YOWIIRANEYA YA MOOKUMINI
Okumi Woohakalaliha Mmutekoni Mwa Muluku
Elavuliwe ni Peter Carrbello
Okhuma enamwane aka, kaanixankiheya mwaha wa nthalu ni kaanoova ohipaka saana itthu mwaha wa mukhalelo aka wowoova wooyaraniwa. Kilipelelaka ophwanya nikhaliheryo mBiibiliyani, kaahirowa Ekerexa Katoolika ya muttetthe ahu wira kikhaliheriwe omwiiwexexa. Masi, mwaha woohiphwanya etthu, kaahipacerya osiveliwa ni ajooku.
Moohipisa, kaahipacerya wiiniha nikuruta erutthu aka ni olipiha misiphe wala mitika saka. Muhoolo mwaya, kaahipaka eclubi aka yoowiiniha nikuruta erutthu, oSan Leandro, Califórnia, EUA, ni kaanivara muteko ni atthu akina, omuhela muhina mulopwana aaxinttale etthuvo ya Mr. America. Masi, okhalana erutthu yoosarya misiphe, khiwaakiirinhe ohakalala.
OPHAVELA WAKA EKEEKHAI ONNIREELIHIWA
Mpatthani mmosa kaavaranaka muteko, aanisuwela yoophavela aka ya omwiiwexexa Biibiliya. Nto, aahikitumererya okumana ni mutthu mukina aamusuwela awe. Mmeeloni mwaya voosisu, Namoona a Yehova aahirwa owannyaka. Mwa iwoora 4, aahaakhula makoho aka omurumeelaka Biibiliya. Kaahinvekela otthika ohiyu, nto nahivaanela voohimya sa Biibiliya mpakha ohiyu eriyari. Kaanisiveliwa ni ele kaixuttihiwa aka, ni kaahinvekela wira kimutthare mmeeloni mwaya wira koone moota aalaleerya awe. Kaahitikinihiwa moota aawerya awe omutthukula Biibiliya ni owooniherya atthu waakhuliwa wa makoho aya. Nto, kaahilakela opaka etthu emosaru!
Kaahimuhiya nakoso ni kinaviriha mahiku kilaleeryaka ni pioneero ole, ntoko aniitthaniwa aya arumeyi a okathi wotheene a Anamoona a Yehova. Maio a 1948, kaahibatiziwa okongresuni, wEstádio ya oCow Palace Arena São Francisco, oCalifórnia. Muhoolo mwaya, mwaakha yoole, kaahikela opioneero.
Okathi mukina, kaahinvekela Namoona mmosa wira aaxukurye amaama. Awo yaaheemya, ni moohipisa yaahikhala Namoona a Yehova. Nnaamwi yaalupatthiwa ni amusi aya, awo yaahimwaamini Muluku mpakha okhwa waya. Khuuvo mmusi aka mukina ori Namoona.
KINNIMUSUWELA OLE AAROWA OKHALA MWAARAKA
Eyaakha ya 1950, kaahithaamela oGrand Junction, oColorado, weiwo kaamusuwenle aka Billie. Owo aayariwe 1928 okathi wa ehasara ya othowa musurukhu wEstados Unidos. Amamawe yaitthaniwa Minnie. Awo yaanimusoma Biibiliya ohoolo wawe khula ohiyu erumeelaka elanterna. Okathi aarina awe iyaakha 4, Billie aanisuwela osoma ni aahihela mmuru myaha sinci sa mBiibiliyani. Iyaakha sa 1940, amamawe orweela wa yoosoma aya ni Anamoona a Yehova, yaahiixutta wira anamattheka khanihaaxiwa omooroni, maana alipa ookhwa khanisuwela etthu. (Musuweli 9:5, 10) Billie, amamawe ni aiyaya yaahikhala Anamoona a Yehova.
