Niireke Anamoona a Yehova Ampanke Biibiliya Aya Wira Ovarihaneke ni Itthu Anikupali Aya?
Nnaari. Masi okathi noonale ahu wira itthu naakupali ahu khasaavarihana ni ele Biibiliya oniixuttiha awe, hiyo naahituruka itthu iyo naakupali ahu, wira sivarihaneke ni Biibiliya.
Khalai ohinatthi okumiheriwa Biibiliya a Elapo Esya mwaakha wa 1950, naahinvarerya oratteene Biibiliya. Nto okathi owo, naahaasoma aBiibiliya anceene yaawo yaavarihana saana ni sookupali sahu. Nwehe matakiheryo vakhaani a itthu Anamoona a Yehova anikupali aya. Nuumala-vo, moone mmansinyu akhala wira itthu iyo sinnivarihana ni Biibiliya.
Ele ninkupali ahu: Muluku khahiyo atthu araru, aahiiso Trindade. Erevista Zion’s Watch Tower (Torre de Vigia de Sião) ya Julyo a 1882 yaatthokihenrye so: “Ale anisoma irevista sahu annisuwela wira Yehova, Yesu, ni munepa woowaarya khahiyo mutthu mmosa. Nave annisuwela wira yoowiixuttiha ya amuluku araru amuhimyaka mutthu mmosa paahi khahiyo ekeekhai”.
Ele Biibiliya oniixuttiha awe: “Apwiya ti Muluku ahu: awo t’Apwiya [Yehova] mekhaya”. (Otumererya 6:4) “Hiyo noosuwela wira Muluku eekeekhai ori mmosa paahi, yoowo ori Tiithi ihu a wiirimu. Owo oopattuxa itthu sotheene ni oonipattuxa wira nikhale awawe. Pwiya ori mmosa paahi, Yesu Kristu, nto itthu sotheene sookhala mwaha wa yoowo, nave hiyo nookhala mwaha wa yoowo”. (1 aKorinto 8:6) Yesu aahihimwa wira: “Atiithi taalupalexa okivikana miyo”.—Yohani 14:28.
Ele ninkupali ahu: Khokhanle ohaaxiwa omooroni. Etthokiheryaka yoolepa ya aRoma 6:23, erevista ya Zion’s Watch Tower (Torre de Vigia de Sião) ya Junyo ya 1882, yaahikhalana mwaha waahimya so: “Etampi eniliviwa ni okhwa”. Nto erevista ele yaahimyale so: “Tthiri moolumo ala toowiiwanyeya oratteene. Masi ti vootikiniha osuwela wira atthu yaale animukupali Biibiliya okhala Nuulumo na Muluku, khanikupali ele yoolepa ela enihimya aya, maana anikupali wira etampi eniliviwa ni ohaaxiwa omooroni mahiku ootheene”.
Ele Biibiliya oniixuttiha awe: “Ole otthenke ti yole ontthuna okhwa”. (Ezekiyeli 18:4, 20) Ehukhumu ya atthu ootakhala khahiyo opahiwa omooroni masi ti “opwetexiwa ohinimala”.—2 aTesaloonika 1:9.
Ele ninkupali ahu: Omwene wa Muluku ekuvernu ya ekeekhai ohiya etthu eri vamurimani va mutthu. Erevista ya Dezembro ya 1881 ya Zion’s Watch Tower (Torre de Vigia de Sião) yaahimmye so: “Wapacerya olamulela Omwene owo valaponi, onoopwetexa ikuvernu sootheene sa apinaatamu.”
Ele Biibiliya oniixuttiha awe: “Mahiku òmwene owo, Muluku a wirimu onokumiherya omwene ohinrowa omala, nnákhala oweriwa n’umwene mukina. Omwene owo onohonona n’upwetexa omwene wothene wa mulaponi, numalá onrowa okhala wa mahiku othene.”—Daniyeli 2:44.
Niireke Anamoona a Yehova animuusari paahi Biibiliya a Elapo Esya okathi aniwiixuttiha aya atthu akina itthu anikupali aya?
Nnaari. Hiyo ninniwuusari aBiibiliya akina okathi ninlaleerya ahu. Nave okathi nnaasomiha ahu atthu akina Biibiliya, ninnaavaha Biibiliya a Elapo Esya, aahiiso atthu yaale aniphavela osomihiwa ni Biibiliya oovirikana, hiyo ninneemererya waasomiha nimuusariki Biibiliya onimphavela aya.