Ufayssiya Deꞌuwaa Deꞌanawu Loꞌꞌo Asa Gidiyoogaa Xallay Maaddii?
Loꞌꞌo asa gidiyoogaa xallay sinttappe ufayssiya deꞌuwaa demissees giidi xeetan qoodettiya layttawu daro asay qoppiiddi takkiis. Leemisuwawu, Konffiishees (551-479 K.K.) giyo erettida palasppay yootidobaa Isiyan deꞌiya daro asay maayettees; I hagaadan giis: “Asi ne bolli oottanaadan neeni koyennabaa hara asaa bolli oottoppa.”
UFAYSSAA DEMMANAWU DARO ASAY OOTTIYOOBAA
Loꞌꞌo asa gidiyoogaa xallay sinttappe ufayssiya deꞌuwaa demissees giidi daro asay qoppees. Asay bonchchettanawu, loꞌꞌo kandduwaa bessanawu, baappe koyettiyaabaa polanawunne loꞌꞌo kahaara deꞌanawu baaxetees. Veetinaamen deꞌiya Lin giyo maccaasiyaa hagaadan gaasu: “Taani ammanettiyaanne tumanchcha asa gidikko ufayssiyaa deꞌuwaa demmana gaada ammanaydda takkaas.”
Issoti issoti bantta haymaanootiyan tamaaridobaa gaasuwan loꞌꞌobaa oottanawu baaxetoosona. Taywaanen deꞌiya Hisu-Yun giyo bitanee hagaadan giis: “Issi uri paxa deꞌiiddi oottidobay, I hayqqi simmidi merinawu ufayttanaadan woy tuggatanaadan oottees giyo timirttiyaa tamaaraas.”
LOꞌꞌO ASA GIDIYOOGAA XALLAY UFAYSSAA DEMISSII?
Haratussi loꞌꞌobaa oottiyoogee, daroban nuna goꞌiyoogee tuma. SHin, haratuyyo loꞌꞌobaa oottanawu baaxetida daroti eti naagidobaa demmibookkona. Hong Kongen deꞌiya Siyu Pingo giyo maccaasiyaa hagaadan gaasu: “Loꞌꞌobaa oottiya asay ubbatoo ufayttennaagaa ta deꞌuwan hanidabaappe akeekaas. Ta so asawu koshshiyaabaa kunttanawunne loꞌꞌobaa oottanawu taayyo danddayettida ubbabaa oottaas. SHin ta azinay tananne ta naꞌaa aggidi biis.”
Asay loꞌꞌo gidanaadan oottiyay ubba haymaanootiyaa gidennaagaa daroti akeekidosona. Jaappaanen deꞌiya Etisuko giyo maccaasiyaa hagaadan gaasu: “Taani issi haymaanootiyaa yame gida simmada hegan deꞌiya yelagati oottiyoobaa darajjayiyoogaa doommaas. Taani he haymaanootiyaa asay kandduwan moorettidoogaa, maatawu keesettiyoogaanne woosa keettaa miishshaa balibakkiyoogaa akeekada keehi dagammaas.”
“Ta so asawu koshshiyaabaa kunttanawunne loꞌꞌobaa oottanawu taayyo danddayettida ubbabaa oottaas. SHin ta azinay tananne ta naꞌaa aggidi biis.”—SIYU PINGO, HONG KONGE
Haymaanootiyaa mintti kaalliyaanne loꞌꞌobaa oottanawu baaxetiya issi issi asati bantta bolli iitabay gakkido gishshawu hidootaa qanxxidosona. Veetinaamen deꞌiya Vano giyo maccaasiyaa hegaadan qoppaasu. A hagaadan gaasu: “Taani sinttappe anjjuwaa demmana gaada, ubba gallassi miyo mittaa ayfeta, ciishshatanne qumaa shammada ta mayzza aawatussi yarshshiyo sohuwan bassaa wottays. Taani daro layttawu loꞌꞌobaa oottiyaabanne ammano wogata poliyaaba gidikkonne ta azinay iita harggiis. Qassikka ta naꞌiya hara biittan tamaaraydda yelagatettan hayqqaasu.”
Loꞌꞌo asa gidiyoogaa xallay nuuni sinttappe ufayssiya deꞌuwaa demmanawu maaddennaba gidikko, yaatin aybi maaddanee? Ha oyshaa zaaranawu ammanttiya kaaletuwaa koshshees. He kaaletuwawu pultto gididaagee nu oychchiyo oyshaa zaarananne ufayssiya deꞌuwaa demmanaadan maaddana danddayees. Hegaa mala kaaletuwaa awuppe demmana danddayiyoo?