BIIBILIYA ONNIRUKUNUXA MIRIMA SA ATTHU

Waakhula wooloka wa Biibiliya waahikivara murima

Elavuliwe ni Ernest Loedi

MWAAKHA OYARIWE AWE: 1948

ELAPO OYARIWE AWE: HUNGRIA

MWAHA ENE: AANIPHAVELA VANCEENE WAAKHULIWA WA MAKOHO OOTTHUNEYA MOOKUMINI

MWEETTELO AKA WA KHALAI: Kiyariwe oSzékesfehérvár, Hungria, epooma erina sowiiraneya sinci sa iyaakha 1000 sivinre. Nlelo kinnuupuwela itthu sootakhala saakhumelenle okathi wa Ekhotto ya Nenli ya Olumwenku.

Okhuma enamwane aka kihuuwale ni axipiipi aka. Kinniwuupuwela moohakalala apiipi Elisabeth. Awo yaahikikhaliherya vanceene omwaamini Muluku. Okhuma okathi kaarina aka iyaakha 3, kaamakela olompa ni apiipi nivekelo ninsuweliwa okhala ‘Tiithi ihu, muri wirimu’. Masi, saahivira iyaakha 27 wira kisuwele yootaphulela ya nivekelo nlo.

Axipiipi aka yaanikihuuwa mwaha woowi anamuyari aka yaavara muteko othana ni ohiyu, yaavyaka musurukhu munceene ni othuma enupa yooreera. Masi eSaabadu ya nenli ya khula mweeri, emusi ahu yaanithukumana wira nilye hoothe. Okathi owo waanikisivela vanceene.

Eyaakha ya 1958, yoophavela ya anamuyari aka yahiiraneya; yaahithuma enupa wira nikhaleke-mo hiyo araru. Nto eyo yaahikihakalaliha vanceene! Masi, nuuvira myeeri 6, ohakalala iwo mootutuxerya waahimala. Apaapa yaahikhwa mwaha wa eretta ya kanser.

Kaahixankiheya vanci. Kinnuupuwela wira kaahivekela so: “Muluku, miyo kihooxonttelani wira nwoopole apaapa. Kinnaaphavela; Xeeni muhaakhulaka mavekelo aka?” Kaaniphavela osuwela opuro waari aya apaapa. Kaaniikoka so: ‘Kiireke aronwe wiirimu? Wala aamala-mala tu?’ Nto kaanaakhalela nrima anamwane yaarina apapaya.

Mwa iyaakha sinceene, kaanirowa omahiye woonasa wene mahiku otheene. Kaanikokhora vakampani va apaapa, kinavekela so: “Xontte, Muluku, kiniphavela osuwela opuro ari aya apaapa”. Nave-tho kaanivekela wira Muluku okikhaliherye osuwela yoolakela ya okumi.

Kirina ene iyaakha 13 kaahiimananiha wiixutta nttaava na wAlemanha. Kuupuwela wira eriyari ya iliivuru sinci sa wAlemanha, kamphwanya waakhuliwa wa makoho aka. Eyaakha ya 1967, kaahirowa osoma epooma ya Jena epantte enikhuma nsuwa, wAlemanha. Kaanisoma iliivuru sa mafilosofu, vanceenexa iye saamananiha otthokiherya yoolakela ya okumi wa apinaatamu. Nnaamwi kaaphwanye miyuupuwelo soovirikana, khuuvo waakisivela. Nto kaahivikaniha ovekela.

MOOTA BIIBILIYA ORUKUNUNXE AWE OKUMI AKA: Eyaakha ya 1970, kaahitthikela Hungria, weiwo kaamusuwenle aka Rose yoowo aarowa okhala mwaaraka. Okathi owo, elapo ele yaalamuleliwa ni eguvernu comunista. Nuumala othelana, naahitthyawela wÁustria. Hiyo naphavela othaamela oSydney, wAustralia, weiwo aakhala awe muhima aya amaama.

Moohipisa kaahiphwanya muteko wÁustria. Nihiku nimosa, mpatthani aka a muteko aahikileela wira kanwerya ophwanya waakhuliwa wa makoho aka otheene mBiibiliyani. Aahikivaha iliivuru vakhaani saamutthokiherya Biibiliya. Kaahisoma ni kinaphavela-tho wiixutta itthu sikina. Nto kaahaalepela Anamoona a Yehova kivekelaka iliivuru.

Nihiku noopacerya na wuupuwelela othelana wahu, naahixukuriwa ni mmiravo mmosa Namoona a Yehova. Aahiruuha iliivuru naavenke ahu ni aahinivaha yoosoma ya Biibiliya, nto kaaheemya. Okhuma vaavo kaahiphavelexa wiixutta itthu sinceene, nto naanisoma ikwaha piili vasumanani; khula yoosoma yaanimaliha iwoora 4!

Ele yaaxutta aka mBiibiliyani yaanikivara murima. Okathi Anamoona yaakoonihenrye aya nsina na Muluku, Yehova, mBiibiliyani mwaka a nttaava Húngaro, kaahitikinihiwa vanci. Mwa iyaakha 27 keetta aka okerexa, nkaatonko wiiwa nsina na Muluku. Nto waakhula wooloka wa Biibiliya waahikivara murima. Mwa ntakiheryo, kaahixutta wira apaapa khanisuwela etthu, anoorupa. (Musuweli 9:5, 10; Yohani 11:11-15) Kaahiixutta-tho wira Biibiliya ooleiherya elapo weiwo ohinrowa “okhala-tho okhwa”. (Wisupulula 21:3, 4) Nto kinnilipelela waaweha apaapa okathi anirowa aya ‘ohihimuwa mokhwani’.​—Miteko 24:15.

Rose aaheemya-tho omusoma Biibiliya. Mohipisa naahirowa vahoolo. Nto mwa myeeri miili paahi naahimaliha yoosoma ahu! Naanirowela mithukumano sotheene sa Anamoona empa ya Omwene. Nto Ophentana waya, okhaliheryana, ni wiiraana waahinivara murima.​—Yohani 13:34, 35.

Eyaakha ya 1976, miyo ni Rose naahithaamela wAustrália. Moohipisa naahaaphwanya Anamoona yaawo yanaakhenle moophenta. Nto eyaakha ya 1978, naahikhala Anamoona a Yehova.

MOOTA OTTOTTENLE AKA MUREERELO: Nto kaahiphwanya waakhuliwa wa makoho aka yaakixankiha mwa iyaakha sinci. Mwaha wa omwaattamela Yehova Muluku, komphwanya Tiithi oolokexa. (Yakobo 4:8) Nto yoolipelela aka ya owoona vasya apaapa ookiyara mwa elapo esya, ennnikiphwanyiha ohakalala wuulupale.​—Yohani 5:28, 29.

Eyaakha ya 1989, naahitthikela Hungria wira naaleeleke sookupali sahu, apatthani, amusi, ni atthu akina naasuwela ahu. Naahikhalana eparakha ya owiixuttiha Biibiliya imiya sinceene sa atthu. Atthu anivikana 70, ohela muhina amaama, aakhala Anamoona a Yehova.

Mwa iyaakha 17 kaahivekela wira kiphwanye waakhuliwa wa makoho aka. Vano soovira iyaakha 39. Masi vano, okathi kinivekela aka kinihimya wira: “Kihooxukhuruni Tiithi aka a wiirimu, mwaha woowi muhaakhula makoho kaarina aka okhuma enamwane aka”.