Etthu enrowa waakhaliherya athiyana anihasuliwa
“OLUMWENKU wootheene, athiyana imilyau sinceene akhale aximwali aahiiso nnaari, aatoko othokoreriwa moohiloka wala opakeliwa etthu yoohiloka. Niireke eyo yootoko owiiraneelani? Nrowe niwehe etthu enooniherya wiira Muluku oniphavela wiira mukhaleke moovareleleya ni etthu onrowa awe opaka wiira aakhaliherye athiyana ale anihasuliwa wala anipakeliwa itthu soohiloka.”
Moolumo awo akumihiwe mwaha ori esaiti jw.org, oni: “As mulheres e a sua segurança – O que diz a Bíblia”. Wanikisa wa epaaxina eyo, yookhala elinkhi mukhanle anyu ompaxari PDF a mwaha owo. Nyuwo pooti wimpirimiri ni okhuna enapakeya etukumento erina ipaaxina 4. Murokora mmosa onikhala wEstados Unidos, oniihaniwa Stacy, ohimmye so: “Miyo kihimpirimiri ikoopiya vakhaani sa mwaha owo. Nave miyo ni murokora mukina, naahikuxa ikoopiya iyo wiira naavahe athiyana ari mapuro anikhapeleliwa athiyana, muttetthe yoowo onilaleeriwa ni muloko ahu.”
Muthiyana mmosa onivara opuro owo, aahikikoha vakhala wiira kanwerya omuhiyerya ikoopiya sikina, wiira aakawele atthu akina anikhala muttetthe ole. Nto saahikaiwa ikoopiya 40 ni ikartau 30 sa esaiti jw.org. Nihiku nikina, mukhulupale mmosa muthiyana onihoolela mapuro ale, aahikivekela wiira kiwooniherye athiyana awo moota onipakiwa awe kursu a Biibiliya.
Murokora Stacy ni athiyana akina anli yaahaakhaliherya athiyana anikhapeleliwa mapuro makina. Nto yaahikawa ikoopiya 5 mapuro awo ni atthu akina yaahivekela wiira aruuheliwe ikoopiya sikina. Muthiyana mmosa onivara mapuro awo, ohimmye so: “Ikoopiya iyo sinimwaakhaliherya vanceene athiyana anikhala mapuro ala. Ti etthu naapirisari ahu.” Nuuvira okathi, athiyana anceene yaahithukumana wiira awehe moota onipakiwa awe kursu a Biibiliya. Nto athiyana anli, yaahihimya wiira yaaniphavela orowa oweha mithukumano sinipakiwa Empa ya Omwene wanikisa wa esumana ele.
Stacy onihimya so: “Yaari etthu yoovara murima waaweha atthu ale ahakalanle ene, nuumala osoma mwaha ole. Nuumala wimpirimiri ni okhuna efolyeeto ele, enikhala yooreera para waaleela muhupi wa Omwene athiyana ale anihasuliwa. Vaari voohakalaliha oweha moota atthu ale yeemererya aya muhupi ori efolyeeto ele. Ninnilipelela oweha moota Yehova onrowa awe okhaliherya wiimananiha wahu, wiira nihihiye waaleela athiyana awo ihapari sooreera.