“Muthokoreryeke Itthu sa Wirimu”

“Muthokoreryeke itthu sa wirimu, khahiyó itthu sa vathí”.​—AKOL. 3:2.

MWAAROWA WAAKHULA SAI?

Moota xeeni Abrahamu ni Sara yoonihenrye aya omuroromela Yehova?

Ninsuwela sai wira Moise aanikhalela nthiti ovara miteko sa Muluku?

Mwa inamuna xeeni hiyo nikhanle ahu owuupuwelela saana itthu sa wiirimu?

1, 2. (a) Exeeni enooniherya wira muloko wa oKolosi wa eseekulu yoopacerya waahikhalana muxankiho? (b) Miruku xeeni saakumiheriwe wira akhaliheriwe anna ale a oKolosi okhala oolipa?

MULOKO wa eKristau wa eseekulu yoopacerya wa muttetthe wa oKolosi waahikhalana muxankiho! Atthu akina a mmulokoni yaanikumiherya ohiiwanana okhala wira yaanaatumererya atthu wira atthariheleke Nlamulo na Moise. Atthu akina yaanimulaleya filosofia oniireliwa ascentismo, eyo piiyo, mutthu ohikhalana etthu enayeva. Wira owaakiherye anna mwaha wa itthu iye soohiloka saaxuttihiwa aya, murummwa Paulo aahaalepela epaphelo wira aalopole anna a oKolosi oriki: “Mwipasopeke, muhimuhiyé mutthu òvarakani ni molumo òwòtotha ni miruku sihikhanle etthu. Atthu ntoko s’awo khanimwamini Kristu, masi antthara solimalela s’atthu n’ikuru s’olumwenku”.​—aKol. 2:8.

² Vaakhanle wira maKristau ale oowoottihiwa yaarowa wuupuwelaka “solimalela s’atthu n’ikuru s’olumwenku” awo tthiri yaammuhiya Yehova ni yaamuyeleela woopowa. (aKol. 2:20-23) Nto ophavelaka waakiherya wataana waya ni Muluku, Paulo aaloponle so: “Muthokoreryeke itthu sa wirimu, khahiyó itthu sa vathí”. (aKol. 3:2) Tthiri anna awe Kristu ale yaahaana othokorerya nlipelelo naya na waakhela ekumi ehinikhwiwa ‘yasukeriwe aya wirimu’.—aKol. 1:4, 5.

3. (a) Nlipelelo xeeni ahiniliyala aya maKristau oowoottihiwa? (b) Makoho xeeni anirowa ahu othokorerya muru ola?

³ Olelo-va maKristau oowoottihiwa anuupuwelela Omwene wa Muluku wa wiirimu ni yoolipelela aya ya “orowa olamulela ni Yesu”. (aRom. 8:14-17) Masi ankhi ale arina nlipelelo na okhala valaponi vaava? Moota xeeni masu a Paulo anivareleya aya muteko wa anna awo? Mwa inamuna xeeni “ipwittipwitthi sikina” sinithokorerya aya “itthu sa wirimu”? (Yoh. 10:16) Nto otheene ahu ninrowa ottottela sai mureerelo othokorerya matakiheryo a atthu oororomeleya a khalai ntoko Abrahamu ni Moise, yaawo nnaamwi saaphwanya mixankiho yaathokorerya itthu sa wiirimu?

ONITAPHULELA EXEENI WUUPUWELELA ITTHU SA WIIRIMU?

4. Moota xeeni ipwittipwitthi sikina sikhanle aya oothokorerya itthu sa wiirimu?

⁴ Vanaamwi ipwittipwitthi sikina sihirina nlipelelo na orowa wiirimu, iyo sinoowerya othokorerya itthu sa wiirimu. Moota xeeni? Yakhala wira anompweha Yehova Muluku ni Omwene awe nipuro noopacerya mweekumini mwaya. (Luka 10:25-27) Wira niwerye eyo, nihaana ottharihela ntakiheryo na Yesu. (1 Ped. 2:21) Voolikana ni annihu ale a eseekulu yoopacerya, hiyo nave ninnaaphwanya atthu arina miyuupuwelelo soohiloka, afilosofia a mulaponi, ni arina mukhalelo wa osiveliwa muhakhu yoowo wuulaanale elapo ela ya Satana. (Mmusome 2 aKorinto 10:5.) Okhala wira hiyo nimmutakiha Yesu, nto nintthuneya wiipasoopa ni osyaka khula etthu ekhanle oohonona makhalelo ahu ooloka a omunepani.

