Ireferensia sa Okumi ni Orummwa Ahu Ekaderno Enirumeeliwa Omuthukumanoni
6-12 YA JULYO
MIHAKHU SINIKHUMA MBIIBILIYANI | OKHUMA 6-7
“Vano Munimoona Etthu Kinrowa Aka Omwiiriha Farawo”
it-3 epax. 16 etti. 7
Moise
Yaahikhala marukunuxo manceene ni nloko na aIsarayeli. Wanipacerya awo yaaheemererya malakiheryo yaavahiwe aya ni Moise, masi nuumala wuncereriwa muteko wookhanyereriwa yaarummwale aya ni Farawo, awo yaahixinliha mwaha wa Moise, mpakha owo oriipiwe ene murima, omuxonttela Yehova. (Okh 4:29-31; 5:19-23) Okathi ole, Muluku Oowerya Sotheene ahaalipiha aahimeeryaka wira aarowa waakhwaniherya ele Abrahamu, Isakhi ni Yakobe yaalipelela aya wiiraneya, eyo piiyo, osuwela moomalela yootaphulela ya nsina Nawe, Yehova, owoopolaka aIsarayeli ni waakhaliha nloko nuulupale Elapo Yooleiheriwa. (Okh 6:1-8) Hata vari siiso, atthu a wIsarayeli khiyaamwiiwelenle Moise. Masi vano, nuumala okhumelela epahu ya neethanu neexexe, yaahinvaha nikhaliheryo noolipa amwiiwelelaka, mpakha nuumala okhumelela epahu yookiserya ya namuloko, owo aahiwerya waatthokiha ni waahoolela wira akhume mwa enamuna yootthokiheya “n’iyuma saya s’ekhotto”.—Okh 13:18.
it-3 epax. 16 itti. 5-6
Moise
Moise ori ene ohoolo wa Farawo a wExiitu. Vano Moise ni Aroni ti yaari mihulelo sa ekhotto ya nthoonyeryo ya amuluku a wExiitu. Farawo aarumeelaka anamaxitta, woonasa wene yaahooleliwa ni Iyani vamosa ni Iyambre (2 Ti 3:8), aahaalattula anahako otheene a wExiitu wira yanvirikanye Yehova. Mwiiriirya woopacerya Aroni aapanke awe ohoolo wa Farawo, ohooleliwaka ni Moise, wahooniherya wira Yehova taari ooweryexa waavikana a muluku a wExiitu, nnaamwi Farawo aatempe wuumiha murima awe. (Okh 7:8-13) Nuumala okhumelela epahu ya neeraru, anamaxitta yaahihimya wira: “owerya nno ti wa Muluku”, awo yaahaphwanya ehasara ele mpakha waakumiha makhwatta, ni khiyaawenrye okhumelela ohoolo wa Farawo wira anvaanyihe Moise okathi yaakhumelela aya ehukhumu ele.—Okh 8:12-15; 9:10-12.
Ipahu saahikumiherya mureerelo ni Wuumiha murima. Moise ni Aroni tiyaalalen’ye ipahu 10 saakhumelenle. Ihukhumu iyo saakhumelenle sintoko saahimmwale aya, sooniheryaka wira Moise aarummwale ni Yehova. Nsina na Yehova naahilaleiwa ni naahisuweliwa vanceene wExiitu, nikumiheryaka mureerelo ni wuumiha murima, eyo piiyo, mureerelo wa aIsarayeli ni atthu akina a wExiitu; ni wuumiha murima wa Farawo, ni anamiruku awe vamosa naale yaamukhaliherya. (Okh 9:16; 11:10; 12:29-39) Atthu a wExiitu ohiya okupali wira ihukhumu iye saakhumelela mwaha woowaaveha amuluku aya, awo yaanisuwela wira aari Yehova aaphukela amuluku aya. Nuumala okhumelela epahu ya neethanu xexe, Moise nave aahikhala “òttittimihiwa vanjene wEjitu n’arumeyi a mwené n’atthu othene”.—Okh 11:3.
