Ekarta ya Nikhuuru Noolamulela

Nyuwo Munilaleya Omwene:

Nkahaya muupuwele vaakhanle wiira mwa murummwa ni muri Omwaako Olivera. Vano moohipisa Yesu onarwa opuro muri anyu. Nto ohinatthi owela wiirimu onahimya wiira: “Nyuwo munoophwanya ikuru okathi munrowa anyu waakhela munepa woowaarya. Nto munrowa okhala anamoona aka oYerusalemu, oYudeya ni oSamariya wotheene, ni elapo yotheene ya vathi”. (Mit. 1:8) Mwaarowa woonela sai?

Woonasa wene mwaamuxanka muupuwelaka moota mwaarowa anyu ovara muteko owo muulupale. Nave pooti wiira mwaamwiikoha so: ‘Vanrowa oweryaneya sai awiixutti vakhaani paahi olaleerya “elapo yotheene ya vathi”?’. Nave pooti wiira yaanuupuwela moolumo Yesu aahimmye awe ohiyu wookiserya oriki: “Namuteko khahiyo muulupale onvikana patarau awe. Akhala wira aakilupattha miyo, nave-tho animoolupatthani nyuwo. Akhala wira ahiiwelela moolumo aka, nave-tho animwiiwelela moolumo anyu. Masi anoowiirelani itthu iya sotheene mwaha woowi nyuwo mwa awiixutti aka. Animwiira siiso, okhala wira khanimusuwela Ole okirumme”. (Yoh. 15:20, 21) Okathi munuupuwela anyu moolumo awo a Yesu, woonasa wene munniikoha so: ‘Kinrowa owerya sai olaleerya oratteene kilupatthiwaka ni kirina ene mixankiho sikina?’

Olelo-va, hiyo pooti okhalana makoho ntoko awo. Okhala wiira na Anamoona a Yehova, muteko ahu onihela muhina olaleerya oratteene “elapo yotheene ya vathi” ni waalaleerya “atthu a ilapo sotheene”. (Math. 28:19, 20) Vanrowa oweryaneya sai ovara muteko ola nilupatthiwaka?

Eliivuru ya Miteko ennihimya soowiiraneya soovara murima sa arummwa ni makristau makina a eseekulu yoopacerya, yaawo yaawenrye ovara muteko yaavahiwe aya akhaliheriwaka ni Yehova. Eliivuru ela enimookhaliheryani othokorerya ni oweha soowiiraneya soovara murima siri eliivuru ya Miteko. Munoohakalala vanceene oweha moota itthu yaavara aya arumeyi a Muluku a okathi wa arummwa sinlikana aya ni itthu arumeyi a Muluku anivara aya olelo-va. Nave munooweha wiira itthu iyo sinlikana khasinivarihana paahi ni muteko, masi-tho ni enamuna muteko owo otthokihiwe awe ni onivariwa aya. Tthiri wuupuwelela itthu iyo sinlikana, sinoolipiha okupali wanyu wiira Yehova Muluku, khonrowa ohiya weettiha mutthenkeso awe wa valaponi.

Ninnivekela ni ninnikupali wiira osoma eliivuru ya Miteko enimookhaliheryani olipiha okupali wanyu wiira Yehova ni munepa woowaarya onimookhaliheryani. Nto opaka eyo, enimookhaliheryani ohihiya ‘olaleya oratteene Omwene wa Muluku’ ni waakhaliherya atthu akina ophwanya ephiro enoopola. — Mit. 28:23; 1 Tim. 4:16.