MURUU WA NENLI
Munvuwihe Yehova Okhanle Muluku Mmosaa Paahi Eekeekhai
1. Tanii okhanle Muluku mmosaa paahi eekeekhai?
BIIBILIYA onihimya wira hataa sikhanle ene itthu sinceene siniihaniwa amuluku, masi wa hiyo “Muluku ori mmosá pahi, Tith’ihu”. (1 aKorinto 8:5, 6) “Muluku [owo] ori mmosá pahi” ti Yehova, Mpattuxa a itthu sotheene. (Otumererya 6:4; Wisupulula 4:11) Yesu aahimuhimya owo okhala ‘Muluku awe, yowo-tho okhanle Muluku anyu’. (Yohani 20:17) Yesu aaheemererya ele yaahimmwe Moise khalai wira: “Apwiya pahi ti Muluku [eekeekhai]: khavo-tho muluku mukina, ehikhanle Apwiya yawo”. (Otumererya 4:35) Yehova ti muulupalexa ovikana etthu yotheene enikokhoreliwa, ntoko amuluku eethiru, atthu anikokhoreliwa, aahiiso nwanani awe Satana Diabo, “muluku a vathí-va”. (2 aKorinto 4:3, 4) Moovirikana ni amuluku ala otheene, ntoko siiso Yesu saahimmya awe, Yehova ti “Muluku mmosáru èkekhai”.—Yohani 17:3.
2. Okumi ahu waatthuneya okhalaka sai, vaavo vaniixutta ahu sa Muluku?
2 Atthu ooxukhuru yaawo aniixutta mikhalelo sookuxa murima sa Muluku, ni itthu sipanka awe niiye nlelo sinrowa awe oniirela, annimwaattamelexa Muluku. Vaavo omphenta waya Yehova vaninnuwa aya, awo annikuxeya murima wira anvuwihe. Moota xeeni? Ephiro emosaa orii waaleela akina voohimya sa owo. ARoma 10:10 onihimya wira: “Mutthu onihimya wamini wawe oholo w’atthu, onophwanya wòpowa”. Ephiro ekina orii omutakiha mmasuu ahu ni miteko sahu. AÉfeso 5:1 onihimya wira: “Mutthareke mwettelo wa Muluku, okhala wira mw’àn’awe òphentiwa”. Wira nimutakihe oratteene, nohaana osuwela saana mikhalelo sa Yehova.
3. Mikhalelo suulupale sa Muluku tiivi?
3 MBiibiliyani, aakhala masuu manceene yaawo anooneiha mikhalelo soolokexa sa Muluku. Mikhalelo sawe mixexee ti iya: Miruku, exariya, owerya, ni ophenta. “Miruku n’usuwela sinnikhala ni yowo”. (Yobi 12:13) “Iphiro sawe sothene ti sa xariya”. (Otumererya 32:4) “Owerya wawe ti wulupale”. (Yesaya 40:26) “Muluku ophentá”. (1 Yohani 4:8) Vanonto, mmikhalelo iya mixexee suulupale sa Muluku, tuuvi okhanle mukhalelo muulupalexa yoowo onisuwanyeiha omutthu wa Muluku?
“Muluku Ophentá”
4. Mukhalelo xeeni wa Muluku waamwiirinhe opattuxa olumwenku ni itthu sotheene sirina okumi?
4 Muthokorerye ele yaamwiirinhe Yehova opattuxa olumwenku, ni soopattuxiwa somunepani sirina ankhili, ni apinaatamu. Niireke wira yaamwiirinhe opaka itthu iya saari miruku aahiiso owerya wawe? Nnaari, nnaamwi Muluku aarumenle mikhalelo iyo, masi mikhalelo iyo khahiyo ti saamwiirinhe opattuxa. Nto, exariya awe khiyaanvekela opaka itthu sikina wira sikhalane okumi. Masi, ophenta wuulupale wa Muluku ti waamwiirinhe wira aapattuxe atthu arina ankhili wira ahakalaleke ni okumi. Ophenta waahimwiiriha ohimya yoolakela awe wira apinaatamu oowiiwelela ekhaleke moohimala mParayiisu. (Maphattuwelo 1:28; 2:15) Ophenta waahimwiiriha opaka malokiheryo wira okumihe wuulumeliwa mwaha wa yoottheka ya Adamu yeeyo yaaruuhenly’aya apinaatamu.
