Waamini Wuulupale wa Mukhulupale Aanakhotto

Nuumala Yesu olavula Mwaha awe Vamwaako, aahirowa epooma ya oKafarnawu. Nto makhulupale aaYuda yahimwaattamela. Atthu awo yaarummwale ni mutthu muulupale, niire so, mukhulupale aanakhotto ooRoma.

Murumeyi amphentexa awe aahiwereiwa vanceene onahala okhwa. Nnaamwi ahaakhanle muYuda, mukhulupale ole aaniphavela okhaliheriwa ni Yesu. Nto aYuda yaahimuleela Yesu wira murumeyi a mukhulupale ole “ororakala: kharere ohawa”, ni woonasa wene, iira oonaka owereya vanceene. (Matheyo 8:6) Makhulupale aaYuda yaahimuthipelela Yesu wira mukhulupale ole aaniphwanela okhaliheriwa ariki: “Owo onniphenta nloko nahu: ti yowo onitekenle emp’ahu y’othukumana”.​—Luka 7:4, 5.

Moohipisa, Yesu aahirowa ni atthu ale owannyawe mukhulupale ole aanakhotto. Vaavo Yesu aattamela awe, mukhulupale ole aahaaruma apatthani awe omuleela Yesu wira: “Pwiya, muhukhuwé, mana miyo nkimphwanela wira mukelé mpa mwaka, nnákhala nkisònne ophwanela orowa okumana ni nyuwo”. (Luka 7:6, 7) Masu ala annooniherya wiiyeviha wuulupale wa mulopwana ole! Nave annooniherya wira mulopwana ole aahivirikana ni aRoma yaawo yaahasula ipottha saya.​—Matheyo 8:9.

Mukhulupale ole, aanisuwela wira aYuda khiyaaphavela atthu yahaakhanle aYuda. (Miteko 10:28) Woonasa wene, uupuwelaka eyo, mukhulupale ole aahaaleela apatthani awe omuxonttela Yesu wira: “Vano mulavule pahi: murumeyi aka onovona”.​—Luka 7:7.

Iiwaka siiso, Yesu aahitikinihiwa ni aahimuttottopela oriki: “Vekekhai, nnákhala mw’atthu a Isarayeli nkiphwannye wamini nno wulupale”. (Luka 7:9) Atthikelaka owannyawe mukhulupale ole, apatthani awe yaahoona wira murumeyi ole aawereiwa aahivona.

Nuumala ompenuxa murumeyi ole, Yesu aahittottela mureerelo wira owooniherye atthu oowaamini yahaakhanle aYuda, wira yaamwaakhela mareeliho. Yesu aahimmye so: “Atthu anjene animorwa onikhuma nsuwa n’unikelaya, ekilathi vamosá n’Abrahamu n’Isakhi ni Yakobe, elyeke vamesa Momweneni wa wirimu”. Ankhi aYuda ale oohaamini? Yesu aahimmye wira awo “anrowa womoleliwa otá, wepiphini, weiwo wokhala-wo wunla n’ulumanyiha maino”.​—Matheyo 8:11, 12.

Tivonto, okhala wira aYuda axineene khiyeemerenrye eparakha yaavahiwa aya wanipacerya ya wiirela mpantta Omwene wa Kristu, anrowa okhoottiwa. Masi Amalapo aahiiso atthu oohikhala aYuda, anrowa okilaathi vameesa vawe, eyo piiyo, “Momweneni wa wirimu”.