YOOSOMA 6

Otthokiherya Oratteene Yoolepa

Yohani 10:33-36

MALAKIHERYO: Khahiyo paahi osoma yoolepa nuumala-vo khiyatuphela eponto ekina. Muhaana ottittimiherya wira alipa-oowiriyana asuweleke ovarihana waya yoolepa eyo ni eponto enithokorerya anyu.

MOOTA WOOPAKA:

Muthanleleke moolumo ootthuneya a yoolepa. Nuumala osoma yoolepa muttittimiheryeke eponto enivarihana ni mwaha onithokorerya anyu. Vaatthuneyaka pooti otthikela-tho oromola eponto, wala opaka nikoho ninrowa owiiriha alipa-oowiriyana oweha moolumo anittittimiherya eponto eyo.

Mwarumeela moolumo anyu wira mutthokiherye yoolepa, muhaana wiimananiha wira alipa-oowiriyana aweheke oratteene moota moolumo ari mBiibiliyani anivarihana aya ni eponto yuulupale enilavula anyu.
Muttittimiheryeke eponto. Mwapacerya oromola yoolepa eniphavela anyu osoma, nto nuumala osoma muttittimiherye moolumo anivarihana ni eponto enithokorerya anyu.

Okathi munitthokiherya anyu yoolepa, muhinwaleke Biibiliya. Eyo enimwaakhaliherya alipa-oowiriyana oweha ovarihana waya ele enihimya anyu ni eveersu musomme anyu.
Mutthokiheryeke ovareleya waya muteko mwa enamuna yookhweya. Musyakeke ottittimiherya khula etthu ehinivarihana ni eponto yuulupale. Moovarihana ni ele alipa-oowiriyana anisuwela aya sa mwaha owo, muthanleke itthu munoona anyu wira sinimwaakhaliherya wiiwexexa saana etthu enithokorerya anyu.