YOOSOMA 02

Biibiliya Onninivaha Nlipelelo

Edição Impressa

Olumwenku wotheene atthu sinnaaphwanya mixankiho. Nto anamunceene anniriipiwa murima, oxanka ni sinnaaphwanya mixankiho sikina. Niireke mootoko okhalana mixankiho ntoko iyo? Woonasa wene, nyuwo munnihaawa mwaha woowi munoowereyasiwa aahiiso ohookhwa mutthu mwamphenta anyu vanceene. Woonasa wene, nyuwo munniikoha so: ‘Kiireke mixankiho iya sinoomala?’ Vanimoosivelani osuwela moota Biibiliya onaakhula awe nikoho nna.

1. Nlipelelo xeeni Biibiliya onnivaha awe?

Biibiliya onnitthokiherya nthowa naya olumwenku ohireere awe mixankiho. Nave onninivaha ihapari soohakalaliha. Ihapari sene tiiya: Moohipisa mixankiho sotheene sinoomala moolumwenkuni. Nto itthu Biibiliya onileiherya awe pooti woovahani “oholo wororomeleya”. (Mmusome Yeremiya 29:11, 12.) Tthiri itthu Biibiliya onileiherya awe, sinninikhaliherya ovilela mixankiho ni okhalana moonelo wooloka. Nave sinninikhaliherya ophwanya ohakalala wekeekhai niinaano-va ni muhoolo.

2. Itthu xeeni Biibiliya onileiherya awe sinrowa wiiraneya muhoolo?

Biibiliya onihimya wira onookhala okathi ohinrowa aya “okhala okhwa, nnakhala oriipiwa murima, wala wunla, hata woona owereya”. (Mmusome Wiisuupulula 21:4.) Eyo enooniherya wira mixankiho sinaahaaxa apinaatamu olelo-va ntoko ohaawa, ohixariya, owereiwa ni okhwa khasinrowa okhala-tho. Nave Biibiliya onnileiherya wira muhoolo atthu anrowa okhalaka mahiku otheene ni moohakalala Mparayiisu valaponi.

3. Etthu xeeni enrowa wookupalihani wira itthu sotheene Biibiliya oleihenrye awe sinimwiiraneya?

Atthu anceene olelo-va annilipelela wiiraneya itthu sooloka. Masi awo khanikupali akhala wira itthu iyo sinimwiiraneya tthiri. Moovirikana ni atthu awo, itthu Biibiliya onileiherya awe sinimwiiraneya tthiri. Nto munoolipiha okupali wanyu itthu sotheene Biibiliya onihimya awe ‘mutokosaka oratteene Soolemphwa’. (Miteko 17:11) Omusoma Biibiliya, onimookhaliheryani woona akhala wira pooti aahiiso nnaari okupali itthu Biibiliya onihimya awe sinrowa wiiraneya muhoolo.

MWIIXUTTE ITTHU SIKINA

Nwehe itthu vakhaani Biibiliya oleihenrye awe sinrowa wiiraneya muhoolo. Nave moone moota nlipelelo Biibiliya onnivaha awe nnaakhaliherya aya atthu anceene olelo-va.

Ifootu: Itthu sinooniherya ovirikana wa makhalelo a atthu olelo-va ni makhalelo Biibiliya onileiherya awe atthu anrowa aya okhalana muhoolo. Itthu iyo sinnitthikeliwa vathi-va.

4. Biibiliya ooleiherya wira nnookhalaka mahiku otheene nihihaawaka

Elista enittharelana ennooniherya itthu Biibiliya onileiherya awe. Yooleiherya xeeni etempe woosivelani? Exeeni eniwiirihani otepa woosivelani?

Musome sooleiherya sa Biibiliya siri soolepa sinittharelana, nuumala-vo mwaakhule makoho anittharelana:

Munoona wira eversiikulu ela ya mBiibiliyani enninivaha nlipelelo? Niireke enoowerya waakhaliherya amusi anyu aahiiso mpatthani anyu?

Nkahaya muupuwele mukhalaka elapo

OHIKHANLE MUTTHU ONROWA . . .	ATTHU OTHEENE ANROWA . . .
woonaka owereya, ohaawa mwaha wa wuuluvala nnakhala okhwa. —Yesaya 25:8.	waawehaka ale anaaphenta aya akhwiiye ahihimuxiwaka wira akhaleke valaponi.—Yohani 5:28, 29.
owereiwaka nnakhala orakala. —Yesaya 33:24; 35:5, 6.	okhalana okumi wooloka ni ikuru.—Yobi 33:25.
othokoreriwa moohixariya. —Yesaya 32:16, 17.	okhalana yoolya yinceene, ipa sooloka ni muteko woohakalaliha.—Esalimo 72:16; Yesaya 65:21, 22.
ohaawa onikhumelela mwaha wa ikhotto.—Esalimo 46:10.	okhalana murettele wekeekhai.—Esalimo 37:11.
oriipiwa murima mwaha wa wuupuwela itthu soohiloka saanikhumelenle khalai.—Yesaya 65:17.	okhalaka mahiku otheene arina ene makhalelo ooloka.—Esalimo 37:29.