5. Ninrowa owerya sai ovarerya muupuwelo ahu voohimya sa osiveliwa mihakhu?

⁵ Niireke makhalelo a mulaponi a osiveliwa muhakhu aapacerya okhuma mitathaari mweekumini mwahu? Itthu sinnisivela sinooneya orweela mwa ele enuupuwela ahu ni enipaka ahu. Yesu aalavunle so: “Tthiri, vavo vari muhakhu anyu, vavo-tho t’uri murim’anyu”. (Math. 6:21) Wira nisuwelexe nipuro murima ahu onniroiha awe, ti vooloka wiitokosa mmansihu khula okathi. Mwiikoheke so: ‘Kiniviriha iwoora kavi kuupuwelaka musurukhu? Kiireke myaha voohimya sa nakoso wala ophwanya musurukhu munceene yoowo onrowa okiiriha okhalana ekumi yoopuha tosarenye mmuruni mwaka? Wala kiireke kookhalana niitho nooluluwanya nniwehexexa itthu somunepani’? (Math. 6:22) Yesu aahittittimiherya wira atthu aniphavelasa ‘othukumanya mihakhu vathi-va’ anniiroiha mmaxakhani maalupale a omunepani.​—Math. 6:19, 20, 24.

6. Ninrowa owerya sai oxintta ekhotto eniwanana ahu erutthu ahu?

⁶ Erutthu ahu yoohimalela enninitumererya ophavela itthu sinihakalaliha. (Mmusome aRoma 7:21-25.) Naahikhaliheriweru ni Muluku, ekumi ahu enoohapuxiwa wira ‘nivareke itthu sa wepiphini’. Eyo enihela muhina itthu ntoko “wipeliwa n’uhapaliwa, . . . onamuttompe ni oraruwa”. (aRom. 13:12, 13) Wira nixintte ekhotto ya okhootta “itthu sa vathi-va”, eyo piiyo, itthu sinihakalaliha erutthu, nihaana othokorerya itthu sa wiirimu. Opaka eyo onitthuneya wiimananiha vanceene. Eyo ti yaamwiirinhe murummwa Paulo ohimya so: “Vano kinnihaxa erutthu aka, kinnikhaliha epotth’aka”. (1 aKor. 9:27) Moohaaniherya eyo ennintumererya hiyo wiimananiha wira nivikanihe otthimaka wira naakhele ekumi ehinimala! Vano nrowe nithokorerye matakiheryo a alopwana anli oororomeleya yaawo khalai yaimananinhe “omusiveliha Muluku”.​—aHé. 11:6.

ABRAHAMU ‘AHIMWAMINI YEHOVA’

7, 8. (a) Muxankiho xeeni yaarina aya Abrahamu ni Sara? (b) Etthu xeeni Abrahamu aaroromela awe?

⁷ Okathi yoole Yehova aamulakihenrye awe Abrahamu othaama vatthokoni vawe orowaka elapo ya oKanani, owo aheemya. Mwaha wa wiiwelela wa Abrahamu, Yehova aahipaka nivarihano ni yena, khwiira: “Miyo kinimokhalihani nloko nulupale, kinimorerihani”. (Maph. 12:2) Hata vaari siiso saahivira iyaakha sinceene Abrahamu ni Sara ahirina anamwane. Niireke Yehova aarooliyala nivarihano aapanke awe ni Abrahamu? Ohiya-vo, okhala elapo ya oKanani yaari etthu yoovila. Abrahamu ni etthoko awe yaahikhuma vatthokoni vaya ni yaahaahiya amusi aya muttetthe wa Uri, yoowo waari woothaaciri wa oMesopotamia. Awo yaheetta mukwaha ikiloomu soowiiraka 1.600, wira aphiye oKanani, weiwo waarowa aya okhalaka muheemani, ovoliwa etala ni otupheliwa ni anawiiye. (Maph. 12:5, 10; 13:18; 14:10-16) Hata vaari siiso, awo khiyaaphavela otthikela elapo aya ya Uri!​—Mmusome aHéberi 11:8-12, 15.

