“Mmananiheke okhalana wiiwanana omosa-ru onikumiheriwa ni ikuru soowaarya”
Murummwa Paulo aahaatumererya makristau a Wefeso, ohimyaka wiira: “Nvilelaneke mukina ni mukhwaawe, mphentanaka. Mmananiheke okhalana wiiwanana omosa-ru onikumiheriwa ni ikuru soowaarya, ni murettele onniiriha wiiraana.” — Aef. 4:2, 3.
Tthiri “wiiwanana” aahiiso wiiraana nirina ahu, onikumiheriwa ni “ikuru soowaarya”. Eyo enooniherya wiira ninniiraana mwaha woowi ninkhaliheriwa ni ikuru soowaarya sa Muluku. Masi ntoko murummwa Paulo aahimmye awe, nihaana wiimananiha wiira wiiraana wahu ohimale. Moota xeeni? Khula mukristau ohaana opaka ele oniwerya awe aahiiso mpantta awe, wiira omananihe okhaliha “wiiwanana omosa-ru onikumiheriwa ni ikuru soowaarya”.
Mwa ntakiheryo, nkuupuwelani vaakhanle wiira mutthu mukina ohoovahani ekaaro esya. Ti pani okhanle ookhapelelaka wiira ehihononeye? Moohaanyiherya, nyuwo munnisuwela waakhuliwa waya. Yahononeya mwaha woowi khamukhapelenle, nyuwo khamwaarowa onvaha nthowa mutthu oovahaleni.
Mwa enamuna emosa-ru, wiiraana wahu nivahiwe ni Muluku. Masi khula mutthu ohaana opaka ele oniwerya awe, wiira wiiraana iwo ohimale. Nto vakhala wiira khanniiwanana ni munna aahiiso murokora, vaamureerela wiikoha so: ‘Kiireke kinniimananiha okhaliha murettele mmulokoni?’
MMANANIHEKE OKHALANA WIIRAANA
Ntoko murummwa Paulo aahimyale awe, ikwaha sikina nihaana wiimananiha wiira niiraaneke ni atthu akina. Niireke nihaana opaka eyo okathi munna aahiiso murokora onnitthekela awe? Niireke okathi wootheene nihaana omwaavya mutthu owo wiira nimuleele aahiiso niphuke muxankiho owo? Nnaari. Niikoheke so: ‘Vakhala wiira kinoorowa okumana, kiireke kinoorowa omaliha muxankiho owo aahiiso kinrowa otepiha?’ Ikwaha sikina, ti vooloka oleva mwaha owo aahiiso olevelela ni murima wootheene. — Mir. 19:11; Mar. 11:25.
Niikoheke so: ‘Vakhala wiira kinoorowa okumana, kiireke kinoorowa omaliha muxankiho owo aahiiso kinrowa otepiha?
Murummwa Paulo aalempe wiira okathi wootheene, “nvilelaneke mukina ni mukhwaawe, mphentanaka.” (Aef. 4:2) Eliivuru emosa, ehimmye wiira opaka eyo ikwaha sikina vanitaphulela omuthokorerya “mutthu owo moovarihana ni makhalelo awe.” Eyo enitaphulela wiira nihaana weemererya wiira anna ni arokora, ayariwe arina ene etampi ntoko hiyo. Tthiri nihaana wiimananiha owara “omutthu musya”. (Aef. 4:23, 24) Moohaanyiherya, khuuvo mutthu okathi wootheene onipaka itthu sooloka. (Arom. 3:23) Vakhala wiira ninneemererya eyo, vanoonikhweela ovilelana mukina ni mukhwaawe, olevelelana ni “okhalana wiiwanana omosa-ru onikumiheriwa ni ikuru soowaarya.”
Mmulokoni, nnookhaliha “murettele onniiriha wiiraana”, vakhala wiira nnimwaalevelela ni oliyala itthu soohiloka anna ni arokora annipakela aya. Nuulumo na ekereku niri Aefeso 4:3, noowi “wiiraana”, ninnitaphuleliwa Akolosi 2:19, ntoko mapuro “munikhomanyiwa makhuva ni mitika.” Mwa ntakiheryo, sinnirumeeliwa ipaano soolipa wiira akhomanyiwe makhuva. Mwa enamuna emosa-ru, murettele ni waaphenta anna ni arokora, onoonikhaliherya ohihiya okhala apatthani aya, nnaamwi ikwaha sikina anipakelaka itthu soohiloka.
Nto okathi munna aahiiso murokora onnitthekela awe, wala onninyoonyiha awe, niimananiheke omoonela othunku ohiya omphukela. (Akol. 3:12) Okhala wiira niyariwe nirina ene etampi, ikwaha sikina nnoonyoonyihanaka mukina ni mukhwaawe. Vakhala wiira khaninrowa oliyala eyo, enoonikhaliherya “okhalana wiiwanana omosa-ru onikumiheriwa ni ikuru soowaarya”.