Nimurumeele Muluku Moororomeleya Hata Nihaawaka Vanceene
“Hiyo nihana ovira mohawani munjene, wira nikele momweneni mwa Muluku”.—MIT. 14:22.
MWAAROWA WAAKHULA SAI?
Ti pani onikumiherya maxakha anniphwanya?
Ninrowa wiilokiherya sai mwaha wa mixankiho sinrowa okhumelela muhoolo ni omalamaliha okhulumuwa?
Etthuvo xeeni enirowa aya ovahiwa atthu ale anrowa ovilela olupatthiwa?
1. Xeeni ohaawa ohikhanle aya etthu enaatukutha arumeyi a Muluku?
NIIREKE nyuwo munnitukutheya vaavo vaniiwa anyu wira “nihana ovira mohawani munjene” nihinatthi ophwanya etthuvo ya okumi woohimala? Woonasa wene nnaari. Hata mpacenrye ene niinano omurumeela Yehova wala mpacenrye ene khalai, nyuwo moosuwela wira mixankiho siniirela mpantta makhalelo a olumwenku ola wa Satana.—Wis. 12:12.
2. (a) Ohiya mixankiho sinimakela waakhumelela apinaatamu otheene oohimalela, maxakha xeeni anaakhumelela maKristau? (Nwehe elatarato yoopacerya.) (b) Ti pani onikumiherya mixankiho iyo sotheene, nto hiyo ninsuwela sai?
2 Ohiya mixankiho ‘sinimakela waakhumelela atthu’, maKristau aakhalana mixankiho sa enamuna ekina. (1 aKor. 10:13) Mixankiho xeeni? Olupatthiwa wuulupale mwaha wa wiiwelela waya malamulo a Muluku moohittikinyeya. Yesu aahaahimeerya awiixutti awe wira: “Khavo murumeyi okhanle mulupale onvikana pwiy’awe. Ale yakilupantthe miyo, animolupatthani-tho nyuwo”. (Yoh. 15:20) Ti pani onikumiherya olupatthiwa iwo wotheene? Owo onnisuweliwa okhala Satana, yoowo Biibiliya onimuhimya awe okhala “kharamu onòpa murukulu” yoowo ‘omphavela wakhura’ atthu a Muluku. (1 Ped. 5:8) Satana onnimananiha orumeela khula etthu eniwerya awe wira ohonone ororomeleya wa awiixutti a Yesu. Muthokorerye ele yaamukhumelenle murummwa Paulo.
OHAAXIWA OLISTRA
3-5. (a) Maxakha xeeni yamphwannye Paulo oListra? (b) Mwa enamuna xeeni masu a Paulo voohimya sa ohaawa waarowa okhumelela muhoolo yaari aya oolipiha?
3 Ikwaha sinceene, Paulo aanilupatthiwa mwaha wa omwaamini wawe Muluku. (2 aKor. 11:23-27) Yowiiraneya emosa ya olupatthiwa wa Paulo yaakhumelenle oListra. Nuumala ompenuxa mulopwana mmosa aari oorakala okhuma oyariwa wene, Paulo ni mwaapara awe Baarnaba yaahikokhoreliwa ntoko amuluku. Oowanli aya yaahaxonttela atthu ale wira ahaakokhoreleke! Masi moohipisa, yaahikhumelela atthu yaanyokha aYuda, nto arumeelaka itthu sowoothiwa yaahipahula muupuwelo wa muttitthi ole wa atthu. Naananoru yaahaarukunuwela! Muttitthi ole waahipacerya onvonyakasa maluku Paulo khumuhiya ohalaka vakhaani okhwa.—Mit. 14:8-19.
4 Nuumala oxekurya muttetthe wa oDerbe, Paulo ni Baarnaba “yahihokolowela oListra ni wIkonio ni wAntiyokiya w’oPisidia. Awo yanalipiha eroho ale yamini, yanatumererya wira ekhaleleke nthiti wettela wamini waya, yahimeryaka wira: ‘Hiyo nihana ovira mohawani munjene, wira nikele momweneni mwa Muluku’”. (Mit. 14:21, 22) Wanipacerya nyuwo pooti ohiiwexexa masu ala. Ohiya-vo, waaleela wira yaarowa “ovira mohawani munjene” waarowa waakhulumula ohiya waalipiha anna ale. Vaniweryaneya sai ohimmwaka wira Paulo ni Baarnaba “yanalipiha” awiixutti ariki yaaleela wira wamwaakhumelela ohaawa wunceene?
