Olavula Mwa Enamuna Yoovaanela

Yoolepa: “Nulumo . . . [ninlavuliwa] okathi worera ti vareranxe!” — Mir. 15:23.

Etthu Filipe Aapanke Awe

Filipe namalaleya ovaanelaka ni mulopwana a wEthiyopia, yoowo onisoma eroolu okilanthi ene mukaaroni enipuruliwa ni inama.

EVIIDIYU: Filipe Omulaleeryaka Namuteko a Pwiyamwene a wEthiyopia

1. Nwehe EVIIDIYU, aahiiso musome Miteko 8:30, 31. Nuumala-vo, mwaakhule makoho anittharelana:

Filipe aapacenrye sai ovaanela ni mulopwana ole?
Xeeni enamuna aapacenrye awe olavula ni mulopwana ole, yaari aya yooloka, nto onamwiixuttiha etthu esya ya mBiibiliyani?

Etthu Filipe Onniixuttiha Awe

2. Vakhala wiira ninrowa olavulaka mwa enamuna yoovaanela, mutthu owo ninlavulana ahu, pooti ohoova nave onrowa ophavelaka oniwiriyana.

Mmutakiheke Filipe

3. Nweheke makhalelo a mutthu owo. Munweheke moota oneemela awe ni nweheke owiitho wawe. Eyo pooti wookhaliheryani osuwela moonelo wa mutthu owo. Niireke mutthu owo onniphavela ovaanela ni nyuwo? Woonasa wene, nyuwo pooti opacerya ovaanela mwaha wa mBiibiliyani ni mutthu owo, mmukohaka so: “Mwaanisuwela wiira . . . ?” Nto mwaweha wiira mutthu owo khoniphavela ovaanela ni nyuwo, muhimukhanyererye.

4. Mpixeke murima. Muhuupuweleke wiira ovenya wene, muhaana olavula myaha sa mBiibiliyani ni mutthu owo. Mulipeleleke okathi wooreerela, wiira mpacerye ovaanela mwaha wa mBiibiliyani ni mutthu owo, mwa enamuna yootaphuwa. Nto eyo enitaphulela wiira ikwaha sikina, nyuwo muhaana olipelela mpakha ekwaha ekina munrowa anyu ovaanela ni mutthu owo, wiira mpacerye olavula myaha sa mBiibiliyani.

5. Mweemereryeke oturuka mwaha mwaalokihenrye anyu. Woonasa wene, pooti wiiraka mutthu owo onoopacerya olavula mwaha mwahaalipelela anyu. Tivonto, mphaveleke olavula mwaha oninvara murima mutthu owo, hata eyo etaphulelaka olavula mwaha mukina onivirikana ni ole mwaalokihenrye anyu.

NWEHE-THO SOOLEPA IYA:

Mus. 3:1, 7; 1 aKor. 9:22; 2 aKor. 2:17; aKol. 4:6.