Mwiixutte Ele Nuulumo Na Muluku Enihimya Aya

Exeeni Enrowa Wiiraneya Nihiku na Ophukeliwa?

Mwaha ola, onithokorerya makoho waaniheryasa atonko anyu opaka. Nave onnooniherya opuro onrowa anyu osoma mBiibiliyani wira mphwanye waakhuliwa. Anamoona a Yehova anoohakalala owaakhulani makoho awo.

1. Nihiku Noophukela ti xeeni?

Ntoko ninweha ahu efootu eyo eri moono woolopwana, atthu anceene anuupuwela wira Nihiku na Ophukela, atthu ibilyau sinceene anrowa weemela ohoolo wa ehice ya Muluku wira ephukeliwe moovarihana ni miteko saya; wira akina evahiwe okumi wiirimu, akina yahaaweke omooroni. Biibiliya onnooniherya wira yoolakela ya Nihiku na Ophukeliwa, ori woopoliwa atthu moohaaxiwani moohixariya. (Esalimo 96:13) Muluku oomuthanla Yesu wira aaphukele atthu ni waavaha exariya apinaatamu.​—Mmusome Yesaya 11:1-5; Miteko 17:31.

2. Nihiku na Ophukela ninrowa ottikiherya sai exariya?

Vaavo mulopwana oopacerya Adamu aamutthekenle awe Muluku moolakela, nto anaawe otheene aarava etampi, ohaawa ni okhwa. (aRoma 5:12) Wira amalihe yootakhala eyo, Yesu onkela waahihimuxa atthu imilyau sinceene akwiiye. Eliivuru Wisupulula enihimya wira eyo enimwiiraneya okathi wa olamulelo wa iyaakha ekonto emosa wa Yesu Kristu.​—Mmusome Wisupulula 20:4, 11, 12.

Atthu anrowa ohihimuxiwa, khaniphukeliwa mwaha wa itthu sipanke aya ehinatthi okhwa; masi itthu sinkela olempwa ‘mulivuruni’ sinkela okumiheriwa seiyo sihimmwale ni Wisupulula kapiitulu 20. (aRoma 6:7) Murummwa Paulu onnihimya wira anookhala atthu yaale ankela ohihimuxiwa, anrowa wiixuttihiwa masu a Muluku alipa ‘òrera murima n’ale òtakhala murima’.​—Musome Miteko 24:15.

Atthu yaale akhwiiye ehinatthi osuwela masu a Yehova Muluku ni omukokhorela, anrowa ovahiwa okathi wira erukunuxe mukhalelo aya wira epake itthu sooloka. Yaiwelela-vale, ohihimuwa waya onrowa otaphulela ‘ekumi yoohimala’. Akina anrowa ohihimuxiwa, khanrowa ophavela wiixutta masu a Yehova. Nto ohihimuwa waya onkela otaphulela ‘ophukeliwa’.​—Mmusome Yohani 5:28, 29; Yesaya 26:10; 65:20.

Wanikisa wa iyaakha ekonto emosa wa Mahiku awo Oophukela, Yehova onrowa owiiriha apinaatamu okhala oomalela. (1 aKorinto 15:24-28)Tthiri aatthu aniiwelela ankela waakhela mareeliho ala! Wanikisa wa yoweeha yookiserya, Muluku onrowa omutaphula Satana Diabo opuro aatthukhweliwe awe mpakha iyaakha ekonto emosa. Satana onrowa-tho weererya waahapuxa atthu ephiro ya Yehova; masi ale anrowa omukhootta anoophwanya okumi woohimala valaponi.​—Mmusome Yesaya 25:8; Wisupulula 20:7-9.

4. Nihiku xeeni nikina na ophukela ninrowa waavaha mareeliho apinaataamu?

Nave-tho Biibiliya onnirumeela nuulumo noowi: ‘nihiku na ophukeliwa’ aphavelaka ohimya etthu Muluku onkela awe opaka wira apwetexe mukhalelo wootakhala wa olumwenku ola. Nihiku nlo ninkela orwa mootutuxerya ntoko Mutaaseke yoole aapwetenxe atthu ootakhala mahiku a Nowe. Eyo etthu yoohakalaliha okhala wira nihiku nlo nihaattamela wira epwetexiwe ‘atakhali’. Nto atthu a xariya tanrowa okhalaka.”​—Mmusome 2 Pedru 3:6, 7, 13.

Mwaphavela malakiheryo makina, nwehe ipaaxina 213-215, sa eliivuru ela epakiwe ni Anamoona a Yehova. Biibiliya Oniixuttiha Exeeni Tthiri?

[Elatarato epaaxina 16]

“Ophukeliwa Wookiserya”, ya Gustave Doré, 1832-1883

[Masu a elatarato]

Engravings ya Doré