Ximootiyosassi Xaafettida Koyroogaa

2 Hegaa gishshawu, ubbaappe aaruwan, asa qommo ubbaassi Xoossawu watiwatanaadan, A woossanaadan, haratussi oychchanaadaaninne galatanaadan zorays; 2 kawotuyyonne maataawatu* ubbaayyokka woossite; hegaappe denddidaagan, nuuni wozanappe Xoossaayyo ammanettidinne tishsha gididi woppu giidi saruwan deꞌana danddayoos. 3 Hagee nuna ashshiya Xoossaa sinttan loꞌꞌobanne ufayssiyaba; 4 I asa qommo ubbay attanaadaaninne tumaa geeshshidi eranaadan koyees. 5 Issi Xoossay deꞌees, qassi Xoossaanne asaa giddon maacissiya issi asi, Kiristtoos Yesuusi deꞌees; 6 I ubbaa* wozanawu qanxxiyobaara lagge gidida ba deꞌuwa immiis; asay hegaa A wodiyan yootana. 7 Taani hegaa markkattanaadaaninne awaajjanaadan Xoossay tana kiitettidaagaa oottidi sunttiis; hegaa gishshawu, taani ammanuwabaanne tumaabaa hara biittaa asaa tamaarissana danddayays; taani worddotikke, tumaa yootays.

8 Hegaa gishshawu, Xoossawu ammanettiya attuma asati ubbasan hanqqettennaaninne palamettennan bantta kushiya pude denttidi woossiyogaa aggenna mala koyays. 9 Hegaadankka, macca asay asi woyganddee giidi suure qoppidi maara* maayiyogan puulattanaadan koyaysippe attin, huuphiya lilꞌꞌi daddiyogaaninne worqqan woy inqquwan woy alꞌꞌo maayuwan puulattanaadan koyikke; 10 shin eti Xoossawu ammanettays giya macca asawu bessiyagaadan, hegeekka, loꞌꞌobaa oottiyogan puulattana koshshees.

11 Tamaariyo* wode, macca asay ziqqi gaananne sirphphi* gaana koshshees. 12 Taani macca asi tamaarissanaadan woy attuma asa bolli aawatanaadan anttikke, shin A sirphphi* gaana koshshees. 13 Ayssi giikko, Xoossay koyro Addaama medhdhiis,* hegaappe simmin Hewaano medhdhiis. 14 Qassi Addaamee cimettibeenna, shin maccaasiya mule cimettaasunne nagaraa oottaasu. 15 Gidoppe attin, A* ubbatoo ammanuwan, siiquwan, geeshshatettaaninne suurebaa qoppaydda deꞌikko, naata yeliyogan naagettada* deꞌana.