Makoho Anipakiwa Ni Ale Anisoma Irevista Sahu

Okathi Yesu aahimeeryale awe aSaduki wira atthu anrowa ohihimuxiwa “khanthela, walá khantheliwa”. (Luka 20:34-36) Niireke owo aahimya ohihimuxeriwa ekumi ya valaponi?

▪ Nikoho nla ti nootthuneya, vanceenexa wa ale akhweliwe ole aathelanne aya. Atthu awo okathi mukina annuupuwela wira anootthikela othelana elapo esya nuumala ohihimuxiwa mutthu yoole aathelanne aya. Mulopwana mmosa naamukhweli aahimmye so: “Miyo ni mwaaraka khinilakenle omwalana. Yoolakela ahu waari omurumeela Yehova mowiiraana ntoko mutthu ni amwaarawe voohimala. Muupuwelo owo khokhumme mmuruni mwaka”. Niireke nookhala tthiri nthowa nooloka ninniiriha okupaliki wira atthu ale anrowa ohihimuxiwa anootthikela othelana? Waakhula mookhweya ti woowi hiyo khannisuwela.

Mwa iyaakha sinceene, iliivuru sahu saahimya wira masu a Yesu voohimya sa ohihimuxiwa ni othelana, yaalavula sa myaha sa valaponi; ni wira atthu yaale yaarowa ohihimuxiwa wira akhaleke elapo esya owehasa wene khiyaarowa othelaka.a (Math. 22:29, 30; Mar. 12:24, 25; Luka 20:34-36) Nnaamwi nihikhanle oolipiheryaka etthu emosa, masi niireke vamureerela ohimya wira masu a Yesu yaahimya atthu anrowa ohihimuxeriwa wiirimu? Nrowe nithokorerye ele Yesu aahimmye awe.

Nkahaya nwehe makhalelo a opuro ene Yesu aalavunle awe masu awo. (Mmusome Luka 20:27-33.) MaSaduki yaale yahaakupali wira vanniweryaneya ohihimuxiwa atthu akhwiiye, yaaphavela omoothiha Yesu, nto khupaka nikoho nle na ohihimuwa wa atthu ni makhalelo a naamukhweli.b Yesu aakhunle so ‘Vathí-va alopwana annithela, athiyana annitheliwa, nto ale onaphwanela oreriwa w’ohihimuwa . . . khanthela, walá khantheliwa. Awo khanweryatho okhwa, mana anolikana ni malaikha. Awo aná a Muluku, mana ahihimuwa’.​—Luka 20:34-36.

Moota xeeni iliivuru sahu saahimya aya wira woonasa wene Yesu aahimya ohihimuxiwa wa atthu a valaponi? Masu awo anivarihana ni miyuupuwelelo miili. Muupuwelo woopacerya, okhala wira vanuupuweliwa wira maSaduki ale woonasa wene yaahimya ohihimuwa wa valaponi, ni wira Yesu aakhunle ottharihelaka muupuwelo aya. Muupuwelo wa nenli, Yesu aahimaliha owaakhula omuromolaka Abrahamu, Isakhi ni Yakobe, yaawo ari amuhavinre oororomeleya aniwehererya ohihimuxeriwa ekumi valaponi.​—Luka 20:37, 38.

Masi, vanikhala ntoko wira Yesu aahimya ohihimuxiwa wa wiirimu. Nto exeeni enniiriha ohimyaka siiso? Nrowe nithokorerye ifrase piili sootthuneya.

‘Nto ale onaphwanela oreriwa w’ohihimuwa iwo’. MaKristau oowoottihiwa oororomeleya onnihimmwa wira ‘tamphwanela okela Momweneni’ mwa Muluku. (2 aTes. 1:5, 11) Awo aaphwanyihiwa exariya mwaha wa mukuttho, ni khanirowa okhwa mwaha wa itampi saya. (aRom. 5:1, 18; 8:1) Awo anihimmwa okhala “òttottopeliwa ni òreriwa” ni annooniwa oreerela ohihimuxeriwa ekumi wiirimu. (Wis. 20:5, 6) Voovirikana ni eyo, ale anrowa ohihimuxeriwa ekumi valaponi anniheliwa muhina atthu “òtakhala murima”. (Mit. 24:15) Nto niireke vannireerela ohimmwa wira awo “anniphwanela” ohihimuxiwa?

