Nilokiherye Inamuna Sahu Soolaleerya: Moota Womulaleerya Mutthu Onilavula Nttaava Nikina

Otthuneya Waya: Yehova oniphavela wira “atthu a nloko ti nloko” akhaliheriwe momunepani. (Mit. 10:34, 35) Yesu aahimyale wira ihapari sooreera saarowa olaleiwa “mulaponi mothene” ni wa “maloko othene”. (Math. 24:14) Nave, Zakariya aahihimya wira atthu a mattaava ni “a maloko othene” yaarowa weemya ihapari sooreera. (Zak. 8:23) Moovarihana ni oloha wa murummwa Yohani, ale anrowa woopowa okathi wa maxakha maalupale, anrowa okhala atthu “a maloko othene ni a mahimo othene ni a malavulelo othene”. (Wis. 7:9, 13, 14) Nto, vaavo nnimphwanya ahu mutthu onilavula nttaava nikina mmuttettheni mwahu, nihaana wiimananihaka omulaleerya.

Moota Woopaka Eyo:

• Mwiilokiheryeke. Mwaarowaka olaleerya, mukuxeke elivirinyu eni: Boas Novas para Pessoas de Todas as Nações. Mulimaleleke malakiheryo ari epaaxina 2 ani: “Moota Woomukhaliherya Mutthu Onilavula Nttaava Nikina”. Mubaxari va jw.org eviidiyu wala eliivuru ya mattaava akhanle anyu oophwanya mmuttettheni, ni muhele muselulareni mwanyu. Mmurumeeleke JW Language wira mwiixutte moolumo vakhaani a mattaava oovirikana. Akhala wira muttetthe owo onnilaleeriwa ni miloko sa mattaava oovirikana, mukuxeke paahi iliivuru sa nttaava na muloko anyu. Masi, mwaalaleeryaka mapuro otheene ari atthu ni anilavuliwa mattaava manceene, mukuxeke iliivuru sa mattaava a atthu awo.

• Mwamphwanya mutthu ohinlavula nttaava nanyu, mwiimananihe omuleela “miteko sulupale sa Muluku” mwa nttaava nawe. (Mit. 2:11) Mmooniherye moota woovolowa va jw.org a nttaava nawe wira ophwanye soohimmwa sikina. Akhala wira onnisiveliwa ekeekhai, mmalelihe olepa eformulaario Queira Visitar (S-43-T), ni munvahererye sekretaario a muloko anyu. Nvikanihe omukhaliherya mpakha okhumela munna onilavula nttaava nawe.

Mweererye Ela Mweeri Yoola:

• Okathi wa Omulompa Muluku Vatthokoni, mwinsayariki moota womulaleerya mutthu ohinlavula nttaava nanyu.