MMWAATTAMELE MULUKU

Yehova ‘Oholevelelani Nyuwo’

“Mutthu ohiniwerya waalevelela akina onnihonona muthato wala eponti aarowa awe ovira”. Masu awo a eseekulu 17, yaalavuliwe ni mulipa oolepa sowiiraneya mBritaaniko Edward Herbert, ottittimiheryaka nthowa naya nintthuneya ahu waalevelela akina. Pooti okhala vano wala muhoolo, hiyo ninrowa ophavela oleveleliwa ni akina. (Matheyo 7:12) Masi, nookhala-tho nthowa nikina nuulupalexa nintthuneya ahu okhala atthu oolevelela. Moone masu a murummwa Paulo aniphwanyaneya yoolepa ya aKolosi 3:13.​—Mmusome.

Mwaha woowi otheene ahu naatthu oohimalela, ikwaha sikina, hiyo ninrowa waanyonyiha wala waaveeha akina; ni awo pooti opaka etthu emosaru. (aRoma 3:23) Ninrowa owerya sai okhala a murettele ni apinaatamu akhwiihu oohimalela? Uupuxeriwaka ni Muluku, murummwa Paulo onninlakiherya wira nikhaleke oovilela ni oolevelela. Yoolopola eyo ti yootthuneya olelo-va ntoko vaavale yaalempwale aya iyaakha sowiiraka 2.000 sivinre. Nrowe nithokorerye masu a murummwa Paulo.

“Nvilelaneke”. Moolumo ala, Biibiliya mukina oni: “Nvikaniheke ovilelana mukina ni mukhwaawe”. Mwa nttaava na eGriki, masu awo anithoonyerya okhala mutthu oohiyererya etthu wala oolevelela. Eliivuru emosa, enihimya wira maKristau annooniherya mukhalelo ola orweela wa “ophavelasa ovikaniha waalevelela ale aniwiirela itthu soohiloka, wala mikhalelo soonanara seiyo sinaanyoonyiha”. Nuulumo noowi “mukina ni mukhwaawe” ninnooniherya wira olevelelana iwo ohaana okhala wa atthu otheene. Eyo enitaphulela wira vaavo nintthokelela ahu wira noopaka etthu enaanyoonyiha akina, nihihiyereryeke wira itthu sihinaasivela akina saakanyerye murettele eriyari ya hiyo ni awo. Masi sai akhala wira akina aanitthekela?

“Nvilelaneke, mulevelelaneke imara sothene muntthekelananyu”. Moovarihana ni musuweli mmosa a myaha soolempwa, nuulumo na eGriki nitaphuleliwe noowi “mulevelelaneke imara sothene” wala olevelelana moomalela khahiyo nuulumo pure na olevelela . . . masi nimmuhimya mutthu yoole onilevelela mwa mahala”. Nave-tho, eliivuru ekina enihimya wira nuulumo nla pooti otaphuleliwa so: “ovaha etthu yoohakalaliha, yooloka, yoottotteleya mureerelo”. Hiyo ninnikhala ooreera murima vaavo nnaalevelela ahu akina moohihiyererya, hata vaavale akina ‘annitthekela’ aya. Masi, xeeni nintthuneya ahu ophavelaka opaka etthu eyo yooloka? Mwaha wa etthu emosa: namulevelela ole onitthekenle, muhoolo nnoophavela-tho oleveleliwa ni yena.

“Ntoko Muluku òlevelenlyaweni nyuwo, siso-tho nyuwo mwaleveleleke akhw’inyu”. Tthiri, nla nthowa nuulupalexa ninniiriha waalevelelaka akina moomalela, maana Yehova Muluku onninlevelela hiyo moomalela. (Mikeya 7:18) Muupuwelele voohimya sa mahala maalupale yaawo Yehova oonihenrya awe wa anamattheka anittharuwa. Moovirikana ni hiyo, Yehova khonittheka. Hata vari siiso, owo onnaalevelela moomalela anamattheka anittharuwa nnaamwi osuwelaka wira owo khonirowa ophavela wira anamattheka awo amulevelele. Tthiri, Yehova ntakiheryo nuulupalexa na mutthu onaalevelela moomalela anamattheka anittharuwa!

Omoriwa ikharari wa Yehova onninaattameliha hiyo wa yena ni oniiriha ophavelasa omutakiha. (aÉfeso 4:32–5:1) Hiyo niikoheke so: ‘Okhala wira Yehova onnikilevelela mwa mahala, exeeni yaarowa okikhoottiherya waalevelela apinaatamu akhwaaka oohimalela yaawo anooniherya ottharuwa wekeekhai vaavo anikitthekela aya?’—Luka 17:3, 4.

Malakiheryo a omusoma Biibiliya Outubro

aGalasia 1-6; aÉfeso 1-6; aFilipi 1-4; aKolosi 1-4; 1 aTesalonika 1-5; 2 aTesalonika 1-3; 1 Timótheyo 1-6–2 Timótheyo 1-4

[Eponto yuulupale ya epaaxina 11]

Yehova ntakiheryo nuulupalexa na mutthu onaalevelela moomalela anamattheka anittharuwa!