Niireke ninnisuweliwa okhala atthu oohithipelela? Mwiikoheke so: ‘Kiireke atthu akina annikisuwela ntoko mutthu onaathokorerya saana atthu akina, ooleva ni nkinaakhanyererya atthu akina moonelo aka? Kiireke atthu anikisuwela okhala mutthu oothipelela? Kiireke kinniiwelela ni otthara miyoonelo sa atthu akina?’ Makoho ala, anoonikhaliherya woona akhala wiira ninnimutakiha Yehova ni Yesu. Hata makhalelo ahu aturukeyaka, nihaana ohithipelela itthu sa khalai ni waakuva wiilimaleliha makhalelo masya. Nto oturukeya iwo wa makhalelo ahu, pooti oniphwanyihaka mixankiho nahaalipelela ahu. Mwa ntakiheryo, hiyo pooti oniphwanyaka oretta mootutuxerya, othoiwa musurukhu, aahiiso oniphwanya mixankiho sinikumiheriwa ni ahooleli a mulaponi. (Mus. 9:11) Ikwaha sikina, pooti onixankiha okathi mutthenkeso wa Yehova onnivekela awe othaamela mapuro makina aahiiso onituruka awe yoothanleliwa ahu. Vanniweryaneya olimalela makhalelo masya. Masi ninrowa owerya sai opaka eyo? Nnoowerya akhala wiira nnimwiimananiha opaka itthu 4 sinittharelana: (1) Npakeke itthu moovarihana ni makhalelo anyu aniinaano, (2) muhuupuweleleke itthu siiraneyale khalai, (3) muupuweleleke itthu sooloka murina anyu aahiiso muniwerya anyu opaka, ni (4) mwaakhaliheryeke atthu akina. w23.07 21-22 itti. 7-8

Profeta Daniyeli aari mmiravo, okathi ababilonia yaamukunxe aya elapo aayariwe awe oYerusalemu, amuroihaka oBabilonia ntoko epottha. Masi nnaamwi Daniyeli aari mmiravo, atthu ale yanvanre yaahisiveliwa vanceene nuuwo. Alopwana ale yaahoona wiira Daniyeli aari “òrera ni òhirakala”, nave aayariwe etthoko ya atthu oovuwa. (1Sam. 16:7) Ti nthowa naya ababilonia yaaphavenle aya omwiixuttiha Daniyeli wiira okhaleke vatthokoni va mwene. (Dan. 1:3, 4, 6) Yehova aanimphenta Daniyeli, mwaha wa makhalelo awe ni yoothanla aapanke awe nnaamwi nlelo aari mmiravo. Woonasa wene Daniyeli aarina iyaakha 20 paahi, okathi Yehova aamulikanyinha awe ni Nowe ni Yoobi, yaawo yaamurumenle Yehova mwa iyaakha sinceene. (Maph. 5:32; 6:9, 10; Yoobi 42:16, 17; Ezek. 14:14) Nave Yehova khaahiyale omphenta Daniyeli okumi awe wootheene. — Dan. 10:11, 19. w23.08 2 itti. 1-2

Okathi muniphavela anyu othuma empa, nyuwo munniweha makhalelo ootheene a empa eyo. Nihaana opaka etthu emosa-ru okathi nimphavela ahu omusoma ni omwiiwexexa Biibiliya. Akhala wiira munimusoma Biibiliya mwaakuveyasaka, nyuwo pooti wiixutta itthu vakhaani paahi “masi muhaana otthikela-tho wiixuttihiwa itthu soopacerya sa nuulumo noowaarya na Muluku”. (aHep. 5:12) Ntoko siisale mwaarowa anyu osiveliwa oweha empa muhinatthi othuma wiira musuwele saana, nave wiira mmwiiwexexe Biibiliya muhaana omusoma ni ephoole. Enamuna yooloka ya omwiiwexexa Biibiliya, ori oweha mwaha munisoma anyu moota onivarihana aya ni myaha sikina sa mbiibiliyani. Wiira mmwiiwexexe, khoniphiyerya osuwela ikeekhai xeeni munikupali anyu, masi exeeni eniwiirihani okupali ikeekhai iyo. Wiira nimwiiwexexe saana Biibiliya nihaana wiixutta ikeekhai sa mbiibiliyani. Murummwa Paulo, aahaatumererya makristau wiira yaahaana osoma Nuulumo na Muluku ni ephoole wiira ‘asuwele moota niri aya nuulupale, noowunnuwa, noorakama ni noowiixerya’. Yiira siiso, waamini waya waamulipa “ntoko mitathaari soolipa”. (aEef. 3:14-19) Nave hiyo nihaana opaka etthu emosa-ru. w23.10 18 itti. 1-3