Yohaannisi Xaafido Koyroogaa
5 Yesuusi Kiristtoosa gidiyogaa ammaniya ubbay Xoossaa naꞌa, qassi Aawaa siiqiya ubbay A naatakka siiqees. 2 Nuuni Xoossaa siiqiyonne A azazota naagiyo wode, Xoossaa naata siiqiyogaa eroos. 3 Ayssi giikko, Xoossaa siiqiyogee A azazota naagiyogaa; qassi A azazoti keehi wayssiyabata gidokkona; 4 ayssi giikko, Xoossaa naꞌi ubbi* saꞌaa asaa xoonees, qassi saꞌaa asaa xoonida xoonoy hegaa, hegeekka, nu ammanuwa.
5 Saꞌaa asaa xoonana danddayiyay oonee? Yesuusi Xoossaa Naꞌaa gidiyogaa ammaniya asa gidennee? 6 Yesuus Kiristtoosi haattaaninne suuttan yiis; I haattaaranne suuttaara yiisippe attin, haattaa xalaalaara yibeenna. Qassi ayyaanay markkattiyobay tuma gidiyo gishshawu, ayyaanaykka hegaa markkattees. 7 Hegaa markkattiya heezzubati deꞌoosona: 8 ayyaanaa, haattaanne suuttaa; qassi ha heezzati maayettoosona.
9 Nuuni asi markkattiyobaa ekkoos, shin Xoossay markkattiyobay hegaappe aadhdhees. Ayssi giikko, Xoossay markkattiyobay hagaa: hegeekka, I ba Naꞌaabaa markkattidobaa. 10 Xoossaa Naꞌaa ammaniya asa wozanan he markkatettay deꞌees. Xoossaa ammanenna asi Xoossay ba Naꞌaabaa markkattidobaa ammanibeenna gishshawu, A worddanchcha kessees. 11 Markkatettay hagaa: hegeekka, Xoossay nuuyyo merinaa deꞌuwa immidoogaa, qassi he deꞌoy A Naꞌan deꞌees. 12 Naꞌaa kaalliya asassi he deꞌoy deꞌees, shin Xoossaa Naꞌaa kaallenna asassi he deꞌoy baawa.
13 Xoossaa Naꞌaa sunttan ammaniya intteyyo merinaa deꞌoy deꞌiyogaa intte erana mala hageeta intteyyo xaafays. 14 Nuuni an ammanettiyobay* hagaa: nuuni I koyiyogaadan aybanne oychchikko, I siyees. 15 Nuuni oychchiyo aybiiranne gayttidabaa I siyiyogaa eriyo gishshawu, nuuni A oychchidobaa ekkanaagaa ammanettoos.
16 Ooninne ba ishay hayquwawu efeenna nagaraa oottishin beꞌikko, I awu woossana, qassi Xoossay ayyo deꞌuwa immana; ee, hayquwawu efeenna nagaraa oottidaageetuyyokka I yaatana. Hayquwawu efiya nagaray deꞌees. He nagaraara gayttidaagan I woosso giikke. 17 Suure gidennabay ubbay nagara; gidoppe attin, hayquwawu efeenna nagaray deꞌees.
18 Xoossaa naꞌi ubbi nagaraa oottennaagaanne Xoossaa Naꞌay A naagiyo gishshawu iitay* A oyqqana danddayennaagaa* eroos. 19 Nuuni Xoossaageeta gidiyogaa eroos, shin kumetta saꞌay iitaa wolqqaa garssan deꞌees. 20 Shin nuuni Xoossaa Naꞌay yiidoogaa eroos, qassi nuuni tumu Xoossaa eranaadan I nuuyyo akeekaa immiis. Hegaa bollikka, nuuni A Naꞌaa Yesuus Kiristtoosan tumu Xoossaara issuwa gidida. I tumu Xoossaanne merinaa deꞌuwa pulttuwa. 21 Naatoo, eeqatuppe naagettite.*