Adamu ni Eva Khiyaamwiiwelenle Muluku

Nihiku nimosa Eva ori ene mekhawe, enowa yaahimulavuliha. Eyo yaahimukoha so: ‘Ekeekhai wira Muluku ohookhoottiheryani olya mihokorokho sa miri sotheene sa mmatta?’ Eva aahaakhula wira: ‘Mihokorokho sotheene hiyo pooti olya, masi nikhoottiheriwe mwiri mmosa paahi. Nalya-vale muhokorokho aya, nnimookhwa’. Enowa yaahimuleela wira: ‘Khamunkhwa! Mwalya-vale munrowa olikanaka ni Muluku’. Niireke eyo yaari ekeekhai? Nnaari, enowa yaamootha. Masi Eva aahikupali. Vaavo Eva aawehexexa awe mihokorokho iye, nto aamutepa ophavela olya. Nto, aahilya ni aahinvaha iyawe. Adamu ni Eva yaanisuwela wira yaahimwiiwelele Muluku yaamookhwa. Masi Adamu aahilya.

Nihiku nenle, Yehova aahimulavuliha Adamu ni Eva. Owo aahaakoha nthowa naya yahaamwiiwelenle aya. Eva aahimmye wira aawokiwe ni enowa, nave Adamu aahimmye wira aawokiwe ni Eva. Mwaha wa ohimwiiwelela Yehova, owo aahiwoomola Adamu ni Eva ojardim. Wira Adamu ahikele-tho ojardim, Muluku aahipweha malaikha ni ekatana ya mooro wira elipeleleke vamukhora.

Yehova aahihimya wira yoole anwonke Eva nave-tho aamuhukhummwa. Vekeekhai khahiyo yaari enowa yaalvunle ni Eva. Yehova khaapanke enowa yaawerya elavuleke. Nsu naiwanyeya naari na nlaikha nootakhala. Nlo naahipaka eyo wira nimootothe Eva. Nlaikha nlo nniitthaniwa Satana Diabo. Muhoolo, Yehova onompwetexa Satana wira ohivikanihe owiiriha atthu opaka itthu soohiloka.