YOOSOMA 11

Olavula Voohakalala

ARoma 12:11

MALAKIHERYO: Mweererye waavara murima alipa-oowiriyana, mulavulaka voohakalala.

Mulavuleke mowiiwanyeya. Okathi munilokiherya anyu mwaha, muupuweleke efaita ya muhupi anyu. Muhaana osuwela saana mwaha anyu wira mwalavuleke ni murima wotheene.
Nwuupuweleke alipa-oowiriyana. Muupuweleke moota ele enrowa anyu wiixuttiha wala osoma ekhanle aya owaaphwanyiha mureerelo alipa-oowiriyana. Nto mwiilokiheryeke wira mwapake mwa enamuna enrowa owiiriha alipa-oowiriyana osiveliwa mwaha owo.
Mulavuleke ni ikuru. Muhilavuleke mwa enamuna enaaphwanyiha ikhove alipa-oowiriyana. Murumeeleke matata anyu, owiitho ni ipantte sikina sa erutthu wira mooniherye wira munnikupali ele eniixuttiha anyu.

Wa khula etthu enihimya anyu, muhimakeleke orumeela matata wala othoonyasa. Musuweleke orumeela itthu iyo. Mulavuleke voohakalala, vanceenexa okathi muniixuttiha anyu iponto suulupale wira nwiirihe alipa-oowiriyana ovarihela muteko. Okathi onilavula anyu mwaha, muhilavuleke ni nsu noorunya okhuma woopaceryani mpakha omaliha, maana alipa-oowiriyana pooti ovela woottharani.