Awo “Yahona” Itthu Yaaleiheriwe Aya

Awo ‘khaphwanyale itthu Muluku sàhimenryawe, masi yahona itthu seiyo sinari ottaiwene’.​—AHÉB. 11:13.

MUNOOWERYA OTTHOKIHERYA?

Owerya wahu woona itthu siri muhoolo ovahiwe ahu ni Muluku onlipiha sai waamini wahu?

Ninsuwela sai wira alopwana ni athiyana aniromoliwa mBiibiliyani yaaniwerya woona etthuvo aya?

Moota xeeni olavula voohimya sa nlipelelo nahu onniphwanyiha aya mureerelo?

1. Mureerelo xeeni oniphwanya ahu mwaha wa owerya wahu woona itthu sihinooneya? (Nwehe elatarato yoopacerya.)

OWERYA wahu woona itthu sihinooneya nivahiwe ni Muluku. Eyo enninikhaliherya waapaka apalano ooloka ni owehererya itthu sooloka siri muhoolo. Yehova onniwerya woona itthu sinrowa wiiraneya muhoolo, ni omurumeelaka Biibiliya owo onninihimeerya itthu sinrowa wiiraneya muhoolo. Nto eyo enninikhaliherya woona itthu hata sihinatthi okhumelela. Tthiri owerya wahu woona itthu sihinooneya onninikhaliherya okhala oowaamini.​—2 aKor. 4:18.

2, 3. (a) Moota xeeni nipuro nnikhuma aya ele enihela ahu mmuupuweleloni niryaaya nootthuneya? (b) Makoho xeeni anrowa waakhuliwa ni yoosoma ela?

² Owerya wahu woona itthu sihinawehe ahu khula okathi khahiyo wekeekhai. Mwa ntakiheryo, vakhala wira mwaarusi mmosa oniloha owenle ene nikuruthu ninvava, eyo yooloha ya ethiru. Masi okathi yoole Hanna aaviriha awe wuupuwelelaka moota saarowa aya okhala okumi wa Samuweli okathi waamuroihale awe wira arumeeleke otabernaakulu, owo anoona etthu yookhalela mmuupuweleloni mwawe. Ele yaari etthu yaalakenle awe opaka, nto eyo yaahimukhaliherya owehexexa etthu yaaphavela awe. (1 Sam. 1:22) Vakhala wira hiyo ninnimananiha wuupuwelela ele Muluku eleihenrya awe opaka, nto hiyo nnuupuwelela etthu enrowa wiraneya tthiri.​—2 Ped. 1:19-21.

³ Moohaaniherya, atthu oowaamini aniromoliwa mBiibiliyani yaaniwerya woona itthu saaleiheriwe aya ni Muluku. Mureerelo xeeni atthu awo yaaphwannye aya mwaha wa owerya waya woona mareeliho awo? Ankhi hiyo, mureerelo xeeni oniphwanya ahu, vaavo vanuupuwelela ahu itthu sooloka Muluku sihimmye awe wira onimwaavaha apinaatamu oowaamini?

YAAHILIPIHIWA MWAHA WA “WONA” ELE YAALIPELELA AYA

4. Mathipelo xeeni yaarina awe Abeli wira oweryeke woona itthu saarowa okhumelela muhoolo?

⁴ Niireke Abeli, mulopwana oowaamini oopacerya aahiwerya “wona” ele yaaleiheriwe ni Yehova? Khanikhanle oohimya wira Abeli aahivahiwa osuwela itthu iye vahinatthi, hata moota saarowa aya wiiraneya itthu saaleiheriwe siniphwanyaneya mmasu Muluku aalavunle awe ohimyaka enowa wira: “Miyo kinowìnaniha weyo ni muthiyana, kinimwìnaniha nloko nawo ni nloko na muthiyana; osùlu awe onimonyakela muru, weyo ophavelaka omuluma nnawu”. (Maph. 3:14, 15) Woonasa wene, Abeli aahuupuwelela oratteene yoolaiherya ele nto khoonaka wira ookhala aarowa ‘olummwa nnawu’ wira apinaatamu attikiheriwe okhala oomalela, ekumi yeeyo Adamu ni Eva yaarina aya ahinatthi otheka. Wa khula etthu Abeli yaawerya awe woona yaarowa wiraneya muhoolo, yaalipa ni waamini wawe yooleiherya ya Muluku, ti maana aya Yehova eemererye awe mukuttho wa Abeli.​—Musome Maphattuwelo 4:3-5; aHéberi 11:4.