⁸ Ohiya owehexexa itthu sa “vathi-va”, Abrahamu ‘ahimwamini Yehova’. (Maph. 15:6) Tthiri aanithokorerya itthu sa wiirimu okhala wira aaniroromela sooleiherya sa Yehova. Nto ororomeleya wa Abrahamu waahitthuveliwa vaavo Muluku Muulupalexa aakhumelenle awe ohoolo wa Abrahamu khumuhimeerya so: “Nwehé osulú, mwalikele itheneri, mwaweryaka walikela. Nuumala vo aahimuhimeerya-tho so: ‘Siso sattalyaya itheneri, osùlu anyu onrowa watta siso’”. (Maph. 15:5) Tthiri ele yaahimuhakalaliha Abrahamu! Khula okathi Abrahamu aaweha awe itheneeri wiirimu, eyo yaarowa omuupuxeryaka wira Yehova oomuleiherya wira osuulu awe onrowa okhala siisaale. Nto nuumala ophiya okathi Muluku aathanlale awe, Abrahamu aahimuyara mwaana, ntoko saaleiheriwe awe.​—Maph. 21:1, 2.

9. Moota xeeni ottharihela ntakiheryo na Abrahamu onrowa aya onikhaliherya okhalela nthiti miteko sa Muluku?

⁹ Moolikana ni Abrahamu, hiyo nave ninniwehererya waakhwanela wa anatiri a Muluku. (2 Ped. 3:13) Vakhala wira hiyo khannithokorerya itthu sa wiirimu, ninrowa opaceryaka woona wira waakhwanela wa anatiri awo onnipisa ophiya, ni ninrowa opacerya woolowela miteko sa Muluku. Mwa ntakiheryo, niireke nyuwo mootoko oleva etthu wira mukhalele nthiti muteko wa opioneero wala enamuna ekina ya omurumeela Yehova? Vakhala wira ti siiso munnireerela ottottopeliwa. Ankhi mahiku ala munoonela sai? Muupuweleke wira Abrahamu “aniwehererya muttetthe otekiwe mmathipeloni”. (aHé. 11:10) Owo ‘ahimwamini Yehova, tivo Muluku omukhaliha naxariya’.​—aRom. 4:3.

MOISE AANIMOONA “MULUKU OHINÒNEYA”

10. Enamuna xeeni ya ekumi yaarina awe Moise okathi aari awe mmiravo?

¹⁰ Mulopwana mukina yoowo aathokorenrye itthu sa wiirimu ti Moise. Okathi waaryaawe mmiravo, Moise “ahixuttihiwa osuwela wothene w’atthu a wEjitu”. Tthiri aahiixuttihiwa itthu suulupale. Ohiya paahi elapo ya wEjiitu okhala ti yaalamulela olumwenku wotheene okathi ole, nave Moise aakhala vatthokoni va mwene Farawo. Tivonto vahinintikiniha aya wiiwa masu oowi Moise aari “mulopwana òwerya ni molumo ni miteko sawe” okhala wira aahiixuttihiwa itthu suulupale. (Mit. 7:22) Nto nkahaya muupuwelele itthu owo saarina awe ni ele yaarowa awe okhalana! Hata vari siiso, Moise aahithanla itthu sootepexa okhalana efaita, eyo piiyo, ovara miteko sa Muluku.

11, 12. Osoma xeeni Moise waavanhe awe efaita yuulupale, nto hiyo ninsuwela sai eyo?

