Niireke munnitepa ophavela woona siiraneyaka soolaiherya sa Omwene?
EPANTTE 7
Omwene Onnileiherya—Okhaliha Itthu Sotheene Isya
NYUWO munnirukula masa wala efruta ekina yoottokottha saana. Muhinatthi opweha opuro onuukeliwa aya, nyuwo munnaattameliha vaphulani nto khiyoona wunkhela. Nyuwo moovira nvaraka muteko iwoora sinceene, masi nlelo mookhalana ikuru siniwiirihani ovikaniha ovara muteko. Maamiinyu ori vakhiviru opuro wowaattamela mwiri, avaraka muteko moohakalala avaanelaka ni emusi ekina ni apatthani anikhaliherya muteko ole. Owo onikhala ntoko mwali; eyo eniwupuxeryani okathi wa khalai waarya anyu mwaana mukhaani. Vano, vannivila wuupuwela wira mwaahiwoona yuuluvanle ene olumwenku ole wa khalai ovinre. Munnuupuwela okathi aawereiwa aya ahinawerya etthu, nyuwo mwahivarela ntata naya okathi wiittha aya iphumu sookiserya, nave nyuwo mwahinla okathi wavithiwa aya. Masi vano awo aahihimuwa, vamosa ni atthu akina ancene, akumi ni arina ekumi yoolokexa!
Okathi owo onoophiya; hiyo noosuwelexa eyo. Maana noosuwela wira khula etthu Muluku enilaiherya awe enniiraneya tthiri. Mpantta ola, ninrowa othokorerya moota Omwene onrowa awe owaakhwaniherya anatiri awe moohipisa-va, ni moota ninrowa ahu ophiya okathi wa ekhotto ya Harmagedoni. Hiyo nave, ninrowa othokorerya mareeliho a Mwene anrowa okhumelela nuumala eyo. Vanrowa okhala voohakalaliha oweha okathi owo Omwene wa Muluku onrowa awe olamulelaka olumwenku ola wotheene, wiirihaka itthu sotheene okhala isya!