Yehova Onniiwa Okathi Muninla Anyu

1-2. Itthu xeeni sikhanle ooniiriha wunla?

OOTHEENE ahu, ikwaha sikina ninninla. Nave ikwaha sikina ninnimoroxa maithori mwaha woohakalala. Mwa ntakiheryo, pooti wiira mootoko omoroxa maithori mwaha wa etthu yoovara murima yawiiranenleni ntoko oyariwa wa mwaninyu. Nave pooti wiira mootoko omoroxa maithori, mwaha wowuupuwela etthu yoohakalaliha wala mwaha wa onweha mmusi aahiiso mpatthani, yoowo ovirinhe okathi munceene muhinwenhe.

² Masi ikwaha sikina, ninninla mwaha woowi niriipinwe murima aahiiso yookhala etthu yoohiloka eniiranenle. Mwa ntakiheryo, ninninla otepexa wene okathi yoole mutthu nimmuroromela ahu onnihasula awe aahiiso mwaha woowi ninniwereiwa, wala nookhweliwa mutthu namphenta ahu vanceene. Hiyo pooti okhalana moonelo ntoko Yeremiya aarina awe nuumala ababilonia opwetexa oYerusalemu. Owo aahimmye so: “Maithori manjene annittonya mmaithoni mwaka . . . maithori annikhowa mmaithoni mwaka vohihiyererya”. — Wikh. 3:48, 49.

3. Yehova onoonela sai okathi onaaweha awe arumeyi awe ahaawaka? (Yesaya 63:9)

³ Yehova onnisuwela khula okathi nninla ahu mwaha wooriipiwa murima. Biibiliya onihimya wiira Yehova onnisuwela khula okathi ninhaawa ahu, nave onniniwiriyana okathi nninvekela ahu onikhaliherya. (Esal. 34:15) Masi ohiya paahi Yehova oniweha ni oniiwa okathi nimmuxonttela ahu, owo onnipaka itthu sikina. Ntoko paapa oophenta, owo onnixanka vanceene okathi onaaweha awe anaawe yinlaka ni onnipaka etthu wiira aakhaliherye. — Mmusome Yesaya 63:9.

4. Matakiheryo xeeni a mbiibiliyani ninrowa ahu othokorerya mwaha ola?

⁴ Mbiibiliyani, Yehova onnihimya moota oonela awe okathi arumeyi awe a khalai yanla aya ni moota aakhalihenrye awe. Mwa ntakiheryo, nnimwiixutta etthu ni ele yaawiiranenle arumeyi a Muluku ntoko Ana, Davidi ni mwene Ezekiya. Masi exeeni yaawiiriha wunla? Yehova aakhalihenrye sai? Nave ntakiheryo naya, ninrowa onikhaliherya sai okathi nninla ahu?

WUNLA MWAHA WOORIIPIWA MURIMA

5. Ana oonela sai mixankiho samphwanya?

⁵ Ana aahikhalana mixankiho sinceene seiyo saamwiiriha wunla aahiiso oriipiwa murima. Muxankiho mmosa waamuriipiha vanceene murima, okhala wiira iyawe aahikhalana muthiyana mukina, aihaniwa Penina, yoowo aamuhasula vanceene. Muxankiho mukina, okhala wiira Ana khaarina anamwane, masi Penina aahikhalana. (1 Sam. 1:1, 2) Ikwaha sinceene Penina aaninveeha Ana mwaha woohiyara. Vaakhanle wiira ti nyuwo, mwaarowa woonela sai? Ana aanixanka vanceene mpakha ‘opacerya wunla ni ohinaphavela olya’. Nave-tho owo “aahiriipiwa murima vanceene”. — 1 Sam. 1:6, 7, 10.

