuxeriwa nahaakhela epaphelo ya munna Knorr yaahimya so: “Muupuwele saana etthu enrowa anyu waakhula, nto vano mukileele ekeekhai. Munneemya orwa ovaraka muteko ni okhala oBetheli . . . wala kiireke muniphavela oroihiwa ilapo sikina nuumala okhala oBetheli vakhaani. Akhala wira muniphavela muteko wa edistritu wala esirkwitu vaamureera okileela”. Nto hiyo naakhunle wira vamunisivela ovara khula muteko aarowa ahu othanleliwa. Moohipisa naahitumereriwa ohimya eyo oBetheli!

IYAAKHA SOOHAKALALIHA OBETHELI

Iyaakha soohakalaliha oBetheli saahela muhina muteko wa olavula myaha ni wiixuttiha mittetthe sotheene sa Estados Unidos. Kihiirela mpantta owiixuttiha ni waakhaliherya amiravo anceene yaawo muhoolo mwaya yaakhenle miritti suulupale mmulokiheryoni mwa Yehova. Muhoolo mwaya, kaahirumeela ntoko sekretario a munna Knorr, eskritorio yaakhapelela muteko woolaleerya olumwenku wotheene.

Iyaakha khaavara aka muteko oDepartamento wa Muteko saari sootepexa oreera. Eyo yaahikiphwanyiha eparakha yoovara muteko ni T. J. (Bud) Sullivan. Mwa iyaakha sinceene aari muhooleli a eDepartamento eyo. Masi yaahikhala anna akina yaakiixuttinhe itthu sinci. Mmosa a yaawo aari Fred Rusk, aathanliwe okiixuttiha muteko. Kinnuupuwela nihiku nimosa kaamukonhe aka so: “Munna Fred, xeeni omakelaka olokiherya ipaphelo sinlepa aka?” Owo aahitheya, nto khuhimya miruku iya sooreera: “Munna Malcolm, okathi onilavula anyu ni eyano paahi, atthu akina pooti otaphulela masu anyu ni moolumo makina, masi akhala wira munilepa epaphelo, vancenexa yeele enikhuma opuro ola, epaphelo eyo ehaana okhala yooreerela ni yookhalela mwa inamuna sotheene”. Nuumala-vo mooreera murima aahimmye so: “Muhoove, nyu munnivara saana muteko, muhoolo munokhumela saana”.

Iyaakha sinceene sa oBetheli, Grace aahivara miteko soovirikana, ohela muhina orattela iskritoorio ni ikwaartu sa oBetheli. Miteko iyo saanimusivela vanci. Mpakha olelo-va, vaavo vanikumaana ahu anna yaale yaari asya oBetheli okathi yoole, awo annilavula moohakalala ariki: “Tthiri nyuwo ti mukiixuttihale moota woolokiherya ekhaama nuumala orupa, nto muteko ovanre anyu ohaasivela amaama”. Grace vaahimusivela-tho ovara muteko oDepartamento ya irevista, eDepartamento enaakhelela ipaphelo, ni eDepartamento ya oGravari ikaseti. Ovara miteko iya soovirikana, waahimukhaliherya Grace woona wira wa khula etthu enivara ahu, wala khula opuro onimurumeela ahu Yehova eri eparakha ni mareeliho a Yehova. Mpakha olelo-va, Grece onoonela siiso.

MIRUKUNUXO SAAPANKE AHU

Eriyari ya iyaakha 1970, naahipacerya woona wira anamuyari ahu oowuuluvala khiyaawerya wiikhapelela ekhaya. Tivonto naahaana opaka yoothanla yoovila. Ekeekhai wira khinaaphavela okhuma oBetheli, ni waahiya anna yaaphenta ahu ni yaamurumeelana ahu Yehova. Okathi omosaru naanisuwela wira waari muritti ahu waakhapelela anamuyari ahu. Ti maana aya, naahikhuma oBetheli nnaamwi nlelo naarina nlipelelo nootthikela orumeela akhala wira makhalelo ahu yaamuneemererya muhoolo mwaya.

Kaahipacerya waatumiha aseguru wira kiphwanye yoowiikhuriha. Okathi wootheene kaanuupuwela ele yaakilenle awe mulipa aakiixunttinhe muteko ole wira: “muteko ola onivekela olavulanaka atthu emakaaripi mmurumeelaka telefoni. Eyo tekhanle enamuna emosa paahi ya waaphwanya atthu. Khiivo-tho etthu ekina yootthuneya ohiya olavulana atthu khula emakaaripi mutelefonini”. Miyo kaamwaakhunle so “koosuwela wira nyuwo munihimya etthu enisuwelexaanyu, nto miyo nkinvaanyiha. Masi miyo kookhalana miritti sikina somunepani kihitonkwa aka woolowela, nave nkimphavela opacerya woolowela vano. Kinootelefonariki, masi emakaaripi ya Namanli ni Namaxexe, kihaana orowa muthukumano wootepa otthuneya”. Yehova aahikireeliha vanceene mwaha woohicompela mithukumano.