Eyaakha ya 1949, Billie aahimaliha osoma Universidade ya oBoston ni khupacerya omusoma Biibiliya mooluttuweliwa. Nto ohiya okhala prusoora, owo aahilakela wiivahererya wa Muluku. Aahibatiziwa eyaakha ya 1950 okongresuni wa Anamoona a Yehova wEstádio Yankee oNova York. Ohivinre okathi munceene nuumala kongresu ole, hiyo naahithelana ni khukela muteko wa okathi wotheene.
Naahipacerya olaleerya wEugene, wOregon, ni naahaapaka apatthani anci. Eyaakha ya 1953, nahiroihiwa oGrants Pass, wOregon wira nakhaliherye muloko mwaamukhaani wa muttetthe ole. Muhoolo nlelo mwaakha yoole, naahilattuliwa orowa eturma 23 ya Exikola ya oGileadi, yeeyo eniwiixuttiha mamisionaario a Anamoona, eniphwanyaneya Epantte ya okuusini ya oNova York, ikiloomo sowiiraka 400 wa oNova York.
MUTEKO WA OMISIONAARIO OBRASIL
Dezembro a 1954, myeeri 5 nuumala okhuma oGileadi, Billie ni miyo naahiwela eviyau yaamukhaani yaarowa oBrasil. Nuuvira ewoora emosa niryeene musulu, mutooro waahihononeya, masi eviyau yaaheemela moomaaleleya oBermuda. Nuumala weemela-tho mootutuxerya oCuba, ni oviriha iwoora 36 neettaka, naahiphiya ofiliyaali ya Anamoona a Yehova Rio de Janeiro, oBrasil.
Ovinre ene okathi vakhaani, miyo, Billie ni mamisionaario anli, naahirowa oBauru, São Paulo, wira nahule enupa esya ya mamisionaario. Epooma ele yaahikhala atthu yaavikana 50.000, nave hiyo naari Anamoona oopacerya.
Naahipacerya waaxukurya atthu vatthokoni vaya, masi moohipisa paadiri a ekerexa Katoolika aahikelela onilupattha. Owo aanintthara ni anaaleela atthu wira ehiniwiriyaneke. Masi, nuuvira myeeri vakhaani paahi, emusi emosa naasomana ahu Biibiliya yaaheemya ekeekhai ni khubatiziwa. Moohipisa, atthu akina yaahipacerya omusoma Biibiliya.
Emusi ele yaahikhalana mmusi mukina aari muhooleli a eclubi yoovuwa. Kaahipaka mareheryo wira namwiire asembeleya opuro ole. Okathi paadiri a aaphavela awe wira niheemiheriwe, muhooleli a eclubi aahaahimeerya atthu a eclubi ele wira: “Nyuwosa mwakhoottiherya muthukumano owo, miyo kinoohiya okhala mukhulupale a eclubi ela!” Nto muthukumano ahu aaheemereriwa.
Eyaakha ya 1956, naahilattuliwa orowa okongresuni a edistritu, aapakiwe oSantos, São Paulo. Anamoona oowiiraka 40 a muloko ahu yaahirowa ni Komboi. Nuumala otthikela oBauru, kaahiphwanya epaphelo yaakhuma ofiliyaali yeeyo yaahimya wira kaahithanliwa okhala mutokweene onixukurya miloko sa Anamoona a Yehova. Naahivara muteko owo mwa iyaakha sowiiraka 25, nixukuryaka mittetthe sinceene sa elapo ele yuulupale.
MOOTA NAALALEERYA AHU
Mahiku ale vaanixankiha weetta mukwaha. Nto naaniwerya olaleerya elapo yotheene ni karera, komboi, ekaaro, bisikleta, wala weetta mwentto. Epooma yoopacerya naaxukunrye ahu, waari oJaú, São Paulo. Nave-tho, paadiri mmosa aahinikhoottiherya olaleerya.
Owo aahimmye so: “Nyuwosa munlaleerya ‘ipwittipwitthi saka’!”
