“Awo Khiyaacalenle”

OHITHOKORERYA soolopola onoowerya okumiherya ehasara.

Epooma ya Darwin w’Austrália, yiira elokiheryaka niira na wuupuwelela nihiku na eferiado eyaakha ya 1974, vaavo isireene saarumme aya silopolaka wira aanaattamela munamukhaya. Masi siira sivinreene iyaakha soowiiraka 30 munamukhaya ohinyaanyale epooma ya Darwin. Nto yaarowa onyaanyiwa vano? Anamunceene a epooma ele, khiyaathokorenrye yowoopiha eyo ntoko ekeekhai mpakha ipheyo sootakhala opacerya waakakanyula anamukhatta ni opwexa ixirii sa ipa seiyo atthu yaathukumanne aya. Mmeeloni mwaya voosiisu epooma yaari yoonyaanyeya.

OColombia, mweeri wa Novembro 1985, mwaako aahiphuleya. Otothowa wa eneevi ni exeelo waahiiriha mwaako okhuma mattophe ooviha yaawo yaawuuhenle atthu oovikana 20.000 a muttetthe w’Armero. Yaahilopoliwa toko vahinatthi? Saahivira miyeeri mwaako oriki otetereya. Hataa vari siiso, mwaha wa olimalela okhala mapuro a evulkau, anamunceene a muttetthe w’Armero khiyaacalenle. Makhulupale a muttetthe ole yaahilopoliwa wira ehasara yaarowa wiiraneya moowaakuva, masi awo khiyaapanke etthu yoowooneya wira yaalopole atthu. Soohimmwa ni Raadio saamananiha waamaaliha atthu paahi. Alto-falante a mukerexa yaahivariheliwa muteko wira etumereriwe atthu okhala oopixa murima. Ohiyu, waahiiwanyeya ophuleya mootutuxa ikwaha piili. Nyuwo mwanwerya ohiya mihakhu sanyu ni khiyatthyawa? Atthu vakhaani a muttetthe ole yaahimananiha otthyawa vahinatthi otepa opisa.

Ikwaha sinceene, mageologista annihimya moohivonya mapuro yaawo anrowa wiiraneya itetere. Masi awo khanwerya ohimya oratteenexa okathi enrowa aya wiiraneya. Eyaakha ya 1999, itetere soowiiva atthu oophiyeryaka 20.000 mu elapo yotheene. Anamunceene a yaawo akhwiiye, yuupuwela wira ela khiyaakhala-khala ewiiraneelaka.

Nyuwo Munoonela Sai Soolopola Sinikhuma wa Mwaneene Muluku?

Mowooneya, Biibiliya onnitthokiherya vahinatthi soowiiraneya sinisuwanyeiha mahiku ookiserya. Moovarihana ni soowiiraneya iyo, Biibiliya onnintumererya othokorerya “mahiku a Nowé”. “Mahiku awo, ehalaka orupa epula ya mutáseke”, atthu yaari oovareya ni miteko soolimaleleya s’ekumi, nnaamwi yaaxanka ni sootakhala saakhanle. Voohimya sa yoolopola ya Muluku orweela wa murumeyi awe Nowee, “awo khiyaacalenle mpakha ophiya epula ya mutaaseke ni khuwiivakasa atthu otheene”. (Matheyo 24:37-39, NM) Vaakhanleke wira ti nyuwo, mwaamwiiwelela yoolopola eyo? Olelo va nyuwo munniiwelela yoolopola?

Sai vaakhanleke wi nyuwo mwaakhala oSodoma, waattamela Ephareya Yookhwa, mmahiku a mulopwana Lothi, musulw’awe Abrahamu? Elapo eyo yaari ntoko eparayiisu. Aari muttetthe wooraala. Atthu yaari oowiitthyaala. Mahiku a Lothi, “atthu yanilya, yaniwurya, yanithuma, yanitumiha, yanàla, yaniteka ipa saya”. Atthu yaakhala oSodoma yaari-tho a mweettelo woothanyeya. Nyuwo mwaamuthokorerya ni murima anyu wotheene yoolopola ya Lothi voohimya sa sowiira iya soohiloka? Nyuwo mwammukupali Lothi ooleelakani wira Muluku oolakela onyaanya muttetthe w’oSodoma? Aahiiso mwaarowa othokorerya ntoko othweela, siisaale yoonenly’aya ale yaarowa okhala axitthepa awe Lothi? Vanweryaneya opacerya otthyawa masi nuumala vo khiyatthika ntoko sinre mwaara a Lothi? Nnaamwi atthu akina yahaakupanli soolopola, nihiku Lothi naavenyaly’awe oSodoma, “Muluku ahimoriha osulu malumi ni maluku a moro, khwapwetexa atthu ale othene”.​—Luka 17:28, 29.

Anamunceene a okathi ola khancalela etthu. Masi matakiheryo ala aasukiwa mu Nuulumo na Muluku ntoko yoolopola wa hiyo, wira enitumererye OVIKANIHA OKHALA OOWEHA-WEHA!

[Ekaaxa/Elatarato eri epaaxina 22]

Niireke Wira Mutaaseke a Elapo Yotheene Ontoko Wiiraneya Tthiri?

Anamavaanyiha anceene anihimya wira Nnaari. Masi Biibiliya onihimya wira tthiri mutaaseke ontoko wiiraneya.

Yesu Kristu aahilavula sa mutaaseke, okathi wa mutaaseke Yesu iira oryeene mukumi, nto aamoona ori wirimu.

[Ekaaxa/Elatarato eri epaaxina 23]

Niireke Wira Sodoma ni Gomora Ontoko Onyaanyiwa Tthiri?

Arqueologia anneemererya yoowiiraneya ela.

Miyaha sa mulaponi soolempwa sinnihimya yoowiiraneya ela.

Yesu Kristu aahittittimiherya yoowiiraneya eyo, ni mmoota yaakhumelenly’aya ennihimmwa mu iliivuru 14 soovirikana sa mBiibiliya.