Yehova khaakiliyanle

MWEETTELO AKA WA KHALAI:

Miyo kiyariwe emusi ya atthu oothaaciri muttetthe wa oBilbao, mpantta onikela epheyo wEspanha. Miyo kaari mwaana a nenli wa anamwane 4. Emusi ahu yaari atthu ooluttuweliwa a etiini Katoolika, ni naanirowa okerexa khula nihiku. Okathi kaarina aka iyaakha 23 kaahikhala katekista a etiini katoolika, muteko yoowo waakisivela ni kivirinhaka iyaakha 40 kivara aka. Wiixuttiha etiini Katoolika, yaari etthu yootepa okisivela, ni ohiyu kaanirumeela ntoko katekista, kiwiixuttihaka aximwali ele eniitthaniwa primeira comunhão.

Nuuvira iyaakha 12 kirina ene etthoko yoohakalala, iyaka aahikhwa ni kihalana anamwane 4. Okathi owo kaarina iyaakha 33 paahi! Miyo kaanimananiha ophwanya nimaaliho kirumeelaka waamini wa etiini aka, masi kaanikhalana makoho ntoko ala: ‘Xeeni apinaatamu anikhwa aya masi Kristu onooponle ene? Xeeni ninvekela ahu wira Omwene wa Muluku orwe, masi atthu ooreera murima arowaka wiirimu?’ Nave-tho kaanuupuwela wira: ‘Akhala wira Muluku onniniphukela wookhwaani, xeeni ninrowa ahu wiirimu, nto nuumala-vo khiyarowa-tho opurgatoorio, wala omooroni, wira nahaaxiwe?’

Nto kaahaakoha mapastoore ookerexa. Pastoore mmosa aahikaakhula so: “Nkinsuwela, mwamukoheke biispo. Exeeni enootikinihani? Nyuwo kiira munnimwaamini Muluku? Muhixanke!” Masi miyo kaahivikaniha waavya waakhuliwa wa makoho aka. Nuuvira okathi kaahipacerya orowa mithukumano sa maJesuwita, atthu a etiini pentekostal, ni atthu ahinimukupali Muluku. Masi, khuuvo aawerya waakhula makoho aka.

MOOTA BIIBILIYA ORUKUNUNXE AWE OKUMI AKA:

Okathi kaarina aka iyaakha 60, naxikola mmosa kaamusomiha aka yoowo aarina iyaakha 7 aahikilattula orowa omuthukumanoni wa Anamoona a Yehova. Nto ele koonale aka ni wiiwa yaahikisivela vanci; masi mwaha wowaatteliwa miteko, nkaawenrye-tho okumana ni Anamoona Yehova okathi owo. Nuuvira iyaakha 2, mulopwana mmosa ni amwaarawe Juan ni Maite yaawo yaari Anamoona a Yehova, yaahiphiya owannya aka. Saahivira myeeri 3 kipakaka makoho manceene. Nto nuumala-vo, kaahipacerya omusoma Biibiliya.

Mwaha wa makoho kaamakela aka opaka, nto yoosoma aka ya Biibiliya yaanipisa! Kaanitokosa khula etthu yaaphwanya aka, kaarumeelaka aBiibiliya araru, kiphavelaka osuwela akhala wira ele yaaxuttiha Anamoona a Yehova yaari ekeekhai. Moohipisa, kaahoona wira kaahiwokiwa vanceene mwa iyaakha sinci ekerexa keetta aka. Nave-tho kaahixankiheya mwaha wa ovirikana waakhanle eriyari ya sookupali sa etiini aka ya khalai ni itthu kaaxutta aka mBiibiliyani. Muupuwelo aka waahixankiheya vanceene; nto sookupali saka saalikana ni mwiri orina mitathaari soolipa vanceene. Moottharelana, iyaka a nenli aahiwereiwa vanceene ni khukhwa. Okathi ene yoowo, kaahireformari muteko aka ni kikhuma muttetthe wa oBilbao. Nave-tho, Juan ni Maite yaahithaama. Mooriipiha murima kaahihiya omusoma Biibiliya. Masi, kaanisuwela wira miyo kaahiphwanya muhakhu. Nto nkaaliyala itthu iyo kaaxuttale aka.