5. Moovarihana ni Biibiliya, mukhalelo xeeni onooniherya omutthu wa Yehova, ni nthowa xeeni?
5 Tthiri, mmikhalelo sotheene sa Muluku, mukhalelo muulupalexa ti ophenta wawe. Mukhalelo ola ti omutthu awe. Nnaamwi miruku sawe, exariya awe, ni owerya wawe sikhanle ene mikhalelo sootthuneya, Biibiliya khonihimya-tho wira Yehova ti miruku, ti exariya, aahiiso ti owerya. Masi Biibiliya onihimya wira Muluku ophentaa. Nalikaniherya ophenta ni mutthu, nto Yehova ti mutthu ene yoowo. Ophenta nno onihooleliwa ni malamulo, ohiya ni okuxeya murima. Ophenta wa Muluku oneettihiwa ni malamulo eekeekhai ni eexariya. Ola mukhalelo muulupalexa wa ophenta, ntoko sithoonyiheriwa aya ni Yehova Muluku paahi. Ophenta iwo yowooniherya ya ohikhalana nrima moomalela ni okathi wotheene onooneya ni miteko sinooniherya ophenta.
6. Nnaamwi Muluku oryeene muulupale onivikana hiyo, exeeni ennikhaliherya omutakiha owo?
6 Etthu ennivaha ikuruu wira nimutakiheke Muluku, orii mukhalelo yoowo woolokexa wa ophenta. Mwaha wookhala atthu puree, oohimalela, ni oottheka, pooti wuupuwelaka wira khaninkhala-khala niweryaka omutakiha saana Muluku. Masi nookhala ntakiheryo nikina na ophenta wuulupale wa Yehova: Owo onnisuwela etthu ehiniwerya ahu opaka ni khonivekela wira nipakeke ele ehiniwerya ahu. Onnisuwela-tho wira nlelo hiyo nrii atthu oottheka. (Esalimo 51:7) Ti mulattu aya Esalimo 130:3, 4 enihimya aya so: “Apwiya! Mwathokoreryá sottheka sahu, ti pani onalipé oholo wanyu? Masi nyuwo munnilevelela itampi sahu”. Aayo, Yehova ti “Apwiya Muluku òmoriwa ikharari ni òvilela, òpisa onanariwa, òrera murima”. (Okhuma 34:6) “Apwiya! Nyuwo mòrera murima ni òlevelela”. (Esalimo 86:5) Nto, moota vary’aya voolipiha murima! Moota vaniriiriha aya murima omurumeela Muluku orina mikhalelo iya sooreerexa, ni okhalana okhapelela wawe woophenta ni wa ikharari!
7. Ophenta wa Yehova onooneya sai orweela mwa itthu sipattunxe awe?
7 Ophenta wa Yehova pooti-tho wooneya orweela mwa itthu sipattunxe awe. Nkahaya muupuwele itthu sinceene sooloka sipanke Yehova wira sinihakalaliheke, ntoko miyaako sooreera, itakwa, maratta, ni iphareya. Owo oonivaha soolya sinceene soovirikana, soosiva ni sinniiriha okhala akumi. Nave-tho, Yehova oopaka ifilori sinceene sooreera, sowunkhela ni soovirikana vamosaa ni inamaa soohiyana-hiyana. Moophenta, Muluku oopaka itthu saarowa waahakalaliha apinaatamu, nnaamwi ahaakhanyereriwe opaka itthu iyo. Ekeekhai wira mwaha wookhalaka elapo ela yootakhala ni mwaha wa ottheka wahu, hiyo khannittottela muraarelo saana itthu iya. (aRoma 8:22) Masi nkahaya muupuwele ele Yehova enrowa awe opaka wa hiyo mParayiisu! Nasaalimo onnilipiherya wira: “Munnitthukula matat’anyu, munnavaha yolya atthu othene anaphentanyu”.—Esalimo 145:16.