6. Exeeni Ana aapanke awe wiira ovukule oriipiwa murima?

⁶ Etthu xeeni Ana aapanke awe wiira ovukule oriipiwa murima? Etthu emosa aapanke awe, yaari orowa otabernaakulu onvekela Yehova. Woonasa wene, aattamenle ene vamukhora va etemplo “aahipacerya onvekela Yehova, ni onanla vanceene”. Nto owo aahimuxonttela Yehova ohimyaka so: “Nkawehani moota kinhaawa aka, mukuupuwele, muhimuliyale murumeyi anyu”. (1 Sam. 1:10b, 11) Ana aahimuleela Yehova mixankiho sawe sootheene ni moota oonela awe. Yehova aahiriipiwa murima vanceene nuumala onweha Ana inlaka. Owo aanimphenta vanceene, nave aaniphavela omukhaliherya!

7. Ana aari sai nuumala omuleela Yehova mixankiho sawe sootheene?

⁷ Nuumala Ana omuleela Yehova mixankiho sawe sootheene, namukuttho Eli aahimulipiherya wiira Yehova aamwaakhula nivekelo nawe. Ana aari sai nuumala wiiwa eyo? Biibiliya onihimya so: “Muthiyana owo aahivenya, onarowa olya. Vano khaariipinwe-tho murima”. (1 Sam. 1:17, 18) Nnaamwi muxankiho awe wahaamanle okathi ene yoole, Ana aahiphwanya omaaleleya. Owo aahimuleela muxankiho awe Yehova ni aaniroromela wiira okathi wooreerela, owo ammukhaliherya. Yehova aahiiwa nivekelo na Ana ni muhoolo mwaya owo aahirupala. — 1 Sam. 1:19, 20; 2:21.

8-9. Moovarihana ni aHeeberi 10:24, 25, xeeni vari aya va faita ohicompela mithukumano sa ekristau? (Nwehe efootu.)

⁸ Etthu nniixutta ahu. Niireke mookhalana muxankiho oniwiirihani oriipiwa murima ni wunla? Woonasa wene, mooriipiwa murima mwaha wookhweliwa mmusi mwamphenta anyu aahiiso mpatthani anyu. Okathi itthu iyo sooxankiha siniiraneya aya, pooti ophavelaka okhala mekhinyu. Eyo enniiraneya. Masi sintoko Ana aaphwanya awe murettele nuumala orowa otabernaakulu, mwa enamuna emosa-ru, munoophwanya murettele akhala wiira khamuncompela mithukumano hata muriipiwe ene murima. (Mmusome aHeeberi 10:24, 25.) Omithukumanoni, ninniiwa soolepa sooreera ni soolipiha. Ela enamuna emosa Yehova onirumeela awe wiira onikhaliherye ovukula oxanka okathi ninriipiwa ahu murima, nnaamwi muxankiho owo ohirowaka omala okathi ene yoowo.

⁹ Omithukumanoni, ninnaaphwanya anna ni arokora yaawo annimaaliha, onilipiha ni annooniherya wiira anniniphenta. Vaavo ninviriha ahu okathi niri ene naawo, ninnikhala oomaleleya. (1 aTes. 5:11, 14) Nrowe nthokorerye yoowiiraneya ya munna onirumeela ntoko pioneero a vameekhaaya yoowo okhweliwe amwaarawe. Owo onihimya so: “Ikwaha sikina, kimphavela okhala meekhaka okhala wiira kinninkheliwa vanceene ni mwaaraka, nto eyo ennikiiriha omakelaka wunla. Okathi kinrowa aka omithukumanoni, kinnilipihiwa vanceene. Moolumo ni ikomentaario sa anna ni arokora, sinnikimaaliha vanceene. Hata kikhumaka owaani kiriipiwe ene murima, vaavo kimphiyaka omithukumanoni, kinnikhala saana”. Okathi nihincompela ahu mithukumano, Yehova pooti waarumeela anna ni arokora wiira anikhaliherye.