5. Moota xeeni owerya woona itthu saarowa okhumelela muhoolo waamulipinhe aya Henokhi?

⁵ Henokhi aahivikaniha okhala oowaamini, nnaamwi aakhala ni atthu ootakhala yaalavula itthu saamuruwana Muluku. Henokhi aahirummwa ni Muluku wira olaleye wira Yehova aamoorwa ni malaikha awe ahinalikeleya; wira aaphukele “atthu othene ni walamula atthu othene òtakhala murima, mwaha wa sotakhala saya sothene, seiyo sìralyaya emukhottaka Muluku, ni mwaha wa molumo othene òruwana, yamutthekelannyaya Muluku, envehaka yowo”. (Yuda 14, 15) Okhala wira owo aari mutthu owaamini woonasa wene aaniwerya woona olumwenku ahikhanle atthu anipaka itthu sootakhala.​—Mmusome aHéberi 11:5, 6.

6. Etthu xeeni Nowe yaavikaninhe awe wuupuwelela nuuvira Epula ya Mutaaseke?

⁶ Nowe aahoopoliwa okathi wa Mutaaseke mwaha wa waamini wawe. (aHéb. 11:7) Nuumala epula ya Mutaaseke, mwaha wa waamini aahivaha mukuttho wa inama. (Maph. 8:20) Moolikana ni Abeli, moohaaniherya owo anaamini wira wamphiya okathi apinaatamu yaarowa aya woopoliwa etampi ni okhwa. Nuuvira Mutaaseke, okathi yoole Nemurodi aapacenrye awe onvirikanya Yehova, Nowe aahivikaniha okhala oowaamini ni aahikhalana nlipelelo. (Maph. 10:8-12) Vamosaru, owo aanuupuwelela okathi apinaatamu yaarowa aya otaphuliwa etampi ni okhwa oravihiwe aya. Hiyo nave nnoowerya “wona” okathi owo woohakalaliha, yoowo tthiri ori vakhiviru!​—aRom. 6:23.

“YAHONA” WAAKHWANELA WA ITTHU SAALEIHERIWE AYA

7. Itthu xeeni saarowa okhumelela muhoolo saawenrye aya “wona” Abrahamu, Isakhi ni Yakobe?

⁷ Abrahamu, Isakhi, ni Yakobe yaahiwerya woona yooleiherya yuulupale ya mareeliho yaapakiwe ni Muluku wira mwaha wa osuulu aya, maloko otheene a valaponi yaarowa oreelihiwa. (Maph. 22:18; 26:4; 28:14) Osuulu aya amuhavinre ale waarowa okhala atthu oowaatta ni yaarowa okhalaka Elapo Yaaleiheriwe aya ovahiwa ni Muluku. (Maph. 15:5-7) Mwaha wa waamini, atthu ale oomoova Muluku yaaniwerya “wona” osuulu aya okhalaka elapo ele yaaleiheriwe aya. Nnaamwi apinaatamu yaayeleelale oomalela waya, Yehova aahaaroromeliha arumeyi awe wira mareeliho yaale yaarowa aya waakhela Adamu khamalamanle.

8. Exeeni yaamukhalihenrye Abrahamu okhalana waamini woolipa?

⁸ Vamosaru, mwaha wa Abrahamu owerya wawe woona itthu aaleiheriwe awe ni Muluku waahimukhaliherya opaka itthu sinceene saatthuneya waamini woolipa. Biibiliya onnooniherya wira nnaamwi Abrahamu ni arumeyi akina oororomeleya a Muluku yahaakhenle “itthu Muluku sàhimenryawe, masi yahona itthu seiyo sinari ottaiwene, khutteliwa murima”. (Mmusome aHéberi 11:8-13.) Abrahamu aahikhalana itthu sinceene saamoniherya wira itthu saaleiheriwe awe saari sa ekeekhai vanakhala ntoko aarimoona itthu iye sahaatonko awe woona!