Otokosa Itthu sa Efaita Soomunepani
it-3 epax. 723 itti. 6-7
Oowerya Sotheene
Yehova aahirumeela mwiihaneliwo oowi “Muluku Owerya Sotheene” (ʼEl Shad·daiʹ) okathi aamuleihenrye awe Abrahamu voohimya sa oyariwa wa Isakhi, yooleiherya yeeyo Abrahamu aareerela awe okhalana waamini wuulupale wira Muluku amwaakhwaniherya yooleiherya awe. Okhuma nihiku nenne mwiihaneliwo owo waanirumeeliwa ohimmwaka Muluku, okhala yoole aarowa omureeliha Isakhi ni Yakobe ntoko atthu yaarowa waakhela mareeliho, a nivarihano na Abrahamu.—Map 17:1; 28:3; 35:11; 48:3.
Moovarihana ni yooleiherya eyo, Yehova anwerya omuleela Moise muhoolo mwaya wira: “Miyo kahakhumelela Abrahamu n’Isakhi ni Yakobe, kìsoniheryaka ntoko Muluku òwerya[beʼElʹ Shad·daiʹ]: masi nkavanhe osuwela nsina naka Apwiya[Yehova]”. (Okh 6:3) Eyo khentaphulela wira amuhavinre ale khiyaasuwela nsina na Yehova, okhala wira amuhavinre awo ni atthu akina yaakhanle khalai yaanirumeela ikwaha sinceene. (Map 4:1, 26; 14:22; 27:27; 28:16) Tthiri eliivuru ya Maphattuwelo, enilavula sa okumi wa amuhavinre a khalai, nuulumo noowi “Oowerya Sotheene”, nimphwanyaneya ikwaha 6 paahi, masi nsina na Yehova naalempwale ikwaha soowiiraka 172 mwa soolempwa sa eHeeberi sa khalai. Nnaamwi amuhavinre ale yaasuwenle mmansaya ehakhi ni ophwanelela wawe Muluku wiihaniwa okhala “Oowerya Sotheene”, awo khiyaakhalanne eparakha yoosuwela moomalela yootaphulela ya nsina nawe, Yehova ni ele yaathoonyerya aya. Elavulaka sa mwaha owo, eliivuru O Novo Dicionário da Bíblia (Evolume 1, epax. 411) eni: “Osuwelihiwa woopacerya wa amuhavinre ale mwiihaneliwo owo, waahimya itthu saarowa wiiraneya muhoolo tivo vaareerela aya tthiri olipiheriwa wira Owo, Yahweh aari Muluku (ʼel) aawerya (shadday) omaleliha sooleiherya sawe. Nave osuwelihiwa wiiraneyale vamwirini waavarela mooro, ti waari wuulupale ni woovara murima okhala wira owerya ni okhumelela wa Muluku moowakuveya ni moohihiyererya eriyari aya, naahiheliwa muhina nsina yaasuwela aya na Yahweh.”—Elempwale ni J. D. Douglas, 1980.
it-3 epax. 16 etti. 2
Moise
Moise kheemereriwe ohiya muteko ole mwaha wa woova paahi. Masi Moise aahimmye wira aamoova, ottittimiheryaka wira khaasuwela olavula oratteene. Vano owo aari Moise oovirikana, nuule wanipacerya iivaherenrye ni murima awe wotheene ntoko mulipa aarowa owoopola aIsarayeli mwa iyaakha 40 muttuli. Owo aahimuthipelela Yehova, onvekelaka wira ohimurume yena. Nnaamwi eyo yaakumihenrye onanariwa wa Muluku, Owo khaamukhoottale Moise, masi aahinvahererya munna awe Aroni, yoowo aarowa olavulaka nipuro nawe. Sintoko siisaale Moise aalavula awe nipuro na Muluku, nave Moise aahikhala ntoko “Muluku” ohoolo wa Aroni yoowo aalavula nipuro na Moise. Okathi yaathukumanne aya ni axitokweene a wIsarayeli ni okathi yaaronwe aya okumana ni Farawo, vanikhala ntoko wira Muluku aaninvaha Moise malakiheryo ni malamulo, nave Moise onamuleela Aroni, nave Aroni onalavula ni Farawo (yoowo aamuranttenle Farawo yoole Moise aamutthyanwe awe mwa iyaakha 40 muttuli). (Okh 2:23; 4:10-17) Nuuvira okathi, Yehova aahimwiitthana Aroni okhala “profeta” a Moise, ophavelaka ohimya wira, sintoko siisaale Moise aari awe profeta a Muluku eettihiwa aka Nuuwo, siiso Aroni ahaana weettihiwa nave ni Moise. Nave Moise aahileeliwa wira owo aari ntoko “Muluku oholo wa mwené[Farawo]”, eyo piiyo, ovahiwaka owerya ni okhulupale ohoolo wa Farawo, tivo Moise ahaareerela awe omoova mwene a wExiitu.—Okh 7:1, 2.