10. Okathi sinniphwanya aya mixankiho, ninrowa otthara sai ntakiheryo na Ana?

¹⁰ Ana aahiphwanya murettele nuumala omuleela Yehova mixankiho sawe. Nyuwo muhaana ‘onvahererya Muluku mixankiho sanyu sootheene’ muroromelaka wiira owo onimoowiriyanani. (1 Ped. 5:7) Murokora mmosa yoowo iyawe iiviwe ni mapantiitu, ohimmye so: “Kaahiriipiwa murima vanceene kinuupuwela wiira nkaakhala-khala kitthikelaka ohakalala. Masi khula okathi kanvekela aka Tiithi aka Yehova, yoowo onkiphenta vanceene, kaaniphwanya omaaleleya. Ikwaha sikina nkaawerya otthokiherya itthu saakixankiha. Okathi kaariipiwa aka murima ni oxanka vanceene, kaaninvekela Yehova wiira okikhaliherye okhalana murettele. Opaka eyo, yaanikikhaliherya okhala oomaaleleya ni kaaniwerya ovara muteko kuupuwela aka nihiku nne”. Okathi mummuleela anyu Yehova itthu sootheene sinooriipihani murima, owo onnisuwela mixankiho sanyu ni onniriipiwa murima. Hata muxankiho owo ohirowaka omala okathi ene yoowo, Yehova onimoolipihani ni wookhaliheryani okhala oomaaleleya. (Esal. 94:19; aFil. 4:6, 7) Owo onniweha wiimananiha wanyu ohihiya omurumeela, tivonto onimooreelihani. — aHeeb. 11:6.

YEHOVA ONNIWEHA OKATHI MUNINLA ANYU MWAHA WA ATTHU ANOOHAAXANI

11. Davidi oonela sai okathi atthu akina yaamuhasula aya?

¹¹ Okumi awe wootheene, Davidi ahaana ovilela mixankiho sinceene seiyo saamwiiriha wunla. Yaahikhala atthu anceene yaamunyokha. Hata amusi ni apatthani awe, khiyaamuroromela ni yaaniphavela omukumiherya mixankiho. (1 Sam. 19:10, 11; 2 Sam. 15:10-14, 30) Waahikhala okathi Davidi sihaareerya aya omphwanya mixankiho, mpakha olepa so: “Kootemwa mwaha wa omakelaka wunla; Ohiyu wootheene kinninaaniha ekhaama aka ni maithori; Okathi kininla aka, maithori aka annisareya vakhaterani vaka ntoko maasi”. Masi xeeni Davidi aaxankale awe mwa enamuna ela? Owo onitthokiherya wiira, aanihaawa ‘mwaha wa atthu ootheene yaamuhaaxa’. (Esal. 6:6, 7) Okathi atthu akina yaamuhasula aya, Davidi aaniriipiwa murima vanceene mpakha ohinawerya omaala wunla.

12. Moovarihana ni Esaalimu 56:8, exeeni Davidi aakupali awe?

¹² Nnaamwi samphwannye mixankiho sinceene, Davidi aanikupali wiira Yehova aanimphenta. Owo olempe so: “Yehova onimwiiwa wunla waka”. (Esal. 6:8) Okathi mukina, Davidi aahilepa moolumo ooreera yaawo aniphwanyaneya Esaalimu 56:8. (Musome.) Moolumo awo a Davidi, annooniherya wiira Yehova onniniphenta vanceene ni onninthokorerya okathi ninxanka ahu. Davidi aatthokihenrye wiira maithori awe aathukumanyiwa mmurupani mwa Yehova ni oolepa muliivuruni mwawe. Davidi aanikupali wiira Yehova aaniweha ni aanisuwela etthu yaamuxankiha. Nave owo aanikupali wiira Tiithi awe oophenta a wiirimu, aanisuwela ohiya paahi mixankiho sawe, masi enamuna owo oonela awe.