¹¹ Nlelo oryeene mwanamwane, maamawe Moise, Yokebedi, aahimwiixuttiha etthu voohimya sa Muluku aHeeberi. Nave Moise aahivaha efaita yuulupale itthu saasuwela awe voohimya sa Yehova ni aanoona okhala suulupale ovikana khula muhakhu aarowa awe okhalana. Tivonto veemerenrye awe oyeleela iparakha ni mihakhu saarowa awe ophwanya mwaha wa okhala vatthokoni va Farawo. (Mmusome aHéberi 11:24-27.) Tthiri itthu sa Muluku saaxuttihiwe awe ni omuroromela wawe Yehova saahimukhaliherya Moise othokorerya itthu sa wiirimu.

¹² Moise aahiroihiwa exikola yuulupale yaakhanle mahiku ale, nto niireke aahirumeela osuwela wawe wira okhale oovuwa wala othukumanya mihakhu wEjiitu? Nnaari. Vaakhanle wira aahipaka eyo, khaarowa okhootta ‘wireliwa mwana a mwana muthiyana a mwene a wEjitu. Owo ahithanla ohaxiwa vamosa n’atthu a Muluku, khukhotta opuha okathi vakhani n’itthu sotakhala’. Nto vannooneya oratteene wira Moise aahirumeela itthu sa Muluku saasuwela awe wira oroihele ohoolo miteko sa Yehova.

13, 14. (a) Exeeni yaamukhalihenrye Moise ophwanelela muteko aarowa awe ovahiwa ni Yehova? (b) Exeeni enitthuneya ahu opaka nimutakihaka Moise?

¹³ Moise aanitokosa mwa nthiti itthu voohimya sa Yehova ni atthu Awe. Okathi waarina awe iyaakha 40, Moise aahipacerya wuupuwela wira waahiphiya okathi wa owoopola atthu a Muluku weepotthani waari aya wEjitu. (Mit 7:23-25) Masi, Yehova ohinatthi onvaha muteko ole, sookhala itthu Moise saatthuneya awe wiixutta toko. Owo ahaana wiixuttha mikhalelo ntoko wiiyeviha, opixa murima, oreera murima, wiihiiha. (Mir. 15:33) Moise ahaana wiixutta itthu saarowa omukhaliherya ovilela soweeha ni mixankiho saarowa omukhumelela muhoolo. Iyaakha miloko vakhaani ovaraka miteko sa omakampusi waarowa omukhaliherya okhalana makhalelo ooloka yaakhuma wa Muluku.

¹⁴ Niireke tthiri Moise aahiixutta etthu okathi aryaawe makampusi? Aayo aahiixutta tthiri! Nuulumo na Muluku, nilavulaka voohimya sa Moise ninhimya so: “Moise ari mutthu omàla vanjene, ovikana atthu othene a mulaponi-mu”. (Moth. 12:3) Owo ahiixutta okhala oowiiyeviha, nto eyo yaahimukhaliherya owerya waakhapelela atthu ale yaari oovirikana ni mixankiho saya soovila ophuka. (Okhum. 18:26) Hiyo nave nintthuneya okhalana makhalelo ooloka oomunepani yaawo anrowa onikhaliherya ovikana “maxakha malupale” nirowaka elapo esya ya Muluku. (Wis. 7:14) Niireke hiyo ninniwerya waathokorerya mookhalela atthu otheene, waahela muhina ale aniwoona ahu okhala oovila waahakalaliha wala oowaakuva otthekeleya? Hiyo ninnitthuneya wiiwelela miruku saavahiwe ni murummwa Pedru yoowo aatumerenrye annawe wira: “Mwattittimiheke atthu othene, mwaphenteke axinn’inyu òwamini”.​—1 Ped. 2:17.

NVIKANIHEKE OTHOKORERYA ITTHU SA WIIRIMU

15, 16. (a) Xeeni varyaaya vootthuneya muupuwelelo ahu othokoreryaka itthu sooloka khuta okathi? (b) Xeeni varyaaya vootthuneya maKristau okhalana mweettelo wooloka?

¹⁵ Hiyo ninkhala ‘okathi wokiserya mahiku òxanka’. (2 Tim. 3:1) Nto wira nivikanihe okhala oolipa omunepani nihaana ovahaka efaita itthu sooloka. (1 aTes. 5:6-9) Muthokorerye inamuna tthaaru sa moota ninrowa ahu opaka eyo mweekumini mwahu.