5 Nnoowerya ophwanya waakhuliwa wa nikoho nlo vakhala wira nnoovarerya saana masu a Paulo. Owo khaahimmye wira: “Hiyo nihaana ovilela ohaawa wunceene” paahi. Ohiya-vo owo aahimmye so: “Hiyo nihana ovira mohawani munjene, wira nikele momweneni mwa Muluku”. Tthiri Paulo aahaalipiha awiixutti ale mwaha woottittimiherya yookhumelela yooloka ya okhala oororomeleya. Etthuvo ele yaari etthu ya ekeekhai. Maana Yesu aahihimya wira: “Nto, ole onrowa ovilela mpakha omaliherya, onimòpowa”.—Math. 10:22.
6. Etthuvo xeeni esukeriwe aya ale anrowa ovilela mpakha wanikisa?
6 Vakhala wira hiyo nnoovilela, nnimwaakhela etthuvo. Wa maKristau ale oowoottihiwa etthuvo aya ti ekumi ehinikhwiwa wiirimu weiwo onirowa aya olamulelaka vamosa ni Yesu. Wa “ipwittipwitthi sikina”, etthuvo eyo enitaphulela ekumi yoohimala valaponi, yeeyo “eryaya-mo exariya”. (Yoh. 10:16; 2 Ped. 3:13) Ntoko Paulo sihimyale awe, eriyari eyo hiyo nnoovira mohaawani munceene. Vano nrowe nithokorerye inamuna piili sa ohaawa iwo okhanle ooniphwanya.
OTUPHELIWA MOOLULUWANYA
7. Enamuna xeeni ya ohaaxiwa enihimmwa okhala olupatthiwa mooluluwanya?
7 Yesu aahihimya vahinatthi wira: “Munoroihiwa omilattuni, munomaniwa mpani mothukumana, munoroihiwa oholo wa mamwene n’uholo wa makhulupale a mulaponi”. (Mar. 13:9) Ntoko masu ala sinihimya aya, olupatthiwa wa maKristau makina waarowa ohela muhina ohasuliwa wa weerutthuni, owehasa wene mmatatani mwa makhulupale a etiini ni anapoliitika. (Mit. 5:27, 28) Nkahaya mutthikele othokorerya ntakiheryo na Paulo. Niireke owo aanitukutheya mwaha wa olupatthiwa wa enamuna eyo. Nnakhala vakhaani.—Musome Miteko 20:22, 23.
8, 9. Moota xeeni Paulo oonihenrye awe wira aari oolikana ene ovilela khula etthu yaarowa omukhumelela, ankhi anna a mahiku ala yoonihenrye sai olikanela waya ovilela khula etthu?
8 Paulo moolipa murima aahiwerya oxintta khula enamuna ya olupattha wooluluwanya wa Satana ni khuhimya so: “Masi miyo kinona wira okumi aka khuhiy’etthu, hatá kinnithanya, kaweryaru ophera mukwasu ni omaliha muteko kivahiwaka n’Apwiya Yesu: eyo p’iyo, olaleya ehapari yorera, wira Muluku onniniphenta”. (Mit. 20:24) Eyo ennooniherya saana wira Paulo khaatukuthenye mwaha wa olupatthiwa waarowa omukhumelela. Ohiya-vo owo aari oolikana ene ovilela khula etthu yaarowa omukhumelela. Etthu yuulupale yaaphavelexa awe opaka waari “omaliha muteko” woolaleerya ihapari, hata samphwanya mixankiho sinceene.