13. Okathi atthu nnaaphenta ahu annithokorerya aya moohiloka, exeeni enreerela ahu wuupuwelelaka? (Nwehe efootu.)

¹³ Etthu nniixutta ahu. Niireke mooriipiwa murima mwaha wa etthu yoohiloka mwiirihinwe anyu ni mutthu mwamuroromela anyu vanceene? Woonasa wene, mooriipiwa murima mwaha woowi moohiyana ni mutthu mwaanamorarananyu, aahiiso moomwalana ni mwaarinyu wala iyanyu, nave-tho oohiya omurumeela Yehova. Munna mmosa yoowo amwaarawe amuraruwenle ni omwalana, onihimya so: “Nkaakupali wiira etthu ele yaakiiraneela miyo. Khula okathi kaaniriipiwa murima, onanariwa ni nkaixoona okhalana efaita”. Akhala wiira mutthu mwamphenta anyu oowiirihani etthu yoohiloka, mukupaliki wiira Yehova khonikhala-khala oonyanyalakani. Munna owo onincererya ohimyaka so: “Kihiixutta wiira, khahiyo khula okathi atthu anrowa okhalaka oororomeleya wa hiyo, masi nihaana omuroromela Yehova khula okathi. Moohicikha etthu enrowa oniiraneela, khula okathi owo onrowa onikhaliheryaka. Yehova khonaanyanyala arumeyi awe oororomeleya”. (Esal. 37:28) Ohiya-vo, muhiliyale wiira Yehova onnoophentani vanceene ovikana niphento na khula pinaatamu. Ti woowereya okathi nniirihiwa ahu etthu yoohiloka ni mutthu namphenta ahu vanceene. Yehova khonturuka enamuna oniwoonelaweni, owo onnoophentani. (aRom. 8:38, 39) Etthu muhinreerela anyu oliyala tiila: Moohicikha enamuna atthu akina anoothokoreryayani, Tiithi anyu a wiirimu onnoophentani.

14. Yooleiherya xeeni eri Esaalimu 34:18?

¹⁴ Akhala wiira muhiirihiwa etthu yoohiloka ni mutthu mwamphenta anyu, moolumo a Davidi ari Esaalimu 34:18, pooti woomaalihani. (Musome.) Ereferensia emosa elavulaka sa “ale akhulumunwe”, enitthokiherya wiira atthu awo aniixoona ntoko mutthu ohirina nlipelelo. Yehova onaakhaliherya sai atthu aniixoona siiso? Owo “ori vakhiviru” naawo. Yehova ori ntoko paapa aahiiso maama onimmaaliha mwanawe okathi oninla awe. Okathi ninriipiwa ahu murima mwaha wa mutthu namphenta ahu oniirinhe etthu yoohiloka aahiiso oninyanyanle, Yehova onnoona owerya onniphwanya ni onninikhaliherya moowaakuveya. Tiithi ahu Yehova, onninimaaliha okathi ninriipiwa ahu murima ni vaavo nnuupuwela ahu wiira khanrina efaita. Owo onninivaha itthu sinceene ohela muhina nlipelelo nahu na muhoolo, nenlo ninnikhaliherya ovilela mixankiho. — Yes. 65:17.

YEHOVA ONNOONA OKATHI MUNINLA ANYU MWAHA WOOWEREIWA

15. Exeeni yaamwiirinhe mwene Ezekiya oriipiwa murima mpakha wunla?

¹⁵ Orina ene iyaakha 39, mwene Ezekiya a oYuda, aahiwereiwa vanceene onahala okhwa. Profeta Yesaya, aahimuleela Ezekiya muhupi wa Yehova, yoowo waahimya wiira yena aamookhwa. (2 Mam. 20:1) Okathi Ezekiya aiwale awe eyo, khaareere oriipiwa murima ni aahinla vanceene. Owo aahimuxonttela vanceene Yehova wiira omukhaliherye. — 2 Mam. 20:2, 3.

16. Exeeni Yehova aapanke awe nuumala Ezekiya omuxonttela inlaka?

¹⁶ Okathi Yehova aiwale awe nivekelo ni woona maithori a Ezekiya, owo aahimoonela othunku, mpakha ohimya so: “Kihiiwa ovekela wanyu. Nave kihoona wunla wanyu. Miyo kinimoopenuxani”. Omurumeelaka Profeta Yesaya, Yehova aahimuleela Ezekiya wiira aamuncererya okumi awe ni aamoopola oYerusalemu mmatatani mwa aSiria. — 2 Mam. 20:4-6.