8. Etthu xeeni yuulupalexa enooniherya wira Yehova onnaaphenta apinaatamu?
8 Etthu xeeni yuulupalexa enooniherya wira Yehova onnaaphenta apinaatamu? Biibiliya onitthokiherya so: “Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”. (Yohani 3:16) Niireke wira waari oreera murima wa apinaatamu waamwiirinhe Yehova opaka etthu ela? ARoma 5:8 onaakhula wira: “Muluku ònithonyerya khuluwi oniphenta wawe: tthiri Kristu ònikhwela hiyo, varyahu nlelo anatampi”. Tthiri, Muluku aahimurumiha valaponi Mwanawe oohittheka wira ovahee okumi awe ntoko mukuttho, wira onoopole wuulumeliwa wa yoottheka ni okhwa. (Matheyo 20:28) Mukuttho ola woohula ephiro wira atthu yaale animphenta Muluku, aphwanye okumi woohimala. Oreera waya, mwaha woowi Muluku onnaaphenta atthu otheene aniphavela opaka yotthuna awe, ti maana aya Biibiliya vannileela awe wira: “Muluku khanathanla atthu. Tthiri Muluku onnaphenta atthu a nloko ti nloko, yale animuttittimiha, enettela exariya”.—Miteko s’Arummwa 10:34, 35.
9. Mwaha wa Yehova onvaha Mwanawe ntoko mukuttho wowoopola wa hiyo, ela yaahaana oniirihaka opaka exeeni?
9 Mwaha wa Yehova onvaha Mwanawe ntoko mukuttho wowoopola wa hiyo, ohulaka nto ephiro ya okumi woohimala, ela yaahaana ohapuwelaka sai moota oneettiha ahu okumi ahu olelo va? Ela yaahaana olipiha omphenta wahu Yehova, Muluku eekeekhai. Mu okathi omosaru, ela yaahaana oniirihaka ophavela onwiriyana Yesu, yoowo onimweemelela Muluku. “Kristu ohakhwela atthu othene, wira ale ari akumi ehìkhalele mmansaya, nto emukhaleleke ole àkhwenle ni àhihimuwenle yawo”. (2 aKorinto 5:15) Ti voohakalaliha otthara mavalo a Yesu, okhala wira owo aanitakiha moomalela ophenta ni omoriwa ikharari wa Yehova! Ela enooniheriwa ni masuu yaawo Yesu yaahimenrya awe ale oowiiyeveiha wira: “Nyuwo othene mukhulumunwe, mulemeliwene muritti mulupale, mukirwele miyo: komumuliheni. Mwireye muritti aka: mukihiye kolakeni, mana miyo ka mutthu òmàla ni òwiyeviha. Mwirá siso, munophwanya murettele murohoni mwanyu. Tthirí, muritti onoreyakani ti woveya: olemela onotexihakani ti wokhweya”.—Matheyo 11:28-30.
Owooniherya Ophenta Atthu Akina
10. Iphiro xeeni siniwerya ahu wooniherya waaphenta maKristau akhw’ihu?
10 Ninrowa wooniherya sai waaphenta maKristau akhw’ihu, ntoko Yehova ni Yesu sinniphenta aya? Nkawehani iphiro sinceene siniwerya ahu wooniherya ophenta nno: “Ole omphenta t’òvilela, t’òwarumela akhw’awe, khanakhalela nrima; khanìvuwiha, khanìkuxererya. Ole omphenta onnalemeliha akhw’awe, khamphavela murerelo awe, khaniviruwa, khanùpuwela sotakhala síreliwawe. Ole omphenta khansiveliwa n’itthu sohiloka, nto onnitteliwa murima n’ikekhai. Ole omphenta onnakhurunuwela atthu othene, onnakupali atthu othene, onniroromela vohihiyererya, onnivilela sothene. Ophenta khummala-tho”.—1 aKorinto 13:4-8; 1 Yohani 3:14-18; 4:7-12.