¹⁶ Mweettelo ahu: Pedru aahooniherya otthuneya waya okhalana mweettelo wooloka. Owo aahimmye so: “Mwettelo anyu okhale worera eriyari y’atthu ahikhanle aKristu, wira. . . emwaleliwe ni miteko sanyu sorera, envuwihe Muluku”. (1 Ped. 2:12) Khula nipuro niryaahu vatthokoni, omutekoni, oxikola, nitthekulaka, wala nilaleeryaka, nihaana wiimananiha wira nivuwihe nsina na Yehova mwaha wa mweettelo ahu wooreera. Ekeekhai wira hiyo naatthu oohimalela ni wira okathi mukina ninnivonya. (aRom. 3:23) Masi orweela wa wiimananiha wahu ‘owanela wamini ekhotto yorera’, hiyo nnoowerya okhumela saana okathi vaniwanana ahu makhalelo ahu oohiloka a erutthu ahu yoottheka.​—1 Tim. 6:12.

17. Ninrowa otakiha sai enamuna ya wuupuwela yaarina awe Kristu? (Nwehe elatarato yoopacerya.)

¹⁷ Muupuwelo ahu: Wookhala ovarihana wuulupale eriyari ya okhalana mweettelo wooloka, ni okhalana muupuwelelo wooloka. Murummwa Paulo aahimmye so: “Mukhalaneke mupuwelo mmosaru, yowo orinawe Yesu Kristu”. (aFil. 2:5) Nto enamuna xeeni ya muupuwelelo aarina awe Yesu? Owo aari oowiiyeviha. Wiiyeviha waahimwiiriha wiivahererya ovara muteko woolaleerya. Waalaleerya atthu akina ihapari isya sa Omwene wa Muluku, tiyaari etthu yuulupalexa yuupuwelela awe. (Mar. 1:38; 13:10) Yesu aanoona wira Nuulumo na Muluku nookhalana owerya wuulupale. (Yoh. 7:16; 8:28) Owo anikhalela nthiti osoma Nuulumo na Muluku wira oweryeke oromola okathi waixuttiha awe, waakiherya ni otthokiherya saana. Nakhala oowiiyeviha ni okhalela nthiti muteko woolaleerya ni omusoma Biibiliya khula nihiku, nto muupuwelo ahu onrowa olikanaka nuule wa Kristu.

18. Mwa inamuna xeeni nikhanle ahu ookhaliherya muteko wa Yehova?

¹⁸ Okhaliherya wahu: Yehova oniphavela wira soopattuxiwa ‘sothene sittittimiheke nsina na Yesu, iye siri wirimu n’iye siri mulaponi’. (aFil. 2:9-11) Nnaamwi Yesu oryeene oovuwihiwa vanceene, mowiiyeviha onrowa wiiwelelaka yootthuna ya Tiithi awe, nto hiyo nave, nihaana wiira siiso. (1 aKor. 15:28) Moota xeeni? Orweela wa okhaliherya wahu ni murima wotheene muteko orummwale ahu ovara, eyo piiyo, orowa ‘owixuttiha atthu a maloko othene’. (Math. 28:19) Ohiya-vo, hiyo ninnitthuneya-tho ‘owirela sorera atthu othene’, eyo piiyo, owiirela sooreera anamwaattamanani ahu ni annihu.​—aGal. 6:10.

19. Etthu xeeni ekhanle ahu oolipiherya opaka?

¹⁹ Tthiri hiyo nootteeliwa murima okhala wira Yehova onninuupuxerya wira nithokoreryeke itthu sa wiirimu! Wira niwerye opaka eyo, hiyo nihaana ‘olipiherya otthimaka ephiro yorika yihaneliwahu’. (aHé. 12:1) Tthiri nihaana onvarela muteko Yehova ni murima ahu wotheene, nto Tiithi ahu a wiirimu onrowa onitthuvela mwaha wa wiimananiha wahu.​—aKol. 3:23, 24.