17. Yehova onnimaaliha sai okathi ninkhalana ahu oretta, onikhala ntoko wiira khaninrowa openuwa? (Esaalimu 41:3) (Nwehe efootu.)

¹⁷ Etthu nniixutta ahu. Exeeni mukhanle anyu oopaka, vakhala wiira mookhalana oretta onikhala ntoko wiira khamunrowa openuwa? Mmuleeleke Yehova itthu sootheene sinooxankihani, owo onimoowiriyanani hata okathi yoole muninvekela anyu munlaka. Biibiliya onihimya wiira Yehova “Tiithi oomoriwa ikharari vanceene, ni Muluku onnimaaliha mwa mikhalelo sotheene”, owo onoonimaaliha wa khula muxankiho onniphwanya. (2 aKor. 1:3, 4) Nihilipeleleke wiira Yehova onoomaliha mixankiho sahu sootheene olumwenku ola wootakhala, masi nikupaliki wiira owo onoonikhaliherya okathi wootheene. (Musome Esaalimu 41:3.) Orumeelaka munepa awe woowaarya, Yehova onoonivaha ikuru, osuwela ni murettele wiira niwerye ovilela. (Mir. 18:14; aFil. 4:13) Nave owo onninimaaliha onivahaka nlipelelo noowi muhoolo khuuvo onrowa ohimyaka wiira miyo ka muretta. — Yes. 33:24.

18. Yoolepa xeeni yookhalihenryeni ovilela okathi mwaarina anyu muxankiho ni muhinoona yoopaka? (Nwehe ekaaxa eni: “Soolepa Sikhanle Oonimaaliha Okathi Nninla Ahu”.)

¹⁸ Etthu Yehova aamulenle awe Ezekiya yaahimulipiha vanceene. Mwa enamuna emosa-ru, nnoowerya ophwanya nimaaliho na Yehova okathi nimmusoma ahu Biibiliya. Okathi ninriipiwa ahu murima, Nuulumo na Yehova pooti onlipiha ni onikhaliherya okhala oomaaleleya. (aRom. 15:4) Murokora mmosa a wÁfrica oCidental, nuumala ophwanyaniwa oretta wa Kanser aaninla vanceene. Owo onihimya so: “Yoolepa emosa enikimaaliha, Yesaya 26:3. Nnaamwi ikwaha sikina kihiweryaka omaliha mixankiho saka, eversiikulu ela ennikimaaliha ni okikhaliherya ovilela khula muxankiho onkiphwanya”. Niireke yookhala yoolepa, munoona anyu wiira ennoomaalihani okathi munkhalana anyu mixankiho sookhulumula vanceene?

19. Itthu xeeni ninlipelela ahu wiiraneya?

¹⁹ Wanikisa wa olumwenku ola wootakhala ori vakhiviru, nto ninnilipelela wuncerereya mixankiho seiyo sinniiriha woona owereya ni wunla. Ntoko niwenhe ahu ntakiheryo na Ana, Davidi ni mwene Ezekiya, Yehova onniniweha okathi nninla ahu ni onniriipiwa murima. Owo onniniphenta mwaha woohihiya ororomeleya wa yena nnaamwi ikwaha sikina siniphwanyaka mixankiho sinniiriha wunla. Vaavo sinniphwanya aya mixankiho, nihaana omuleela Yehova. Nihiivalaanyeke ni anna ni arokora a mmulokoni. Nave nihihiye omusoma Biibiliya wiira niphwanye nimaaliho na Yehova. Nikupaliki wiira naahihiye omurumeela Yehova moororomeleya, owo onoonireeliha. Mareeliho awo, anihela muhina yooleiherya ya Yehova yoowi muhoolo, owo onoopuputtha maithori ahu ootheene yaawo nninla ahu mwaha wooriipiwa murima, wiireliwa etthu yoohiloka nuule namphenta ahu ni mwaha woohoona etthu yoopaka okathi ninwereiwa ahu. (Wiis. 21:4) Nto okathi owo, ninrowa omoroxaka maithori mwaha wa ohakalala.