MYAHA SA ARKIVO AHU

“Ehikhale Etthu Valaponi Enrowa Woohiihani!”

WAARI mwaakha wa 1931. Ohoolo wa esalau ya eteatru Pleyel, oParis, anniphiya atthu anikhuma ilapo 23. Itaxi suulupale sinnaahiya atthu oophwaneliwa vamukhora, nto moohipisa atthu oowiiraka 3.000 annisareya musalau-mme. Kharwenle oweha espetaakulu, masi arwiiye onwiriyana Joseph F. Rutherford, yoowo okathi ole aahoolela muteko woolaleerya wa otthokeya wahu. Myaha sawe sinitaphuleliwa mwa nttaava na eFrances, Alemão, ni ePolaco. Namalwe a nsu na Munna Rutherford onniiwanyeya musalau motheene.

Kongresu ole a oParis, waari okathi wa vameekhaaya waarukununxe muteko woolaleerya oFrança. Munna Rutherford aahaalattula atthu otheene yaarwiiye, vanceenexa amiravo, orumeela ntoko makolportore (mapioneero) oFrança. Munna mmosa okathi ole aari mmiravo, yoowo aakhuma wInglaterra, aitthaniwa John Cooke, khoniliyala moolumo ale ootumererya oowi: “Ehikhale etthu valaponi enrowa woohiihani, nyuwo amiravo, orumeela ntoko makolportore!”a

Anceene yaahaakhulela nlattulo nno, ohiya paahi John Cooke, yoowo muhoolo aakenle omisionaario. (Mit. 16:9, 10) Tthiri, nummuru na makolportore oFrança naahincerereya okhuma 27, mwaakha wa 1930 mpakha 104, mwaakha wa 1931. Owo waari mwaattelo muulupale mookathi wa mwaakha mmosa paahi! Okhala wira mapioneero manceene okathi ole khiyaalavula eFrances, nto yaarowa oxintta sai mixankiho sa ohisuwela nttaava, othoiwa itthu, ni orakamela owaani?

OVILELA MIXANKIHO SA NTTAAVA

Okathi ole, makolportore yaakhuma ilapo sikina yaaroromela ikartau sa olaleerya, wira yaasuwelihe atthu nlipelelo na Omwene. Munna mmosa onilavula Alemão, yoowo aarumeela oParis, onnuupuwelela: “Hiyo naanisuwela wira Muluku ahu toowerya. Masi akhala wira ikwaha sikina naanoova mpakha masu onitipa, khahiyo waari mwaha wa omoova pinaatamu, masi noova oliyala moolumo vakhaani yaalempwe so: ‘Voulez-vous lire cette carte, s’il vous plaît? [Xontte musome muhupi ola ori vakartawuni-va.]’ Hiyo naanisuwela tthiri wira muteko ahu waari wootepa otthuneya”.

Okathi yaalaleerya aya mpredio, ikwaha sinceene makolportore yanoomoliwa ni ale aniweherya ipredio. Nihiku nimosa, axirokora anli a wInglaterra, yaawo yahaasuwela saana eFrances, yaahimphwanya mulopwana mmosa oniweherya epredio oonanariwa vanceene. Owo aahaakoha ti pani yaaphavela aya olavulana. Axirokora ale yaaneererya ommaaliha mulopwana ola oonanariwa, nto murokora mmosa aahiweha masu yaalempwe vamukhora, yiira: “Tournez le bouton [Muttapunye eputau]”. Nto murokora uupuwelaka wira nle naari nsina na mwaneene etthoko, ahaakhula moohakalala, oriki: “Xontte, naarwiiye olavula ni Muhano ‘Tournez le bouton’”. Okhala oohakalala wanaakhaliherya makolportore ale a nthiti!

OTHOIWA NI ORAKAMELA OWAANI KHIWAAHIIHALE

Okathi ole, anamunceene oFrança yaari oohaawa, nave-tho makolportore yaakhuma ilapo sikina yaanihaawa. Murokora mmosa aalavula enkelexi, oniitthaniwa Mona Brzoska, onnuupuwelela voohimya sa ele yaamwiiranenle yena ni mpatthani awe: “Enupa yaakhala ahu yaari yoohaawasa, nto muxankiho mmosa naarina ahu waari oriirya, yaphiya eyiita. Ikwaha sinceene naarupa ekwaartu yoriirya vanceene yaapakeya egelo muxirini, nto nahaana oruweya egelo mmaasini wira nikuseke vosiisu”. Niireke mapioneero ale yaahitthikela ottuli mwaha woothoiwa? Nnaari! Mmosa a yaawo onihimya so: “Hiyo khinaarina etthu, masi khinaathoiwa etthu”.​—Math. 6:33.

Makolportore ale oolipa murima yahaana ovilela orakamela owaani. Iyaakha iye, anamalaleerya oFrança khiyaavikana 700, ni anamunceene yaakhala mapuro oorakamela. Exeeni yaakhaliherya makolportore ale yaakhala ottaiwene ovikaniha ohakalala? Mona, yoowo aarina muxankiho mmosaru ni mpatthani awe, onnitthokiherya oriki: “Etthu yaanikhaliherya waari osoma hoothe iliivuru sa Sociedade. Okhala wira okathi ole khinaatthikela waaxukurya atthu ni khiniiriha soosoma sa Biibiliya, nto ohiyu nanaalepela ipaphelo amusi ahu ni mapioneero makina, wira nileelaneke sookumanana sahu ni nilipihaneke mukina ni mukhwaawe”.​—1 aTes. 5:11.

Makolportore ale owiivahererya ni murima wotheene yaanikhalana moonelo wooloka, nnaamwi yaarina mixankiho. Ela ennooneya vaavo vanisommwa aya ipaphelo yaalepela aya ofiliyaali, iyaakha sinceene nuumala olaleerya ntoko mapioneero oFrança. Uupuwelelaka iyaakha iyo, Annie Cregeen, murokora mmosa oowoottihiwa, yoowo eettale elapo yotheene ya oFrança ni iyawe okhuma mwaakha wa 1931 mpakha 1935, olempe so: “Okumi ahu waari woohakalaliha ni wowaatteliwa miteko! Naaniiraana ntoko mapioneero. Ntoko murummwa Paulo ohimyale awe, ‘Miyo kiphatteiye miri, Apolo khukhuwariki mir’iyo, nto Muluku t’ìmihale’. Ninnihakalala vanceene eparakha yaarina ahu ya waakhaliherya atthu iyaakha sinceene ottuli”.​—1 aKor. 3:6.

Mapioneero ale a khalai aahiya ntakiheryo nooloka na ovilela ni nthiti, wa ale aniphavela wuncererya muteko aya woolaleerya. Olelo-va, mapioneero 14.000 annilaleerya oFrança. Anceene a yaawo annikhaliherya miloko sirina igrupu sinilavula mattaava makina.b Ntoko makolportore ale a khalai, awo khaneemererya etthu valaponi wira yaahiihe!​—Myaha sa arkivo ahu oFrança.

[Inoota]