Mmiravo aawereiwa openunwe ene, okhupaareliwe ene ni maama awe.

Mulopwana uuluvanle ori ene mmiravo ni opurulaka ekarinyu ehireere soolya.

5. Sooleiherya sa Biibiliya pooti oturuka okumi anyu

Atthu anceene annikhulumuwa ni anniriipiwa murima mwaha wa mixankiho sihireere valaponi. Akina anniimananiha oturuka makhalelo a valaponi wira akhale ooloka. Nwehe moota yooleiherya yoowi makhalelo valaponi anooloka enaakhaliherya aya atthu anceene. Nwehe EVIIDIYU, nuumala-vo mwaakhule makoho anittharelana:

EVIIDIYU: Miyo Kaaphavela Omaliha Ohixariya (4:07)

Ifootu sa eviidiyu: ‘Miyo Kaaphavela Omaliha Ohixariya’. 1. Rafika uurulaka nxotte ni atthu akina a nikhuli nawe okathi aari awe mwali. 2. ‘Miyo Kaaphavela Omaliha Ohixariya’. Rafika onnihakalala vanceene vaavo onaaweha awe atthu a makhuli oovirikana okathi anwehe awe konkresu a Anamoona a Yehova ekwaha yoopacerya.

Ntoko yoonihenrye aya eviidiyu, enamuna xeeni ya ohixariya yaamuxankiha Rafika?
Ohixariya aaweha awe khomanle. Masi hata vari siiso, Biibiliya omukhalihenrye sai Rafika?

Nlipelelo Biibiliya onnivaha awe na muhoolo nnoonikhaliherya owanana okhulumuwa ni nnoowerya ovilela mixankiho. Musome Miruku 17:22 ni aRoma 12:12, nuumala-vo mwaakhule makoho anittharelana:

Niireke nlipelelo Biibiliya onnivaha awe pooti orukunuxa okumi anyu? Etthu xeeni enookupalihani eyo?

ATTHU AKINA ANIHIMYA WIRA: “Itthu Biibiliya onileiherya awe sa muhoolo ti sootepexa oreera, masi khahiyo sekeekhai”.

Xeeni munoona wira ti vooloka osuwela ekeekhai voohimya sa mwaha owo?

WUULUULA

Biibiliya onninivaha nlipelelo, nto osuwela wira onnileiherya itthu sooloka sinrowa wiiraneya muhoolo onninikhaliherya ovilela mixankiho.

Iponto suulupale

Xeeni atthu anitthuneya aya okhalana nlipelelo?
Etthu xeeni Biibiliya onihimya awe enrowa wiiraneya muhoolo?
Okhalana nlipelelo na muhoolo onookhaliheryani sai?

Yoosoma ela kimalinhe nihiku:

Yoolakela aka

Osoma iversiikulu sotheene sa mBiibiliyani siri yoosoma ela wira kisuwele oratteene ele Biibiliya onileiherya awe enrowa wiiraneya muhoolo.

Ekina:

Your other goal

NWEHE ITTHU SIKINA

Nwehe itthu sikina sa moota nlipelelo nikhanle aya oowookhaliheryani okathi wa mixankiho.

“Munrowa Ophwanya Woowi Nlipelelo Neekeekhai?” (Nvenye!, 22 a Abril, 2004)

Nwehe moota nlipelelo nnaakhaliherya aya ale arina iretta sihinivoniwa.

“Niireke Biibiliya Onimookhaliheryani Ovilela Oretta Ohinivoniwa?” (Mwaha ori va jw.org)

Vaavo muniweha anyu eviidiyu ya isipo enittharelana, muupuweleke muri ene Mparayiisu yiiraneyale ene ele Biibiliya onileiherya awe.

Eu penso no dia 3:37

Musome mwaha waaturunke okumi wa ativista mmosa, nuumala osuwela nlipelelo Biibiliya onnivaha awe na muhoolo.

“Vano Miyo Nkinuupuwela-tho Wira Kihaana Orukunuxa Olumwenku” (Owehaweha, 1 a Julyo, 2013)