Nuuvira iyaakha 20, kirina ene iyaakha 82, Juan ni Maite, yaahitthikela oBilbao ni akixukurya-tho. Kaahihakalala vanci owoona-tho! Kaahisuwela wira Yehova khaakiliyanle ni kaahitthikela omusoma Biibiliya. Juan ni Maite yaahikipixerya murima vanci, okhala wira miyo kaamakela opaka makoho mamosaru. Miyo kaahaana wiiwa malakiheryo a Biibiliya ikwaha sinceene wira kihiye sookupali saka sa khalai. Nave-tho kaaniphavela okhalana osuwela wooloka wira kiweryeke otthokiherya ikeekhai sa Biibiliya wa apatthani aka ni amusi aka.

Nto naahiphiya nihiku nootepexa ohakalaliha mookumini mwaka: nihiku kaabatiziwe aka kirina ene iyaakha 87. Ebatismo eyo yaapakiwe okathi wa muthukumano oniihaniwa asembeleya a Anamoona a Yehova. Mutokweene mmosa a eKristau aahilavula mwaha waakhuma mBiibiliyani yoowo waaroiheliwa ale yaarowa obatiziwa. Mwaha owo waahikivara murima mpakha omoroxa maithori. Okathi kaawiriyana aka mwaha owo, aakhala ntoko wira Yehova aalavula ni miyo. Nuumala obatiziwa, Anamoona anceene yaahirwa okittottopela, nnaamwi anceene a yaawo yahaatonko okisuwela!

MOOTA OTTOTTENLE AKA MUREERELO:

Okhuma khalai, miyo kaanisuwela wira Yesu ti “ephiró”. (Yohani 14:6) Masi, yoosoma ya Biibiliya yaahikikhaliherya omusuwela Yehova yoowo Yesu oniphavela awe wira nimurumeeleke. Vano kinniwerya onvekela Muluku ntoko Tiithi aka ni Mpatthani. Eliivuru Achegue-se a Jeová a, yookhaliherya vanci okumi aka. Wanipacerya, miyo kaahisoma eliivuru yotheene ohiyu omosa paahi! Kaahihakalala vanceene mwaha woosuwela wira Yehova toomoriwa ikharari vanci.

Vaavo kinuupuwela aka voohimya sa waavya waka ekeekhai, kinnuupuwelela masu a Yesu ani: “Nvekele: munovahiwa. Mphavele: munophwanya. Mmane mukhora: munohuleliwa”. (Matheyo 7:7) Vano koophwanya waakhuliwa wa makoho aka kaavyaka okhuma khalai. Eyo yookiphwanyiha ohakalala ni eparakha ya waaleela akina ikeekhai siixuntte aka.

Vano kirina aka iyaakha 90, nlelo kinoona wira kihaana wiixutta itthu sinci voohimya sa Yehova. Khula muthukumano oSalau wa Omwene, ori okathi wa vameekhaaya wira kixutte ikeekhai sa Biibiliya ni opatthana ni anna ni arokora. Tthiri, kinnilipelela moohakalala okhala prisoori eekeekhai eParayiisu ya valaponi enirwa. (Wisupulula 21:3, 4) Vanceenexa, kinnilipelela owoona ale yaaphenta aka akhwiiye okathi yoowo anrowa aya otthikela okhala akumi ni kikhalane eparakha yowiixuttiha ekeekhai ya Biibiliya. (Miteko 24:15) Tthiri, onrowa okhala okathi woohakalaliha waatthokiherya eparakha Yehova okivahale awe kuuluvanle ene!