Makoho Oowaakhuliwa

◼ Nimusomiheke mpakha silini, mutthu yoole onimwiixutta Biibiliya moorowa vahoolo?

Ti vookhalela ovikaniha omusomiha mutthu owo mpakha omaliha iliivuru piili, eyo piiyo, Biibiliya Oniixuttiha Exeeni Tthiri ni “Mukhaleke Mophentani Mwa Muluku”. Eyo ennivareleya muteko pooti mutthu owo oBatiziwaka ohinatthi omaliha iliivuru iyo piili. Akhala wira nimmusomiha mutthu yoole oBatiziwe, hiyo pooti ovikaniha okontari iwoora, mikwaha sootthikela ni yoosoma ya Biibiliya. Nave namalaleerya onirowana ahu pooti okontari iwoora.—Nwehe Nosso Ministério do Reino a Marso 2009 epax. 2.

Ti vootthuneya waakhaliherya anamalaleerya aniinaano wira akhalane mathipelo ooloka a ekeekhai nihinatthi waahiya mekhaya. Awo anitthuneya ‘wiixerihaka mitathari’ saya mwa Kristu ni ‘wilipiheryaka mowaminini’ wira awerye oxintta mixankiho sinirowa waaphwanya. (aKol. 2:6, 7; 2 Tim. 3:12; 1 Ped. 5:8, 9) Ohiya-vo, wira awo asuwele owiixuttiha atthu akina moovara murima, anitthuneya osuwelexa “ekekhai”. 1 Tim. 2:4. Akhala wira nnimwaakhaliherya omaleliha osoma iliivuru iyo piili, eyo enoowiiriha okhalana mathipelo ooloka a ephiro ‘enikeliha mwekumini’.—Math. 7:14.

Axitokweene ahinatthi weemererya wira mutthu oBatiziweke ahaana ottittimiherya wira asuwele akhala wira mutthu owo onniiwexexa sowiixuttiha soopacerya sa Biibiliya ni wira mweettelo awe onnivarihana ni ele yiixutte awe mBiibiliyani. Nave-tho axitokweene awo ahaana okhalana ephoole yinceene vaavo vanithokorerya aya makoho a obatizo ni mutthu yoole ohimalinhe osoma eliivuru yoopacerya. Akhala wira axitokweene annoona wira mutthu owo khoniphwanelela oBatiziwa, awo ahaana omuleela etthu enimuhalela wira muhoolo ophwanelele oBatiziwa.—Nwehe efolyeeto eni ‘Murowé, mwawixuttiheke Atthu, Mwabatizaka’, ipax 58-60

[Eponto yuulupale epaaxina 2]

Ti vootthuneya wa anamalaleerya aniinaano okhalana mathipelo ooloka a ekeekhai