Hiyo naakhunle so: “Iya khahiyo ipwittipwitthi sanyu. Ti sa Muluku”.
Nto, naahipaka mareheryo wira nooniherye eviidiyu yaalavula sa muteko ahu woolaleerya olumwenku wotheene, yaahimya so: A Sociedade do Novo Mundo em Ação. Masi, paadiri ole aahivaanela ni atthu akina wira anituphele. Moohipisa, naahihimya opoliisia. Okathi paadiri ole ni atthu awe yaaphin’ye aya, yaahaaphwanya mapoliisia yeemenle ene vamukhora ni aphavelaka owoopela. Nto muttitthi wa atthu naalattunle ahu waahisiveliwa oweha eviidiyu ele.
Olupatthiwa iwo waaniireya mapuro manci naarumeela ahu. Mwa ntakiheryo, oBrusque waattamela oBlumenau, Santa Catarina, naahaaphwanya mapioneero manli yaalupatthiwa vanci. Masi, olipa waya murima ni ovilela wooreelihiwa. Nuuvira iyaakha 50, muttetthe ole sookhumelelela miloko sinivikana 60, ni Empa yooreera ya Asembeleya waattamela epooma ya Itajaí!
Etthu ehinliyalaka sa muteko ole wooweetteetta, waari okathi woohakalaliha naavara ahu muteko ni anna akina wira naalokiherye akongresu aalupale. Iyaakha sa 1970, kaahikhalana eparakha yorumeela ntoko mutokweene a kongresu, wEstádio yuulupale ya oMorumbi. Kaahivekela wira siroihiwe ipaphelo miloko sinceene saattamenle muttetthe ole, wira khula muloko erummwe anna 10 wira yareerihe estádio ele ohiyu wookiserya ahinatthi opacerya kongresu.
Okathi yaakhuma aya alipa yammana boola ohiyu ene yoole, akina yaahilavula mooveeha eriki: “Mwaweheke athiyana awo acikhaani akunxe mivelo ni mop”. Masi, mpakha ohiyu eriyari Estádio yotheene yaari yooreera! Muhooleli a Estádio aahimmye so: “Vaakhanle wira muteko ola waavariwa ni egrupu aka wammaliha esumana ntero, masi nyuwosa moovara mwa iwoora vakhaani paahi!”
OTTHIKELA WESTADOS UNIDOS
Eyaakha ya 1980 apaapa yaahikhwa. Moohipisa, naahitthikela wEstados Unidos wira naakhapelele amaama oFremont, Califórnia. Naahiphwanya muteko wooreeriha inupa ohiyu, nto khuvikaniha opioneero ahu naakhaliheryaka atthu yaalavula ekunya muttetthe ole. Naahithaamela waattamela oSan Joaquin, weiwo naaphavela ahu atthu yaalavula ekunya muttetthe ole muulupale, okhuma oSacramento mpakha oBakersfield. Vano, oCalifórnia sookhala miloko sa ekunya sowiiraka 10.
Nuumala amaama okhwa eyaakha ya 1995, nahithaamela oFlórida nto nnaakhapelela apapaya amwaaraka mpakha okhwa waya. Amamaya akhwiiye 1975. Mwaakha wa 2000, naahithaamela moothakoni wa oColorado. Nto ninrumeela muttetthe yoola ntoko mapioneero, naalaleeryaka atthu ephattu aya eri wAmerica, itakhwa sa muttetthe wa Navajo ni Ute. Mooriipiha murima, Billie ohookhwa Feverero 2014.
Kinnihakalala vanci mwaha woowi nuuvira iyaakha 65, komphwanya Namoona yoole aakhunle makoho aka manceene omurumeelaka Biibiliya! Nave, kinnihakalala mwaha woosuwela wira ele yaaxuttiha awe, ti yeeyo Biibiliya oniixuttiha awe tthiri. Eyo yookiphwanyiha mareeliho mmutekoni mwa Muluku.