Omusoma Biibiliya
13-19 YA JULYO
MIHAKHU SINIKHUMA MBIIBILIYANI | OKHUMA 7:26-9
“Farawo Aahipaka Yootthuna ya Yehova Moohilakela”
it-3 epax. 117 etti. 2
Wuumiha Murima
Moota Yehova Muluku onaathokorerya awe apinaatamu, ennooniherya wira owo moopixa murima onnaahiya atthu ni maloko akhalaka akumi, nnaamwi aphwanelaka okhwa. (Map 15:16; 2 Pe 3:9) Atthu akina yaamwiiwelenle yaahikhalana eparakha yowooneliwa othunku (Yox 2:8-14; 6:22, 23; 9:3-15), masi akina yaahuumiha murima aya mootepana ahinaphavela omwiiwelela Yehova vamosa ni arumeyi Awe. (Otu 2:30-33; Yox 11:19, 20) Okhala wira Yehova khonikhoottiherya wira atthu yuumiheke murima aya, Owo onihimmwa wira ‘onnuumiha murima’ aahiiso onniiriha ‘wùmiha mirima’ saya. Nto okathi Yehova onaahukhumu awe ale anuumiha murima aya, yookhumelela aya owo onnooniherya owerya wawe wuulupale nave onniiriha olaleiwa nsina Nawe.—Mulikanyihe-tho ni Okh 4:21; Yoh 12:40; aRo 9:14-18.
it-2 epax. 397 itti. 1-3
Otakhala
Ohiya-vo, Yehova Muluku onnituruka itthu mwa enamuna oniwiiriha awe alipa ootakhala murima, moohilakela opaka yootthuna Awe. Nnaamwi ahimwiiwelelaka Yehova, owo onniwerya waakhoottiherya atakhali awo owiiriha etthu arumeyi Awe, wira akhaleke oororomeleya, nave wiiriha miteko saya sootakhala okumiherya exariya Awe. (aRo 3:3-5, 23-26; 8:35-39; Esa 76:11) Muupuwelo owo onnihimmwa eliivuru ya Miruku 16:4, eni: “Sothene sipankyaya, Apwiya apakenle etthu: àpakenle atakhali nihiku n’otakhaliwa”.
Ntakiheryo nimosa ti na Farawo, yoowo Yehova, omurumeelaka Moise ni Aroni, aamuloponle awe wira ahaana waataphula aIsarayeli aakhalinhe awe ipottha. Khahiyo Muluku taamwiirinhe mwene ole a wExiitu okhala ootakhala murima, masi Owo aaheemererya wira Farawo okhaleke mukumi ni aahipaka itthu saamwiirinhe wiixooniherya okhala mutakhali ni mutthu aaphwanelela wiiviwa. Etthu yaamwiirinhe Yehova opaka eyo enihimmwa eliivuru ya Okhuma 9:16, yeeyo eni: “Masi kowòpolani, wira kothonyeryeni ikuru saka, wira nsina naka nivuwihiwe mulaponi mothene”.