9. Moota xeeni waamini sooleiherya sa Muluku wamphwanyinhe aya mureerelo Abrahamu?

⁹ Waamini Abrahamu waarina awe wa Muluku ni itthu saaleihenrye awe waahimukhaliherya omwiiwelela. Opakaka itthu moowaamini, owo aahithaama muttetthe wa Uri ni kheemerenrye okhala muttetthe mukina wa oKanani. Mittetthe iyo moolikana ni Uri saari soohilipa mwaha wa itthu soohiloka saapakiwa ni ale yaalamulela. (Yox. 24:2) Iyaakha sotheene saakhanle awe Abrahamu “aniwehererya muttetthe otekiwe mmathipeloni, wupuweliwe ni otekiwe ni Muluku”. (aHéb. 11:10) Abrahamu aaniwerya “wona” okhalaka muttetthe woolipa waalamuleliwa ni Yehova. Abeli, Henokhi, Nowe, Abrahamu ni akina yaanaamini wira atthu ookhwa yaamuhihimuxiwa ni yaaniwehererya okhala valaponi elamuleliwaka ni Muluku, eyo piiyo, “muttetthe otekiwe mmathipeloni” oolipa. Wuupuwelela mareeliho awo waahilipiha omwaamini waya Yehova.​—Mmusome aHéberi 11:15, 16.

10. Moota xeeni moonelo wooloka wa itthu sa muhoolo waamukhalihenrye aya Sara?

¹⁰ Nkahaya mmuupuwele mwaara a Abrahamu, Sara. Okathi waarina awe iyaakha 90 ni ohirina mwaana, okhalana moonelo wooloka voohimya sa itthu sa muhoolo waahimwiiriha opaka itthu mowaamini. Tthiri owo aaniwerya woona osuulu awe ophwanyaka mareeliho yaaleiheriwe ni Yehova. (aHéb. 11:11, 12) Exeeni yaamwiiriha owo okhalana waamini siisa? Okhala wira Yehova aahimuhimeerya iyawe wira: “Miyo kinomureriha; kinimovahani mwana mwamulopwana onrowanyu oyareliwa n’uwo. Kinomujaliha mwar’iny’uwo, onrowa okhala mai a maloko; vano mwa yowo anokhumelela mamwene”. (Maph. 17:16) Nuumala Sara omuyara Isakhi, owo aahikhalana mathowa manceene a woona wira itthu sotheene Muluku aamuleihenrye awe Abrahamu saamwiiraneya. Tthiri nookhalana eparakha yuulupale mwaha wa oweryaka woona itthu sileiheriwe ahu ni Muluku ni okupali wira sinimwiiraneya!

NWEHEXEXEKE ETTHUVO

11, 12. Moota xeeni Moise ainuuhenrye awe omphenta awe Yehova?

¹¹ Mutthu mukina aamwaamini ni omphenta vanceene Yehova, ti Moise. Okathi Moise aaryaawe mmiravo, okhalaka vatthokoni va mwene a wEjiitu, vaari vookhweya owo opacerya ophenta okhulupale ni mihakhu. Woonasa wene anamuyari awe, yaahimwiixuttiha Moise voohimya sa Yehova ni yoolakela awe yoowi aarowa owoopola aHeeberi weepotthani ni aarowa waavaha Elapo Aaleihenrye awe. (Maph. 13:14, 15; Okhum. 2:5-10) Vakhala wira Moise aanuupuwelela mareeliho Yehova aaleihenrye awe atthu awe, nto munoona wira vamurimani vawe naarowa okhala niphento na okhulupale wala omphenta Yehova?

¹² Biibiliya onnihimeerya so: “Mwaha wo wamini, Moise vannuwalyawe, khatthunne wireliwaka mwana a mwana muthiyana a mwene a wEjitu. Owo ahithanla ohaxiwa vamosa n’atthu a Muluku, khukhotta opuha okathi vakhani n’itthu sotakhala. Owo ahòna wira othanyiwa ntoko sarowawe othanyiwa Mopoli, yari etthu yotepexa orera ovikana muhakhu wothene wa wEjitu. Vekekhai, owo ahiwehexexa otthuveliwa w’oholo”.​—aHéb. 11:24-26.