11. Atthu xeeni-tho anitthuneya ahu waaphentaka, ni moota xeeni?
11 Atthu xeeni-tho anitthuneya ahu waaphentaka, ni moota xeeni? Yesu aahimmye wira: “Vano, murowé, mwawixuttiheke atthu a maloko othene, mwabatizaka ni nsina n’Atithi ni na Mwana ni n’Eroho [munepa] Yowarya. Mwawixuttiheke wettela sothene sòrumalyakani”. (Matheyo 28:19, 20) Ela enihela muhina waalaleerya ihapari sooreera voohimya sa elapo esyaa ya Muluku, atthu yaale ahinatthi okhala maKristau akhw’ihu. Tthiri, Yesu aahihimya oratteene wira nihaaphenteke paahi maKristau akhw’ihu, oriki: “Nyuwo mwaphentaka yaleru anophentani pahi, muntthuna otthuveliwa sai? Khanìra-tho siso hatá alipa-òtakhala murima? Mwakhomasaka amus’inyu-ru pahi, munona wira etthu yotepa orera? Khanìra-tho siso hatá amalapo?”—Matheyo 5:46, 47; 24:14; aGalasia 6:10.
Weettela Nsina na Yehova
12. Nthowa xeeni nsina na Muluku nnimphwanelela awe owo paahi?
12 Ephiro ekina yootthuneya wira ninvuwihe Muluku eekeekhai orii osuwela, orumeela, ni owiixuttiha atthu akina nsina nawe nenno nihinlikana nnikina, Yehova. Nasaalimo aahilavula ele yaaphavela murima awe oriki: “Esuwele wira nyuwo pahi muri Apwiya [“Yehova”, Tradução do Novo Mundo]: nyuwo mulamuli mulupale àtthu othene”. (Esalimo 83:19) Nsina Yehova nintaphulela wira “Owo Onniiriha Okhala”. Owo Namalakela Muulupale, ni okathi wotheene onnaakhwaniherya soolakela sawe mookhumela saana. Nto paahi Muluku eekeekhai toniphwanelela okhalana nsina nno, okhala wira apinaatamu khanwerya osuwela akhala wira wiimananiha waya onrowa okhumela saana. (Yakobo 4:13, 14) Yehova paahi toniwerya ohimya wira masuu awe anrowa ‘omaliherya’ itthu siniruma awe. (Yesaya 55:11) Atthu anceene annikuxeya murima vaavo vaniweha aya ekwaha yoopacerya nsina na Muluku mBiibiliyani mwaya ni wiixutta yootaphulela aya. (Okhuma 6:3) Masi awo anrowa ottottela mureerelo osuwela nno paahi akhala wira ‘anowettela Apwiya . . . mpakha mahiku othene’.—Mikeya 4:5.
13. Ontaphulela exeeni osuwela nsina na Yehova ni weettela nsina nawe?
13 Voohimya sa nsina na Muluku, Esalimo 9:11 enihimya wira: “Apwiya! Ale anosuwelani yororomeleni”. Ela enihela muhina ohiya paahi osuwela nsina na Yehova, okhala wira osuwela iwo khontaphulela ororomela. Osuwela nsina na Muluku ontaphulela omusuwela Yehova Muluku oratteene, ottittimiha olamulelo awe, wiiwelela malamulo awe, ni omuroromela mwa itthu sotheene. (Miruku 3:5, 6) Moolikanasa, weettela nsina na Yehova ontaphulela wiivahererya wa owo ni okhala namakokhorela awe, ni moororomeleya orumeela okumi ahu moovarihana ni yotthuna awe. (Luka 10:27) Niireke wira nyuwo munnipaka eyo?
