Yaaqoobi Xaafidoogaa
4 Intte olettiyoynne ooyettiyoy aybissee? Hegeetuyyo denddoy intte giddon olettiyogaa aggenna, intte ashuwa amuwa gidennee? 2 Intte dumma dummabaa amottikkonne, hegee intteyyo deꞌenna. Intte woriyogaanne qaaqqatiyogaa aggekketa; gidoppe attin, ekkana danddayekketa. Intte olettiyogaanne ooyettiyogaa aggekketa. Intte oychchenna gishshawu ekkekketa. 3 Intte oychchiyo wodekka oychchiyo gaasoy bala, qassi intte ashoy amottiyobaa oottanaassa gidiyo gishshawu ekkekketa.
4 Wodiraa laammiyageetoo,* ha saꞌaa asaara laggetiyogee inttena Xoossaa morkke oottiyogaa erekketii? Hegaa gishshawu, ha saꞌaa asaara laggetanawu koyiya ooninne bana Xoossaa morkke oottees. 5 Woy Geeshsha Maxaafay, “Nu giddon deꞌiya ayyaanay qanaatiyogaanne amottiyogaa aggenna” yaagiyogee hada giidi qoppeetii? 6 Gidoppe attin, I kehiyo laggetiyabi baynna kehatettay he ayyaanaappe aadhdhees. Hegaa gishshawu, Geeshsha Maxaafay, “Xoossay otorettiyageetun ufayttenna, shin I ziqqi giyageetuyyo laggetiyabi baynna kehatettaa kehees” yaagees.
7 Hegaa gishshawu, Xoossaayyo haarettite, shin Dabloosa eqettite; I intteppe baqatana. 8 Xoossaakko shiiqite, qassi I inttekko shiiqana. Nagaranchchatoo, intte kushiya geeshshite, qassi qashoy baynnaageetoo, intte wozanaa geeshshite. 9 Kayyottite, zilaalitenne yeekkite. Miicciyogaa aggidi zilaalite, qassi ufayttiyogaa aggidi kayyottite. 10 Yihoowa sinttan ziqqi giite, qassi I inttena xoqqu oottana.
11 Ishatoo, issoy issuwa boriyogaa aggite. Ba ishaa boriya woy ba ishaa bolli pirddiya ooninne higgiya borees, qassi higgiya bolli pirddees. Neeni higgiya bolli pirddikko, daannappe attin, higgiyadan oottiyagaa gidakka. 12 Higgiya Immiyageenne Daannay ashshananne xayssana danddayiya issi Xoossaa xalaala. Shin ne shooruwa bolli pirddanawu neeni oonee?
13 “Nuuni hachchi woy wontto he katamaa biidi yan issi layttaa takkana, qassi zalꞌꞌidi miishshaa demmana” yaagiyageetoo siyite: 14 wontto intte deꞌoy waananaakko intte erekketa. Ayssi giikko, intte guuttaa takkidi xayi bayiya xaaza. 15 Shin intte, “Yihoowa shene gidikko, nuuni deꞌananne hagaa woy hegaa oottana” yaagana koshshees. 16 Shin intte mela ceeqettiyogan otoretteeta. Hegaa mala ceeqoy iita. 17 Hegaa gishshawu, issi asi I ay oottana koshshiyakko erikkonne hegaa oottana xayikko, nagaraa oottees.