13. Mureerelo xeeni waaphwannye awe Moise mwaha wa wuupuwelela itthu saaleiheriwe ni Muluku?

¹³ Okathi Moise uupuwela awe itthu Yehova saaleihenrye awe aIsarayeli, waamini ni omphenta wawe Muluku waaninnuwa. Moolikana ni atthu akina yaamoova Muluku, owo aaniwerya woona okathi Yehova aarowa awe owoopola apinaatamu wira ahikhweeke. (Yob 14:14, 15; aHéb. 11:17-19) Tthiri khivanivila woona wira Moise aahikhalana mathowa manceene yaamwiiriha omphenta Muluku yoowo aawoonela othunku aHeeberi ni apinaatamu otheene. Waamini ni niphento waahimutumererya Moise opaka khula etthu mweekumini mwawe. (Otum. 6:4, 5) Hata okathi yoole Farawo waamoopopinhe awe Moise wira aarowa omwiiva, waamini ni omphenta wawe Muluku vamosa ni owerya wawe woona itthu sooloka saari muhoolo, waahimulipiha nto khuwanana muxankiho ole moolipa murima.​—Okhum. 10:28, 29.

MMANANIHE WOONA ELE OMWENE ENROWA AWE OPAKA

14. Enamuna xeeni ya wuupuwela eri ya ethiru?

¹⁴ Anamunceene olelo-va annihela mmuupuweleloni mwaya itthu soohikhala sa ekeekhai voohimya sa ele enrowa okhumelela muhoolo. Vanaamwi anamunceene ahirina mireerelo sowaatta, mwa ntakiheryo, awo anniloha aryeene oothaaciri ni okhala nipuro noovareleleya vanceene, variki ekumi aya mahiku ala esaren’yene “ovelavela n’uhawa pahi”. (Esal. 90:10) Awo okathi mukina annuupuwelela akhalanne ene ekumi yoohixankiha alamuleliwaka ni pinaatamu ooreera murima, masi Biibiliya onihimya wira Omwene wa Muluku paahi tori nlipelelo noororomeleya na apinaatamu. (Dan. 2:44) Atthu anceene anoona wira Muluku khonirowa opwetexa makhalelo ala ootakhala a itthu, masi Biibiliya onihimya etthu ekina yoovirikana vanceene ni eyo. (Sof. 1:18; 1 Yoh. 2:15-17) Soolipelela iyo sa atthu awo ahinimwaamini Yehova voohimya sa muhoolo itthu sa ethiru paahi.

15. (a) Mureerelo xeeni oniphwanya aya maKristau mwaha wa owerya waya woona ele eniwehererya aya muhoolo? (b) Muhimye etthu eniphavela anyu opaka okathi Muluku onrowa awe waakhwaniherya sooleiherya sawe.

¹⁵ Moovirikana ni atthu awo, hiyo nikhanle maKristau ninnitumereriwa owehexexa etthuvo ahu, ekhale ele ya orowa wiirimu wala okhala valaponi. Nto niireke munniwerya wiixoona mwaakhenle ene mareeliho aleiheriwe ni Muluku? Owerya woona itthu sinrowa anyu opaka okathi Muluku onrowa awe waakhwaniherya itthu sileihenrye awe, moohaaniherya onniiriha murima anyu okhala woohakalala vanceene. Woonasa wene nyuwo munniwerya “woona” mukhalaka valaponi voohimala. Muupuwelele okathi nyuwo ni atthu akina munrowa anyu ovaraka muteko mowiiraana wira mukhalihe elapo ela eparayiisu. Atthu otheene yaattamanne anyu annimphenta Yehova ntoko nyuwo sinimphenta anyu. Nyuwo munrowa okhalana ikuru, ekumi yooloka ni makhalelo oolokexa. Atthu anrowa oweheryaka muteko wa olokiherya elapo ela anrowa wiirihaka ekumi okhala yoohakalaliha, okhala wira anrowa woohoolelakani nniphento. Nyuwo munrowa otteeliwa murima okathi onrowa anyu orumeelaka itthu sinisuwela anyu ni oratta anyu musuwelaka wira khula etthu enipaka anyu ennaaphwanyiha mureerelo atthu anaaphenta anyu ni enninvuwiha Muluku. Mwa ntakiheryo, okathi onrowa anyu waakhaliheryaka atthu ahihimuxiwe niinano omusuwela Yehova. (Yoh. 17:3; Mit. 24:15) Itthu iyo sotheene sihimmwale khahiyo oloha paahi, ti sa ekeekhai. Itthu iya sookuxa murima sihimmwale sinikumihiwa mBiibiliya ni iyo ikeekhai sa ele enrowa wiiraneya muhoolo.​—Yes. 11:9; 25:8; 33:24; 35:5-7; 65:22.