Ihukhumu muloko saakhumelenle wExiitu, seiyo saamalenle ni opwetexiwa wa Farawo vamosa ni anakhotto awe ephareya Yooxeerya, saari yowooniherya yuulupale ya owerya wa Yehova. (Okh 7:14–12:30; Esa 78:43-51; 136:15) Nuuvira iyaakha sinceene, maloko yaattamenle wExiitu nlelo yaanilavula itthu saakhumelenle, nave siiso nsina na Muluku naanilaleiwa elapo yotheene. (Yox 2:10, 11; 1 Sa 4:8) Khivaarowa oweryaneya wooniherya ovuwa ni owerya Wawe wuulupale okathi aawooponle awe aIsarayeli wExiitu, vaakhanle wira Yehova aahimwiiva Farawo moowaakuveya.
Otokosa Itthu sa Efaita Soomunepani
it-3 epax. 33 itti. 5-6
Aphuure
Khaninsuwela muthinto xeeni wa aphuure anihimmwa mBiibiliyani, yaawo yaalempwale ni nttaava na eHeeberi na khalai nave yaari ehukhumu ya neexexe yaakhumelenle wExiitu, ehukhumu yoopacerya yeeyo yahaaphwannye aIsarayeli yakhala muttetthe wa oGoxeni. (Okh 8:17, 18, 20, 25, 27; Esa 78:45; 105:31) ABiibiliya akina annitaphulela nuulumo nla noowi ʽA·rov’ mwa inamuna soovirikana ntoko “aphuure” (JB, NW, Ro), “anakittepha”(Yg), “iphepele” (AS, KJ, RS), “atupusi” (AT), ni “iphepele sinluma inama” (LXX).
Nuulumo noowi “aphuure”, ninnihela-tho muhina mithinto soovirikana sa aphuure ni iphepele suulupale. Iphepele suulupale soothiyana sinniluma inama hata ni atthu sinanuula ephome aya. Okathi aniira aya ari ene ntoko ikhune, aphuure annaaluma atthu vamosa ni inama, muthinto owo wa aphuure onaaluma atthu oniphwanyaneya mukerekhere mwa muro. Tivo, aphuure anceene yahaakumiherya ohaawa wuulupale atthu ni inama sa wExiitu mpakha ikwaha sikina yaanikumiherya okhwa.
w04 15/3 epax. 25 etti. 9
Iponto Suulupale sa Eliivuru ya Okhuma
8:22-23—Xeeni Moise aahimmye awe wira mikuttho aIsarayeli yaarowa aya waavaha Apwiya sooniwa ntoko oveeha elapo ya wExiitu? Okhala wira atthu a wExiitu yaanikokhorela mithinto sinceene sa inama. Tivonto, ohimya wira yaarowa ovaha mikuttho waamukumiherya nttittimiho nuulupale ni vanweryaneya wiiweleliwa Moise okathi aahimmye awe wira yaahiye aIsarayeli akhume wira arowe yanvanhe mukuttho Muluku aya Yehova.
Omusoma Biibiliya
(Okhuma 7:26–8:1-15)
20-26 YA JULYO
MIHAKHU SINIKHUMA MBIIBILIYANI | OKHUMA 10-11
“Moise ni Aroni Yaahooniherya Olipa Murima Wuulupale”
w09 15/7 epax. 20 etti. 6
Mmutakiheke Yesu—Mulaleeryeke Moolipa Murima
6 Nkuupuwelani olipa murima Moise aarina awe okathi aalavula awe ni Farawo, mwene yoowo ahooniwa ntoko mutthu pure aarummwa ni amuluku, masi ooniwa ntoko ti muluku ene, mwaana a muluku a nsuwa, iitthaniwa Ra. Woonasa wene, sintoko siira aya maFarawo makina, owo aanikokhorela elatarato awe. Nuulumo na Farawo nooniwa ntoko nlamulo. Owo aalamulela mooruma. Mwaha wookhala oowerya, oowiixinnuuha ni oowuumiha murima, owo khaalimalenle orummwa. Aari mulopwana yoowo Moise, makampusi oomaala, aaronwe awe okumanasa ikwaha sinceene, moohilattuliwa ni moohaakheliwa saana. Nto etthu exeeni Moise aalaleya awe? Ihukhumu soopwetexa. Etthu xeeni aavekenle awe? Weemereriwa wira imilyau sinceene sa ipottha sa Farawo sikhume mulaponi mme. Niireke Moise aaniirerela okhala oolipa murima? Moohaanyiherya!—Moth. 12:3; aHéb. 11:27.