“Awo khanweryatho okhwa”. Yesu khonihimya wira: “Awo khanrowa okhwa-tho”. Masi owo onihimya wira “Awo khanweryatho okhwa”. ABiibiliya akina annitaphulela so masu awo “awo khanikhala-khala akhwa aka”, aahiiso,“okhwa khorina owerya mwa yaawo”. Alipa oowoottihiwa yaale animaliha muteko aya valaponi aryeene oororomeleya, yahihimuxiwa arowaka wiirimu annivahiwa ekumi ehinikhwa, eyo piiyo, ekumi ehinimala wala ehiniweryaneya opweteya. (1 aKor. 15:53, 54) Tthiri naakhwa khurina owerya wala waapwetexa ale anihihimuxeriwa ekumi wiirimu.c

Vano voohimya sa wiiwexexa moota ola, etthu xeeni ekhanle ahu oowiixutta? Masu a Yesu voohimya sa ohihimuxiwa ni othelana pooti ohimmwaka tthiri ale anihihimuxeriwa ekumi wiirimu. Nto vakhala wira ti siiso, masu ala annileela itthu sinceene voohimya sa ale anirowa wiirimu wira: Awo khanithelana, khanikhwa, ni wira awo anoolikana ni malaikha, eyo piiyo, awo soopattuxiwa sa omunepani sinikhala wiirimu. Masi wiiwexexa moota ola onnikumiherya makoho manceene.

Nikoho noopacerya, xeeni Yesu ohalaka oromola ohihimuxiwa wa wiirimu okathi aawaakhula awe maSaduki, yaawo yaalavula voohimya sa ohihimuxiwa wa atthu valaponi? Khahiyo wira khula okathi, Yesu aawakhula awanani awe ottharihelaka muupuwelo aya. Mwa ntakiheryo, okathi aYuda yanvekenle aya ethoonyeryo, owo aalavunle so, “Mpwexakase emp’ela ya Muluku, miyo kinoteka-tho yela muhiná mwa mahiku mararú” paahi. Yesu aanisuwela wira ale yaarowa wuupuwela empa ya Muluku. Masi “empa yahimyawe Yesu yari erutthu awe”. (Yoh. 2:18-21) Eyo enooniherya wira Yesu aarimoona wira khivaareerela owaakhula mooluluwanya aSaduki ale yahaakupali wira wookhala ohihimuxiwa ni wira aakhala malaikha. (Mir. 23:9; Math. 7:6; Mit. 23:8) Woonasa wene owo aaphavela owiixuttiha ekeekhai voohimya sa ohihimuxiwa wa ale anrowa wiirimu atthareli awe yaari eekeekhai, yaawo muhoolo mwaya, yaarowa ophwanela waakhela ohihimuwa iwo.

Nikoho na nenli, xeeni wuukiseryani wa masu a Yesu aaromonle awe Abrahamu, Isakhi ni Yakobe yaawo yaarowa ohihimuxeriwa ekumi valaponi? (Mmusome Matheyo 22:31, 32.) Moone wira Yesu ohinatthi waaromola amuhavinre ale aapacenrye ohimya wira “vano, mwaha w’ohihimuwa w’alipa-òkhwa”. Masu awo oopacerya anninikhaliherya woona wira owo aahimya etthu yoovirikana. Nuumala-vo, Yesu aahiromola nlamulo na Moise, nenlo aSaduki yaahimya aya wira yaanemya, nto Yesu aahirumeela masu yaale Yehova yaalavunle awe wa Moise okathi wa mwiri waavarela mooro, ophavelaka omooniherya wira waamukhala ohihimuwa tthiri valaponi ni wira eyo eniirela mpantta wa yoolakela ya Muluku.​—Okhu. 3:1-6.

Nikoho na neeraru, vakhala wira masu a Yesu voohimya sa ohihimuxiwa ni othelana wa atthu, waahimya ohihimuwa wa wiirimu, nto niireke ale anrowa ohihimuxeriwa ekumi valaponi anrowa oweryaka othelana? Nuulumo na Muluku khinnaakhula nikoho nla mooluluwanya. Vakhala wira tthiri masu a Yesu yaahimya sa ohihimuxiwa wa wiirimu, nto masu awo khiivo yaahimya aya yooniherya wira vanooweryaneyaka atthu anrowa ohihimuxiwa valaponi orowa othelanaka elapo esya.

Okathi omosaru, hiyo ninnisuwela wira Nuulumo na Muluku nnihimya wira okhwa toniwerya waavalaanya atthu athelanne. Tivonto, naamukheli muthiyana wala mulopwana ohikhanle awe oowoovaka okhalana nthowa vakhala wira oniphavela othela. Eyo yoothanla ya mutthu mwaneene, ni khivanithuneya waapwapwela atthu awo yaakhala wira animwavya mutthu mukina wira athelane.​—aRom. 7:2, 3; 1 aKor. 7:39.

Tthiri hiyo nookhalana makoho manceene voohimya sa ekumi ni makhalelo a elapo esya. Ohiya omananihaka waakhula makoho awo woonasa wene mwa enamuna yoohikhalela, yooreera nenna-va owehererya wira waphiya okathi owo nooneke ele enrowa okhumelela. Masi ehaavo etthu ekhanle ahu ookupalela wira: Apinaatamu otheene owiiwelela anrowa okhala oohakalala, okhala wira Yehova onrowa waaphwanyiha khula etthu enaathowa ni eniphavela aya mwa enamuna yooreerelexa eniweryaneya.​—Esal. 145:16.

[Inoota]