9 Olelo-va, anna ni arokora anceene aakhalana yoolakela emosaru yeele yaarina awe Paulo. Mwa ntakiheryo, elapo emosa Anamoona aaviriha iyaakha 20, amakelaka otthukweliwa mwaha wa ohiirela waya mpantta myaha sa epoliitika. Milattu saya khisaatonko ophukiwa otribunaali okhala wira elapo ele khiyaarina marehereryo a enamuna yoowaakhapelela atthu ale ahinitthuna orowa etoropa mwaha wa yoowuupuxerya aya ya murima. Okathi awo yaari aya mukhatteya, yaanikhoottiheriwa oxukuriwa ni amusi, akina yaanimaniwa ni akina yaanihooxiwa mwa inamuna soovirikana.
10. Xeeni vahintthuneya ahu woovaka otupheliwa wooluluwanya ni mootutuxerya?
10 Annihu a mapuro makina onnaakhumelela olupatthiwa mootutuxerya. Nto vakhala wira eyo ennookhumelelani nyuwo, muhitukutheye wala okhala owoova. Mmuupuwele Yosefe. Owo aahitumihiwa wira akhale epottha, masi Yehova aahimwaakiherya “mohawani mwawe mothene”. (Mit. 7:9, 10) Yehova onoowerya wookhaliheryani-tho. Muhiliyale wira Yehova ‘onniwerya owakiherya sotakhala atthu òrera murima’. (2 Ped. 2:9) Niireke nyuwo munoovikaniha omuroromela Yehova, mwaha woosuwela wira owo onoowerya owoopolani mukhalelo ola wa itthu ni wookhaliheryani ophwanya ekumi yoohimala Momweneni mwawe? Nyuwo mookhalana mathowa manceene oomuroromela yena ni owanana olupatthiwa moolipa murima.—1 Ped. 5:8, 9.
OTUPHELIWA ORUMEELIWAKA OLAVILAVI
11. Moota xeeni otuphela wa olavilavi wa Satana onivirikana aya ni otuphela wawe wooluluwanya?
11 Enamuna ekina ya olupatthiwa yeeyo ekhanle oonikhumelela ti ele enihela muhina olavilavi. Enamuna ela enivirikana sai ni otupheliwa wooluluwanya? Otupheliwa wooluluwanya onikhala mwa eyuupuri enipwanyula empa ya mutthu moohipisa. Masi otupheliwa wa olavilavi onilikana ni oweexe yoowo onilya muhina-hina miri sa empa anyu mpakha omora. Onnivira okathi munceene mutthu ohisuwelaka wira empa awe ennilyiwa oweexe, nto okathi onoonela awe eniira ehalaka omora.
12. (a) Enamuna xeeni ya olavilavi Satana onirumeela awe, ni exeeni eniiriha okhumela saana? (b) Okhulumuwa waamuhasunle sai Paulo?
12 Satana onrowa omananiha opwetexa wataana wanyu ni Yehova, orumeelaka inamuna sooluluwanya, olupatthiwa ni amusi, wala otteettheiha nroromelo nanyu orumeelaka otuphela wa olavilavi. Enamuna yuulupale Satana enirumeela awe ti omukhulumula mutthu. Murummwa Paulo aahihimya wira okathi mukina aanikhala ookhulumuwa. (Mmusome aRoma 7:21-24.) Nto, xeeni Paulo yoowo aari mutthu “ookhoomala” omunepani, iirela mpantta nikhuuru noolamulela na eseekulu yoopacerya, iihimya awe okhala mutthu “otakhaliwa!”? Paulo aahilavula mwa enamuna eyo mwaha wookhala mutthu oohimalela. Owo aaniphavela tthiri opaka itthu sooloka, masi saahikhala ikuru sikina saamukhanyererya opaka itthu sahaamusivela. Vakhala wira okathi mukina munnikhalana muupuwelelo owo, khamunoona wira masu ala toolipiha osuwela wira hata Paulo aahikhalana muxankiho mmosaru?
13, 14. (a) Etthu xeeni eniiriha wira atthu akina a Muluku akhaleke ookhulumuwa? (b) Ti pani oniphavela opwetexa waamini wanyu, ni nthowa xeeni?
13 Okathi mukina, anna ni arokora anceene annikhala ookhulumuwa, ooxanka, hata okathi mukina anniixoona ohikhalana efaita. Mwa ntakiheryo, murokora mmosa, pioneera yoowo onrowa ahu omwiirelaka Débora onihimya so: “Khula okathi, kinuupuwelaka itthu soohiloka kaapanke aka khalai, onnikiiriha woonaka wira nkilonke. Vaavo vanuupuwelaka khula etthu yoohiloka enipaka aka, eyo ennikiiriha woonaka wira khuuvo mutthu onrowa okiphenta, hata Yehova”.