it-3 epax. 17 etti. 1
Moise
Vareerela olipa murima ni waamini wira Moise olavule ni Farawo. Waari owerya wa Yehova ni ikuru sa munepa Awe wootteela saamukhalihenrye Moise ni Aroni, owerya waakhwaniherya muteko aarumme awe. Nkahaya muupuwele okhulupale wa Farawo, mwene a olumwenku wotheene a okathi ole yoowo ahaawananiwa. Nkamuupuweleni Farawo okilanthe ene opuro awe wootepa oreera, woonasa wene sintoko muluku, orukureriwe ene ni anamiruku awe, makumantanti a atoropa, makwarta ni ipottha. Nave-tho, opuro ole yaahikhala ahooleli a itiini, anamaxitta, ni ale yaamulupattha Moise. Alopwana awo, omuhiya Farawo, yaari ooweryexa moomweneni mme. Mareheryo ala otheene yaapakiwe wira amukhaliheryeke Farawo mwa mureerelo wa amuluku a wExiitu. Nave Moise ni Aroni yaahirowa ohoolo wa Farawo, ohiya ekwaha emosa paahi masi ikwaha sinceene, nave Farawo aahitepa wuumiha murima awe, okhala wira owo aahilakela ohaahiya aHeeberi aapanke awe ipottha moomweneni mwawe. Veekeekhai, Moise ni Aroni, nuumala ohimya ehukhumu yaneethanu neeraru, yaahoomoliwa ohoolo wa Farawo, nave nuumala okhumelela ehukhumu ya neethanu neexexe, yaahileeliwa wira ahitthikele-tho orowa okumana ni Farawo, okhala wira yapaka eyo yaamwiiviwa.—Okh 10:11, 28.
Otokosa Itthu sa Efaita Soomunepani
w95 1/9 epax. 11 etti. 11
Anamoona Anaavaanyiha Amuluku Eethiru
11 AIsarayeli nlelo ari ene wExiitu, Yehova aahimuruma Moise orowa wa Farawo khumuhimeerya wira: “Murowé mwakumane ni mwené. Ti miyo kilipinhe murim’awe ni mirima s’arumeyi awe, wira kipake sotikiniha eriyari aya: siso nyuwo-tho munimwahimerya àn’inyu n’osùlu anyu sothene siwirihalyaka atthu a wEjitu ni sotikiniha sinryaka eriyari aya. Othene anyu munosuwela wira miyo k’Apwiya[Yehova]”. (Okhuma 10:1, 2) AIsarayeli yaari oowiiwelela yaanaaleela anaaya miteko sootikiniha sa Yehova. Nave osuulu aya wanaaleela anaaya, siiso yaanipaka eyo nloko ti nloko. Nto miteko sootikiniha sa Yehova sanweryaneya wuupuweleliwa. Moolikanasa, mahiku ala axipaapa akhalana muritti woowaavaha onamoona anaaya.—Otumererya 6:4-7; Miruku 22:6.
