MMWAATTAMELE MULUKU

‘Mone: Itthu Sothene Miyo Kinnikhaliha Isyá!’

Niireke munniphavela ekumi yooloka ni okhala iyaakha sinceene ni emusi anyu? Munniphavela olumwenku atthu ahinwereiwa aya, ohaawa, ni okhwa? Olumwenku owo onookhala tthiri. Veekeekhai, Yehova Muluku oolakela oruuha elapo esya ya xariya moohipisa-va. Nkahaya moone moota sinrowa aya wiiraneya yoolakela eyo ntoko silempwale aya eliivuru ya Wisupulula 21:3-5.​—Mmusome.

“[Muluku] onopuputtha maithori aya othene”. (Wisupulula 21:4) Muthinto xeeni wa maithori anirowa opuputthiwa? Ala khahiyo maithori anikhumelela mwaha woohakalala, wala ale anikhapelela maitho ahu. Muluku onihimya maithori anikhuma mwaha wa ohaawa ni oriipiwa murima. Nto Muluku onrowa opuputtha maithori anikhuma mwaha wa oriipiwa murima ni ovenxa itthu sotheene sinikumiherya wunla, ohaawa ni otakhala.

“Khunrowa okhala-tho okhwa”. (Wisupulula 21:4) Okhwa onnikumiherya oriipiwa murima vanceene. Nto Yehova onrowa owoopola apinaatamu oowiiwelela voohimya sa okhwa. Moota xeeni? Owo onoomaliha etthu enikumiherya okhwa, eyo piiyo, etampi niravihiwe ahu ni Adamu. (aRoma 5:12) Yehova onrowa waavaha apinaatamu oowiiwelela okumi woomalela orweela wa mukuttho wowoopola wa Yesu.a Ntoko nwanani ookiserya, okhwa, onrowa “opwetexiwa”. (1 aKorinto 15:26) Nto apinaatamu oowaamini anrowa oweryaka okhala ntoko Muluku saalakenle awe wanipacerya: okhala mahiku otheene ni ekumi yooloka.

“Nnákhala oripiwa murima”. (Wisupulula 21:4) Muthinto xeeni wa oriipiwa murima ohinrowa okhala-tho? Inamuna sotheene sa oriipiwa murima sikumiheriwe ni etampi ni ohimalela wa Adamu seiyo sinaahaaxa atthu anceene ntoko: oriipiwa murima wa mmuupuweloni, vamurimani ni itthu siniwereiha erutthu.

Tthiri, moohipisa wunla, okhwa, ni oriipiwa murima khunrowa okhala-tho. Waaniheryasa nyuwo pooti okoha so: ‘Itthu iyo sinrowa wiiraneya woowi? Niireke yooleiherya ya Muluku voohimya sa okumi owo onirowa wiiraneya wiirimu?’ Nnaari. Muthokorerye mathowa manli. Wanipacerya: yooleiherya ela, ennipacerya ni masu ani: “Emp’ela, empa ya Muluku variyari v’atthu”. Eyo enooniherya wira apinaatamu anrowa okhalaka valaponi. (Wisupulula 21:3) Ya nenli: yooleiherya eyo, ennihimya sa elapo ohinrowa “okhala-tho okhwa”, eyo piiyo, olumwenku yoowo okhwa waatonko aya okhala masi onrowa aya omala-mala. Wiirimu khotonko okhala okhwa; okhuma khalai okhwa ori elapo ya vathi. Tthiri, yooleiherya ya Muluku ya okumi wooloka enirowa wiiraneya valaponi-va.

Yehova oniphavela wira nikupaliki yooleiherya awe ya elapo esya ya xariya. Nuumala ohimya mareeliho anrowa okhumelela, Muluku onnittittimiherya oriki: ‘Mone: itthu sothene miyo kinnikhaliha isyá!’ Moottharelana, owo onnihimya-tho so: “Molumo aka t’òroromeleya ni t’èkekhai”. (Wisupulula 21:5) Xontte, nnootumereryani wira mwiixutte itthu sikina voohimya sa moota nyuwo ni ale anaaphenta anyu munrowa anyu okhala hoothe ni arumeyi oohakalala yaawo anirowa oweha wiiraneya wa sooleiherya sa Muluku.

Malakiheryo a omusoma Biibiliya Dezembro

1 Pedru 1-5; 2 Pedru 1-3; 1 Yohani 1-5; 2 Yohani 1-13; 3 Yohani 1-14; Yuda 1-25–Wisupulula 1-22

[Enoota]

[Eponto yuulupale ya epaaxina 11]

Muluku onirowa opuputtha maithori yaawo anikhumelela mwaha wa ohaawa ni oriipiwa murima