Eyaakha ya 1987, nihiku amaama akhwiiye aya, hiyo naari vaavo opuro waakhapeleliwa atthu oowuuluvala. Muhooleli a nipuro nle, aahimuhimeerya Grace wira: “Muhaana orowa owaani, mwaphumurye. Atthu otheene aasuwela wira nyuwo muhaakhapelela apwiyamwaana anyu mpakha okhwa waya. Mwaphumurye ni wiikhapelela”.

Mweeri wa Dezembro 1987, naahitthikela-tho opriyenxeri ipaphelo sa orumeela oBetheli nipuro nenle noonisivela. Masi nuuvira mahiku vakhaani, Grace aahiphwanyaniwa oretta wa cancer a mmurimani. Nuumala wooperariwa aahipenuwa khuleeliwa wira khaarina-tho cancer. Okathi mmosaru, naahaakhela epaphelo yaakhuma oBetheli yaanitumererya wira nivikaniheke orumeela muloko waarya ahu. Hiyo naahilakela ovikaniha ovara miteko sa Omwene.

Nuuvira okathi kaahiphwanya muteko oTexas. Naahoona wira mikhalelo sa weiwo saari sooloka, nto mpakha olelo-va sininsivela. Ninkhala oTexas nno mwa iyaakha 25, nirukureriweene ni anna ni arokora oophenta ni oowiiraana.

ITTHU NIIXUNTTE AHU

Grace aahiwereiwa cancer mmurimani, tiróide naanano-va oniphwanyaneya awereiwaka cancer a vanipeleni. Masi owo khoninlaseya mwaha wa mixankiho iyo, wala ovaanyiwa malakiheryo moohimya sa muru wa etthoko, owo towiiwananeya. Ikwaha sinci onikohiwa so: “Esiiri xeeni erina anyu enookhaliheryani okhala owiiwanana ni okhalana ekumi ya vatthokoni yoohakalala”. Owo onnihimya mathowa maxexe oriki: “Hiyo ninkhala ntoko apatthani aalupale. Ninnithokiheryana saana itthu khuta nihiku. Hiyo onisivela ovaanela ekhihu. Nave hiyo khinnirowa orupa nximwelanne ene”. Ekeekhai wira ikwaha sikina ninnitthekhelana, masi ninnilevelelana ni oliyala, nto yeeyo tennikhaliherya vanceene.

Muhina mwa mixankiho iyo sotheene siniphwanye sihaavo ithu sinci siixuttale ahu:

(1) Okhathi wotheene mmuroromeleke Yehova ni mweemye ele enihiya awe yiiraneyaka. Muhiroromeleke osuwela wanyu.​—Mir. 3:5, 6; Yer. 17:7.

(2) Mulipaneke Nuulumo na Yehova okhala wira nlo nookhalana malakiheryo anivareleya muteko khuta okathi. Omwiiwelela Yehova ni malamulo awe etthu yootthuneya. Mutthu khoniweryaneya okawanyeya kiyakhala owiiwanananeya okathi omosaru oohiwananeya.​—aRom. 6:16; aHéb. 4:12.

(3) Okhalana nsina nooloka vamaithoni va Yehova ti etthu yootepexa otthuneya mweekumini ya mutthu. Muhele yoophavela ya Yehova mpantta woopacerya mweekumini mwanyu ohiya ophavela mihakhu.​—Mir. 28:20; Mus. 7:1; Math. 6:33, 34.

(4) Munvekele Yehova wira wookhaliheryeni onvarela muteko wooloka vaniweryaanyu. Mukhalele nthitti ele eniwerya anyu ohiya wunnlela ele ehiniweya anyu.​—Math. 22:37; 2 Tim. 4:2.

(5) Musuwelexe wira khuuvo-tho mulokiheryo mukina orina nikhaliheryo ni mareeliho a Yehova ovikana yoola.​—Yoh. 6:68.

Grace ni miyo khula mmosa oomurumeela Yehova iyaakha sinivikana 75, mwa seiyo iyaakha 65 ntoko anamathelana. Tthiri nooviriha iyaakha soohakalaliha nimurumeelaka Yehova hoothe. Hiyo ninnaamini ni ninnivekela wira anna ni arokora akina, aphwanye mareeliho aphwannye ahu mwaha woomuroromela Yehova.

[Elatarato epaaxina 17]

[Elatarato epaaxina 18]

Okhuma moono woothiyana: Nathan Knorr, Malcolm Allen, Fred Rusk, Lyle Reusch, Andrew Wagner

[Eponto yuulupale ya epaaxina 18]

“Akhala wira khamunnivaha miruku soophenta, khamunrowa okhalana efaita mmulokiheryoni mwa Yehova. Nvikanihe ovara muteko wooreera”

[Elatarato epaaxina 19]

Vasulu: Fern ni George Couch vamosa ni Grace ni miyo oGileade, 1954

[Elatarato epaaxina 19]

Vathi: Kivaraka eDepartamento ya Muteko 1956

[Eponto yuulupale ya epaaxina 20]

“Khuta okathi mmuroromeleke Yehova ni mweemye ele enihiya awe yiiraneyaka”

[Elatarato epaaxina 20]