it-2 epax. 79 etti. 2
Okhuma
Vano, orweela wa ikuru soowerya soonihenrye awe, Yehova aahivuwiha nsina nawe nave aahiwoopola aIsarayeli. Woopowa wiiraneyale nuumala ophiya ekhopela ekina ya ephareya Yooxeerya, Moise ahaahoolela aana a aIsarayeli ni nsipo, nave murokora awe Miryamu aari profeta aahikuxa ekoma mmatatani ni aahaahoolela athiyana otheene iinaka ekoma ni wiipa, nave alopwana otheene yanaakhulela nsipo nne. (Okh 15:1, 20, 21) Vano waahikhumelela okawanyeya wa aIsarayeli ni awanani aya. Okathi yaakhumme aya wExiitu, Yehova kheemerenrye wira aIsarayeli akumiheriwe etthu yootakhala ni mutthu wala ni mwaamunama; nave khuuvo mwalapwa aawunwe owoopopihaka aIsarayeli nnakhala olatela nlumi nawe ohoolo waya. (Okh 11:7) Nnaamwi yowiiraneya ela ya Okhuma ehihimyaka wira Farawo mmansawe aahikela mphareya ni anakhotto awe khupwetexiwa, masi Esalimo 136:15 enihimya wira Apwiya Yehova: “Yahimusamiha Farawó n’anakhotto awe mphareya memmo”.
Omusoma Biibiliya
27 A JULYO–2 A AGOSTO
MIHAKHU SINIKHUMA MBIIBILIYANI | OKHUMA 12
“Paasikha—Yootaphulela Awe wa MaKristau”
w07 1/1 epax. 20 etti. 4
“Mutteliweke Murima Mwaha wa Apwiya”
4 Yesu aakhwiiye nihiku na 14 a Nisani mwaakha wa 33 Nuumala Kristu Orwa. WIsarayeli nihiku na 14 a Nisani naari nihiku noohakalaliha naatthapeliwa awe Paasikha. Khula mwaakha, nihiku nne imusi saanilya vamosa eyoolya yaahela muhina mwaapwittipwitthi oohirakala. Mwa enamuna eyo, awo yaanuupuwelela moota ephome ya mwaapwittipwitthi yaakhalihenrye aya woopoliwa wa aana oopacerya oyariwa a aIsarayeli okathi nlaikha nopwetexa naawiivale aya aana oopacerya oyariwa a wExiitu nihiku na 14 a Nisani mwaakha wa 1513 Ahinatthi Kristu Orwa. (Okhuma 12:1-14) Mwaapwittipwitthi a Paasikha aathoonyerya Yesu, yoowo murummwa Paulo aahimmye awe wira: “Kristu òhitiwa, ntoko epwittipwitthi ya Pásik’ahu”. (1 aKorinto 5:7) Moolikanasa ni ephome ya mwaapwittipwitthi a Paasikha, ephome yaamwaarexiwe ya Yesu ennikumiherya woopoliwa wa atthu anceene.—Yohani 3:16, 36.
it-3 epax. 181 etti. 5
Paasikha
Itthu sikina saavarihana ni niira na Paasikha sihaakhwanela ni Yesu. Yowiiraneya emosa, enivarihana ni ephome yaaheliwa mukerekhere mwa mikhora sa ipa sa wExiitu, yeeyo yaawooponle aana oopacerya oyariwa a wIsarayeli okathi nlaikha noopwetexa naavira aya. Murummwa Paulo onnaahimya maKristau oothanliwa sintoko muloko wa aana oopacerya oyariwa (aHé 12:23), nave Kristu sintoko moopoli aya, orweela wa ephome awe. (1 aTe 1:10; aÉf 1:7) Khanivo nikhuva na mwaapwittipwitthi a paasikha naapwexiwa. Nave iprofesia sikina saahihimya wira khanivo nnakhala nikhuva nimosa na Yesu naarowa opwexiwa, nto eyo yaahiiraneya okathi aakhwiiye awe. (Esa 34:20; Yoh 19:36) Tivo Paasikha aYuda yaamwiiraya mwa iyaakha sinceene saari itthu Nlamulo naahimya aya okhala ntoko itthu saarowa wiiraneya ni saamuhimya Yesu Kristu, “Mwapwittipwitthi a Muluku”.—aHé 10:1; Yoh 1:29.
w13 15/12 epax. 20 itti. 13-14
Muupuweleke Nihiku Nla
13 Vaavo anamwane ale yannuwa aya, itthu sootthuneya yiixuntte aya yaarowa owiixuttihaka anaaya muhoolo. Etthu emosa yaarowa aya wiixutta, tiila: Yehova onnaakhaliherya ale animukokhorela. Anamwane ale yaahaana wiixutta wira Yehova, Muluku mukumi, okhanle tthiri. Yehova yoowo ori Muluku mukumi, onniphavela waakhaliherya atthu awe. Owo aahooniherya owerya wawe vaavo aakhapelenle awe anamwane oopacerya oyariwa a itthoko sa Isarayeli, ‘okathi apwetexalyawe atthu a wEjitu’. Khwaahiya aana aIsarayeli oopacerya oyariwa ari ene akumi.