XEENI VANITTHUNEYA AHU OLAVULA SA NLIPELELO NAHU?

16, 17. Mureerelo xeeni oniphwanya ahu mwaha wa olavula voohimya sa nlipelelo nahu?

¹⁶ Okathi onaaleela ahu maKristau akhwiihu etthu enirowa ahu opaka okathi Yehova onrowa awe waakhwaniherya sooleiherya sawe, muupuwelo ahu onniwerya woona itthu iyo sinilavula ahu ni sinnikhala sa ekeekhai. Nnaamwi nihisuwelexaka makhalelo a khula mutthu elapo esya, masi okathi onilavula ahu ele enuupuwela ahu wira tanirowa okhala makhalelo ahu, hiyo ninnilipihana mukina ni mukhwaawe ni waamini wahu itthu sinilipelela ahu sileiheriwe ni Muluku onninnuwa. Okathi murummwa Paulo waaxekunrye awe anna oRoma, tthiri awo yaahisiveliwa ‘olipihana’ mukina ni mukhwaawe, nto hiyo niireke siiso okathi ola wootakhala.​—aRom. 1:11, 12.

¹⁷ Owehexexa itthu sinrowa wiiraneya muhoolo onninikhaliherya okhoottela muupuwelelo woohiloka mwaha wa mixankiho sirina ahu nenna-va. Murummwa Pedru woonasa wene aahikhalana muxankiho mmosaru vaavo vaamuhimeeryale awe Yesu wira: “Hiyo va, nohiya itthu sothene, nnottharani nyuwo. Ninrowa ophwanyani”? Omukhaliheryaka Pedru ni atthu akina yaari vaavale wuupuwelela ele yaasukeriwe aya muhoolo Yesu aakhunle so: “Kinolèlani ekhweli wira: nyuwo mukitthanre miyo, nihiku n’orerihiwa olumwenku, okathi Mwana a Mutthu onrowawe okilathi vehijeni vawe y’ovuwa; ni nyuwo-tho munokilathi vehijeni mulokó ni pili, wira mulamuleke mahimo mulokó ni manli a Isarayeli. Vano-tho othene ale anihiya emp’aya walá anahiya axinn’aya n’axirokor’aya n’atithi aya n’ame aya n’an’aya n’imatta saya mwaha wa nsina naka, animwinjereriwa mpakha miloko mulokó iye sihiyalyaya, nave-tho anophwanya ekumi ehinimala”. (Math. 19:27-29) Pedru ni awiixutti ale akina nto yanwerya woona muteko waarina aya wa orowa olamulela moomweneni waarowa oruuha mareeliho manceene wa apinaatamu oowiiwelela.

18. Moota xeeni wuupuwelela moota sinrowa aya waakhwanela sooleiherya sa Muluku onniphwanyiha aya mureerelo olelo-va?

¹⁸ Arumeyi a Yehova ari valaponi khula okathi anniphwanya mureerelo vaavo vanuupuwelela aya moota sinrowa aya waakhwanela sooleiherya sa Muluku. Abeli aanisuwela itthu sinceene voohimya sa sooleiherya sa Muluku ni aaniwerya woona itthu sooloka saarowa okhumelela muhoolo, nto aahaamini ni khuvarexexa nlipelelo nlo. Miteko sooniherya waamini saavanre awe Abrahamu saaweryanen’ye okhala wira owo aaniwerya “wona” waakhwanela wa eprofesia ya Muluku voohimya sa “osúlu”. (Maph. 3:15) Moise “ahiwehexexa otthuveliwa w’oholo”, nto aahipaka itthu ni waamini, aahinnuuherya omphenta wawe Yehova. (aHéb. 11:26) Omwaamini ni omphenta wahu Muluku onrowa wuncerereyaka vaavo vanirumeela ahu owerya orina ahu wira noone waakhwanela wa itthu sotheene sileiheriwe ahu ni Yehova. Enamuna yooreerela ya orumeela yoovaha eyo ya Muluku enrowa othokoreriwa muru onittharelana.