Muluku Oopaka Erimu ni Elapo ya Vathi

Yehova Muluku ti Mpattuxa ahu. Owo topanke itthu sotheene sinooneya ni sihinooneya. Masi ohinatthi opaka itthu sinoona ahu, owo aahipaka malaikha manceene. Nyuwo munnisuwela malaikha ti pani? Awo arumeyi a Yehova. Malaikha anlikana ni Muluku. Hiyo khaninwerya oweha malaikha, siisaale nihinwerya ahu omoona Muluku. Nlaikha noopacerya Yehova aapanke awe naari namakhaliherya awe. Nlaikha nlo naahimukhaliherya okathi Yehova aapaka awe itheneeri, iplaneta, ni itthu sotheene sikina. Emosa ya iplaneta iyo, ti elapo ya vathi yeeyo enikhala ahu.

Nuumala-vo, Yehova aahilokiherya elapo wira ekhaliweke ni atthu ni axinama. Owo aahipaka nsuwa wira nimwaleeleke elapo. Aahipaka myaako, iphareya, ni miro.

Exeeni yaakhumelenle moottharelana? Yehova aahihimya so: ‘Kinoopaka malaxi ni miri’. Nto saahikhumelela mihokorokho sinceene, makukhu, ni ifilori. Nuumala-vo, Yehova aahaapaka axinama otheene, niire so: axipalame, ihopa, axinama aniipurula ni a mutakhwani. Owo aahaapaka axinama acikhaani, ntoko ahukula, ni aalupale, ntoko itthepo. Mwaamunama xeeni onoosivelani?

Nto, Yehova aahilavula ni nlaikha noopacerya oriki: ‘Nrowe nimpake mutthu’. Atthu yaarowa ovirikanaka ni axinama. Awo yanweryaka opaka itthu, olavula, otheya ni onvekela Muluku. Nave-tho yanweryaka okhapelela elapo ni axinama. Nyuwo munnimusuwela ti pani aari mulopwana oopacerya? Nrowe nimusuwele.