14 Nnaamwi anamuyari ari maKristau ahitumereriwaka khula mwaakha waaleela anaaya moota siiriwa awe Paasikha khalai. Niireke munniwiixuttiha ele enitaphulela aya niira nlo, wira Muluku onniwoopola atthu awe? Niireke nyuwo munniwooniherya saana okupali wanyu wira Yehova Mulipa onaakhapelela atthu awe? (Esal. 27:11; Yes. 12:2) Niireke okathi onaatthokiherya anyu aniinyu munnilavula moohakalala ohiya olavulaka ntoko etthu ehinikupali anyu? Mwiimananihe orumeela itthu iyo siniixutta anyu sa Paasikha wira mwaakhaliherye atthu a vatthokoni vanyu wunnuwa momunepani.
Otokosa Itthu sa Efaita Soomunepani
it-3 epax. 180 etti. 1
Paasikha
Ihukhumu muloko saakhumelenle wExiitu saahooniherya ohukhummwa wa amuluku eethiru, otepexa wene ehukhumu ya namuloko: okhwa wa aana oopacerya oyariwa a wExiitu. (Okh 12:12) Mwaapwittipwitthi aari mwaamunama ooniwa okhala oowaarya a muluku Ra, ti nthowa naya woottiherya ephome ya mwaapwittipwitthi a Paasikha mukerekhere mwa mikhora waarowa okhala waaveha atthu a wExiitu. Ohiya-vo, enyompe yaari enama yooniwa okhala ntoko yowaarya, nto opwetexiwa wa inyompe soopacerya oyariwa waari opwetexiwa wa muluku Osiri. Farawo mwaneene aanikokhoreliwa ntoko mwaana a muluku Ra. Nto, okhwa wa mwaana oopacerya oyariwa a Farawo wooniherya ohiwerya wa muluku Ra ni ohiwerya wa Farawo.
it-1 epax. 543 etti. 7
Kongresu
Etthu yiiriha akongresu awo okhala a vameekhaya waari mwaha woowi nihiku nle khuuvo eemereriwa ovara muteko woowoma. Mwa ntakiheryo, nihiku noopacerya ni nihiku na neethanu nenli na Iphaawu Soohiheliwa Miropo yaari mahiku a vameekhaaya, yaawo Yehova aahimmye awe wira “Mahiku ene yawo, muhivaré muteko: mwapeye yoly’anyu pahi”. (Okh 12:15, 16) Tthiri okathi wa mithukumano iyo suulupale alipa a mukuttho yaaniluttuweliwa vanceene onvaha mikuttho Yehova (Ona 23:37, 38), muteko yoowo ahaavonyola nlamulo naakhoottiherya ovara miteko sa khula nihiku okathi wa mithukumano iyo. Ole khahiyo waari okathi woophumurya masi waari okathi aIsarayeli yaaphwanya aya mareeliho manceene oomunepani. Khula eSaabadu, atthu yaanithukumana wira amukokhorele Yehova ni yiixuttihiwe. Nto awo yaanilipihiwa okathi waasommwa aya ni otthokiheriwa Nuulumo na Muluku, sintoko saapakiwa aya musinagoga sa khalai. (Mit 15:21) Tivo, nnaamwi atthu ale yaahaavara miteko soowoma nihiku na eSaabadu wala mithukumano sikina suulupale soowaarya, awo yaaniluttuweliwa opaka mavekelo ni wuupuwelela itthu voohimya sa Mpattuxa aya ni soolakela sawe. Nwehe nuulumo noowi ASSEMBLÉIA.
Omusoma Biibiliya