14. Ohiya okhanyereriwa, etthu xeeni ekina enitthuneya oniirihaka omurumeela Yehova moohimala?
14 Wira nimurumeele Yehova moohimala, hiyo nohaana omurumeelaka moohikhanyereriwa. Murummwa Paulo aahimutumererya Timootheyo, yoowo aamurumenle Yehova iyaakha sinceene wira: Yoolukama anyu ekhaleke ‘otepa omphenta Muluku’. (1 Timótheyo 4:7, Biblia Solempwa sa Muluku) Enimwiiriha mutthu omphenta Muluku, mwaha wa oxukhuru onikhuma vamurimani vawe. “Omphenta Muluku” nthoonyeryo na omuttittimiha vaalupale Yehova paahi. Ophenta iwo ethoonyeryo ya wataana wuulupale mwaha wa omuttittimiha wahu ni ottittimiha wahu iphiro sawe. Ela enniniiriha ophavela wira atthu otheene attittimiheke nsina nawe. Akhala wira okathi wotheene, nimphavela weettela nsina na Yehova, Muluku mmosaa paahi eekeekhai, hiyo nohaana wunnuuherya omphenta Muluku mookumini mwahu.—Esalimo 37:4; 2 Pedru 3:11.
15. Nipakee exeeni wira nimukokhoreleke Muluku paahi?
15 Wira nimurumeele Muluku moweemerereya, okokhorela wahu ohaana okhala woohikawanyeya, mwaha woowi Muluku ‘ontthuna wira nikhalè awawe pahi’. (Okhuma 20:5) Hiyo khaninwerya omphenta Muluku, ni okathi omosaru, ophenta elapo yootakhala, yeeyo muluku aya ori Satana. (Yakobo 4:4; 1 Yohani 2:15-17) Yehova onnisuwela oratteene ele khuta mutthu a hiyo eniphavela awe okhala. (Yeremiya 17:10) Akhala wira ninniphenta tthiri exariya, Muluku onnoona eyo ni onrowa onikhaliherya ovilela soweeha sahu sa khuta nihiku. Orumeelaka owerya wa munepa awe wootteela, owo onrowa onikhaliherya oxintta otakhala weiwo osaren’ye elapo ela. (2 aKorinto 4:7) Owo onrowa-tho onikhaliherya ovikaniha olipiha yoolipelela ahu ya okumi woohimala mparayiisu valaponi-va. Nto, ela yoolipelela yooreera! Hiyo nohaana omuxukhurela vanceene ni omurumeela Muluku eekeekhai, Yehova, yoowo iirinhe itthu iya okhala sooweryaneya.
16. Nyuwo mwaahaana ophavela opaka exeeni, vamosaa ni imilyau sinceene sa atthu akina?
16 Atthu imilyau sinceene elapo yotheene, aheemererya moohakalala olattula wa nasaalimo yoowo aalempe so: “Mulaleye ni miyo ovuwa wa Muluku: ninnuwihe nsina nawe othene vamosá”. (Esalimo 34:4) Yehova onnoolattulani wira mukhalee eriyari ya muttitthi wa atthu a maloko otheene yaawo aninvuwiha.
Makoho Oowuuluula
• Yehova orii Muluku a mukhalelo xeeni? Mareeliho xeeni aniphwanya ahu mwaha woosuwela oratteene mikhalelo sawe?
• Ninrowa wooniherya sai wira ninnaaphenta atthu akina?
• Exeeni eniheliwa muhina osuwela nsina na Yehova ni weettela nsina nno?
[Ilatarato siri epaaxina 14]
Yehova, mwaha wa ophenta wawe wuulupale, onrowa ‘otthukula matata awe wira ovahe yolya etthu eri yothene ekumi’