14 Exeeni eniwiiriha atthu akina a nthiti mmutekoni mwa Yehova ntoko Débora okhala ookhulumuwa? Aakhala mathowa manceene. Atthu akina waakuva okhalana muupuwelelo woohiloka mwaha wa makhalelo aya a mweekumini. (Mir. 15:15) Atthu annikhalana muupuwelelo woohiloka mwaha wa oretta wa mmuupuweloni. Khula etthu enikumiherya muupuwelelo owo, muupuweleke wira ookhala oniphavela orumeela makhalelo awo wira onikhulumule. Nto ti pani oniphavela wira hiyo nikhulumuwe wira nooceele ovara muteko ahu? Ti pani oniphavela wira nyuwo mwaakhele ipahu suulupale sinirowa awe waakhela? (Wis. 20:10) Khuuvo-tho mukina omuhiya Satana. Etthu enisuwela ahu ti ela: khula enamuna Satana enirumeela awe yoolakela awe eri emosa, wira oniriipihe murima, onitteettheiha ni wira nihiye muteko ahu. Phoole muhemererye mmoroxiwaka, atthu a Muluku aniwana ekhotto ya omunepani!
15. Ninrowa wooniherya sai wira khanneemererya okhulumuliwa?
15 Mukhale oolikanela wira nwane ekhotto muhooceyaka. Nwehexexeke etthuvo eri ohoolo. Murummwa Paulo aalepenle so maKristau a oKorinto: “Tivó vahinojeyahu. Nto, vari wira erutthu ahu enrowa omalamala, masi murim’ahu onotepa wululiwa nihiku ti nihiku. Itthu sinnihaxa vathí-va, itthu soveya sinivira, nto sinniphwanyiha ovuwa wuulupale ohinimala, ompwaha vanjene sohawa sahu”.—2 aKor. 4:16, 17.
MWIILOKIHERYE MWAHA WA MAXAKHA ANIRWA MUHOOLO
16. Xeeni varya aya vootthuneya wiilokiherya nenna-va mwaha wa maxakha anirwa muhoolo?
16 Ntoko soonale ahu osulu iwe, Satana okhalana itthu sinceene sa ‘olavilavi’ sinirumeela awe. (aÉf. 6:11) Khula mmosa a hiyo onitthuneya wiiwelela miruku siri va 1 Pedru 5:9 seiyo sini: “Mmukhotteke Satan’owo, mulimpene mowaminini”. Wira niwerye opaka eyo, hiyo nihaana olokiherya naanano vaava muupuwelo ahu, nave murima ahu ohaana olimalela opaka itthu sooloka nenna-va. Nipake nlikanyiho: Atoropa anniinihiwa nikuruta noovila okathi munceene ahinatthi orowaniwa okhottoni. Anakhotto a omunepani a Yehova ahaana wira siiso. Hiyo khannisuwela iwanelo sahu sa muhoolo. Hata vari siiso, nyuwo khamunoona wira vaamureerela wiina nikuruta nooloka okathi yoola orina ahu murettele? Paulo aahaalepela aKorinto oriki: “Mukoheke murim’anyu, mòneke mwari ni wamini. Mwilamuleke mmansinyu”.—2 aKor. 13:5.
17-19. (a) Inamuna xeeni hiyo nintthuneya ahu wiitokosa mmansihu? (b) Amiravo anrowa owerya sai wiilokiherya wira yaakiherye nroromelo naya aryeene oxikola?
17 Enamuna emosa ya wiiwelela miruku sa Paulo ti wiitokosa mmansihu. Mwiikoheke makoho ntoko ala: ‘Kinnipaka mavekelo moohihiyererya? Okathi onikhanyereriwa aka opaka itthu sootakhala, kiireke kinnimwiiwelela Muluku ntoko namalamulela waahiya apinaatamu? Kiireke kinnirowa mithukumano sotheene sa mmulokoni? Miyo kinniwerya waaleela moolipa murima atthu akina ele enikupali aka? Kiireke miyo kinnimananiha waalevelela anna mwa ekeekhai ntoko awo sinikilevelela aya? Kiireke miyo kinniwiiwelela ale anihoolela mmulokoni mwaka ni ale arina muritti wa ohoolela muloko wa olumwenku wotheene?’
