WAAKHULIWA WA MAKOHO A MBIIBILIYANI
Nihiku Noophukela Exeeni?
Khalai, Muluku aanaarumeela alipa-oophuka wira awoopole atthu awe okathi yaahaaxiwa aya. (Makhulupale 2:18) Biibiliya onniromola Nihiku Noophukela na Muluku, ntoko okathi woohakalaliha, vaavo Yehova, Namalamulela a elapo yotheene, onirowa awe owoopola atthu otheene voohimya sa ohaawa.—Musome Esalimo 96:12, 13; Yesaya 26:9.
Muluku oomuthanla Yesu wira aalamule atthu akumi ni ale akhwiiye. (Miteko 10:42; 17:31) Anamunceene annookhwa ehimurumenle Muluku. Nihiku Noophukela na Muluku, Yesu onirowa waattikiherya okumi atthu awo wira emusuwele ni omphenta Muluku eekeekhai.—Musome Miteko 24:15.
Xeeni Nihiku Noophukela ninrowa aya omaliha iyaakha ekonto emosa?
Alipa-ookhwa anirowa ohihimuxiwa muhina mwa iyaakha ekonto emosa. (Wisupulula 20:4, 12) Awo anoovahiwa okathi wira yiixuttihiwe sooruma sa Muluku ni weettela. Moovirikana ni muupuwelo wa anamunceene, Biibiliya onnooniherya wira atthu anirowa ophukeliwaka moovarihana ni ele enrowa aya opaka nuumala ohihimuxiwa.—Mmusome aRoma 6:7.
Biibiliya onniromola-tho nihiku noophukela, nenlo ninrowa okhumela mootutuxerya sihinatthi opacerya iyaakha ekonto emosa. Nihiku nlo nniitthaniwa wanikisa, sintoko sihimmwale aya ni mwaha wa vakaapani wa erevista ela. Nihiku nlo, Muluku onirowa waapwetexa atthu otheene ootakhala. (2 Pedru 3:7) Nto nihaana ovikaniha wunnuuherya omphenta wahu Muluku.—Mmusome 2 Pedru 3:9, 13.
Wira musuwele soohimmwa sikina muwehe epaaxina 213 ya eliivuru ela, yoolaleiwa ni Anamoona a Yehova
Mubaxari va www.jw.org/vmw