Ekeekhai ya Omwene—Okawela Yoolya Yomunepani

NIIRE vano nyuwo muniweha maitho awe ole onimusomiha anyu Biibiliya khiyoona wira annaarya mwaha wowiiwexexa yoolepa emanle anyu osoma hoothe. Vakhaani-vakhani owo onihimya so, “Munihimya wira Biibiliya oniixuttiha tthiri wira vanniweryaneya mutthu okhala mParayiisu mahiku otheene, kiire so, valaponi vaava?” Nto ole onilaleeryana anyu onnitheya khuyahimya so: “Kimphavela wookohani ela: moonaleni mBiibiliyani?”. Oryeene oohakalala ni ootikinihiwa, ole onimusoma Biibiliya onnittihinya muru awe ohimyaka so: “Vanikhala ntoko wira khahiyo ekeekhai, nkinaiwe etthu siisa okhuma khalai”. Nto nyuwo munnuupuwela wira owo ootoko ohimya etthu emosaru eyo isumana vakhaani sivinre, okathi aapacenrye awe wiixutta wira nsina na Muluku ti Yehova.

Niireke yootoko owiiraneelani etthu ntoko eyo? Arumeyi anceene a Muluku yootoko owiiraneela. Osuwela ekeekhai eri etthu emosa mwa itthu vakhaani paahi sinniiriha woona eparakha yuulupale evahiwa ahu! Vano nkeemelani nto muupuwele so: Eparakha ela khiphwannye sai? Tivonto epantte ela enoonikhaliherya ovarerya nikoho nlo. Moota arumeyi a Muluku sivinre aya yinnuuheryaka wiiwexexa waya myaha somunepani, yowooniherya yuulupale yoowi Omwene wa Muluku wookhala tthiri. Mwa iseekulu sinci, Mwene a Omwene owo onnipaka etthu piitthu wira atthu a Muluku axutteke ekeekhai.