18 Moone wira makoho manli aromoliwe anihela muhina waakiherya sookupali sahu moolipa murima ni okhootta naakhanyereriwaka opaka itthu soohiloka ni atthu akina. Amiravo anceene annipaka eyo aryeene oxikola. Awo ahiixutta ohikhala owoova wala wuuleliwa muru itthu sinikupali aya. Ohiya-vo awo anniwerya waatthokiherya atthu akina ele enikupali aya. Irevista sahu sinnivaha malakiheryo ooloka a moota woopaka eyo. Mwa ntakiheryo, Despertai! a Julyo 2009, aahivaha malakiheryo oowi vakhala wira mwaapara anyu a oxikola onnookohani wira: “Xeeni nyuwo vahinikupali anyu wira atthu aroothatuwa?” nyuwo pooti ohimya so: “Exeeni yaarowa okiiriha okupali eyo? Hata masientista, yaawo anooniwa okhala atthu oosuwela itthu sinceene khanikupali eyo”! Nyuwo anamuyari, mukhaleleke nthiti waaxuttiha aniinyu wira asuweleke okhootta okhanyereriwa onikhumelela oxikola.
19 Ekeekhai wira khivanikhweya okathi wotheene olavula wala opaka khula etthu enivekeliwa ahu ni Yehova. Wuumalani wa nihiku, vanitthuneya wiimananiha wira mutthu owerye orowa omuthukumanoni. Ovenya vaasiisu wira nirowe olaleerya onitthuneya ohiya manta areeraka vakhaamani. Masi muupuweleke wira: Okathi sinirowa aya okhumelela mixankiho suulupale muhoolo, nyuwo munrowa okhalana ikuru wira muxintte akhala wira muri oolipa omunepani khalairu.
20, 21. (a) Xeeni wuupuwelela yoowoopola okhanle aya oonikhaliherya oxintta muupuwelelo woohiloka? (b) Etthu xeeni ekhanle ahu oolakela opaka hata sinikhumelelaka mixankiho sinceene?
20 Ankhi okathi onitupheliwa ahu orumeeliwaka olavilavi? Ninrowa opaka exeeni wira nikhoottele muupuwelelo wookhulumula? Enamuna emosa erina owerya wuulupale enrowa onikhaliherya oxintta muxankiho owo, ti wuupuwelela yowoopola ya Yesu. Eyo ti etthu murummwa Paulo aapanke awe. Owo okathi mukina aniixoona okhala mutthu ootakhaliwa. Masi owo aanisuwela-tho wira Kristu aahikhwa, aakhwelaka atthu oottheka. Nto Paulo aari mmosa wa atthu awo. Tivonto owo aalempe awe oriki: “Ekum’ila kirinaka vano mwerutthuni, miyo kokhalana mwaha w’omwamini Mwana a Muluku, owo òkiphenta ni, ohìvahererya wokhwani mwaha wa miyo”. (aGal. 2:20) Tthiri, Paulo aanixukhurela yowoopola. Owo aanaamini wira yowoopola ele yaanimukhaliherya.
21 Muupuwelelo mmosaru aarina awe Paulo wira yowoopola yaari yoovaha ya Yehova, onoowerya wookhaliheryani nyuwo vanceene. Eyo khenitaphulela wira okhulumuwa wanyu onrowa omala naananoru. Anamunceene a hiyo anrowa owananaka inamuna sa olavilavi wa Satana mpakha okela elapo esya. Masi muupuweleke wira: Atthu yaale ahinirowa wooceya paahi tanaakhela etthuvo. Hiyo nri vakhiviru va nihiku noovuwa nenlo Omwene wa Muluku onrowa awe okumiherya murettele ni waattikiherya okhala oomalela atthu otheene oororomeleya. Mwiimananihe wira mukele Momweneni mmo, hata nviraka mohaawani munceene.