Tiitussi
1 Hagee Xoossay dooridoogeetu ammanuwaranne tumu timirttiya geeshshi eridi Xoossawu wozanappe goynniyogaara gayttidaagan Xoossaa aylleenne Yesuus Kiristtoosi kiittido taani Phawuloosi xaafidoogaa; 2 ha ubbabawu kanee* merinaa deꞌuwa hidootaa. Worddotenna Xoossay he hidootaa daro wodiyappe kase yootiis. 3 Shin I mishiraachchuwa awaajjissiyogan ba keerido wodiyan ba qaalaa erissiis; nuna ashshiya Xoossaa azazuwadan hegaa awaajjanawu taani sunttettaas. 4 Nuugaadankka ammaniya, taayyo tumu naꞌa mala gidida Tiitoo, neessi hagaa xaafays:
Laggetiyabi baynna Xoossaa nu Aawaa kehatettaynne sarotettay, qassi nuna ashshiya Kiristtoos Yesuusaagee neeyyo gido.
5 Suurissana bessiyabata neeni suurissana malanne taani nena azazidoogaadan, katamatu ubban cimata sunttana mala, nena Qarxxeesen aggada yaas. 6 Galchchaa cimay asi amassalennaagaa,* issi machchee azinaa, shoraa xayidoogaa* woy azazettibeennaagaa gaasuwan asi amassalenna ammaniya naati deꞌiyogaa gidana bessees. 7 Ayssi giikko, issi cimay Xoossaayyo haggaaziyo gishshawu, asi amassalennaagaa, zozzu geennaagaa, elle hanqqettennaagaa, mattottennaagaa, kobattennaagaa,* miishshawunne aquwawu yaaretennaagaa gidana bessees. 8 Shin I imattaa mokkiyagaa, loꞌꞌobaa dosiyagaa, suure qoppiyagaa, xillo, ammanettiyagaa, bana naagiyagaa gidana bessees; 9 qassi I tamaarissiyo ogee tumu* qaalaara maayiyaba gidana bessees; yaatikko, tumu* timirttiyan zoranawunne* he timirttiya phalqqiya asata seeranawu danddayees.
10 Ayssi giikko, makkalanchchati, pattennabaa haasayiyageetinne balettiyageeti daroti deꞌoosona; eta giddon daroti qaxxaraa wogaa mintti kaalloosona. 11 He asati banttawu goꞌettanawu yaaretidi, tamaarissana bessennabaa tamaarissiyogan issi issi keettaa asay ammaniyogaa muleera agganaadan oottiyo gishshawu, eti haasayennaadan diggana koshshees. 12 Hiraagiya eta biittaa asa issoy, “Qarxxeese asati ubbatoo worddotiyageeta, qassi iita doꞌaa malanne azalla yoranchcha” yaagiis.
13 I giidobay tuma. Hegaa gishshawu, eti ammanuwan minnanaadan minttada seeriyogaa aggoppa; 14 qassi tumu timirttiya aggidaageeti azaziyobaanne Ayhudatu haysiya ezggennaadankka seera. 15 Geeshsha asatuyyo ubbabay geeshsha; shin geeshsha gidennaageetuyyonne ammanoy baynnaageetuyyo geeshshabi baawa. Ayssi giikko, eta qofaynne eta kahay moorettiis. 16 Eti Xoossaa eriyogaa awaajjoosona, shin eta oosoy eti A kaddidoogaa bessees; ayssi giikko, Xoossay eta shenetiyo gishshawunne eti awu azazettenna gishshawu, I ayba loꞌꞌo oosuwawunne eta doorenna.