MIRUKU SA KHALAI SEIYO SINIVARELEYA MUTEKO OLELO-VA

Mulevelelaneke ni Murima Wotheene

MALAKIHERYO A BIIBILIYA: “Mulevelelaneke imara sothene muntthekelananyu. Ntoko Muluku òlevelenlyaweni nyuwo, siso-tho nyuwo mwaleveleke akhw’inyu”.​—aKolosi 3:13.

Ele enitaphulela aya: MBiibiliyani, ottheka onlikana ni okopha etthu, nto oleveleliwa yoottheka eyo, onlikana ni oleveleliwa ele ekomphe awe. (Luka 11:4) Eliivuru emosa enihimya wira mBiibiliyani, nuulumo na eGriki noowi “olevelela”, nintaphulela “olevela moomalela ni ohivekela oliviwa-tho”. Tthiri, okathi nimmulevelela ahu mutthu onitthekenle ninnimulevelela moomalela. Masi okhala oolevelela khontaphulela weemererya soottheka sa atthu akina wala oyeveiha mixankiho annikumiherya aya. Masi, ninnihiya oviruwa, nnaamwi noonaka wira ‘notthekeliwa’.

Niireke miruku iya sinnivareleya muteko olelo? Mwaha wa ohimalela wahu, otheene ahu ninnittheka. (aRoma 3:23) Tivonto nintthuneya ahu waalevelela akina, okhala wira meelo ti hiyo ninrowa waatthekela. Ohiya-vo waalevelela akina onniniphwanyiha mureerelo. Moota xeeni?

Okathi ninnanariwa ahu ni okhootta omulevelela mukhwiihu, ninniikumiherya mixankiho. Nto eyo pooti oniiriha ohihakalala, ohonona okumi ahu, wiixoona ohikhala efaita ni onikumiherya maxakha mookumini mwahu. Erelatoorio emosa yaakumiheriwe ni Dr. Yoichi Chida ni Andrew Steptoe, ni prusoore a psicologia Journal of the American College of Cardiology, yaahimya so: “Sootokosa sipakiwe niinano sinooniherya wira wookhala ovarihana eriyari ya onanariwa ni otakhala, vamosa ni DAC [iretta sa murima]”.

Tthiri olevelelana onnikumiherya mireerelo sinceene. Okathi onaalevelela ahu akina, ninnikhapelela murettele, wiiraana ni okhalana opatthani wooloka. Nave-tho, ninnooniherya wira nimmutakiha Muluku, yoowo onaalevelela ni murima wotheene ale anittharuwa itampi saya veekeekhai. Nto owo oniphavela wira hiyo-tho nipakeke etthu emosaru.​—Marku 11:25; aÉfeso 4:32; 5:1.