Yohaannisi Xaafido Koyroogaa
2 Ta naatoo, intte nagaraa oottenna mala hagaa intteyyo xaafays. Shin ooninne nagaraa oottikko, nuna maaddiya* xilloy, Yesuus Kiristtoosi Aawaara deꞌees. 2 I nuna Xoossaara sigettanawu* nu nagaraa gishshawu yarshshettiis, shin nu nagaraa xallaassa gidennan, saꞌan deꞌiya asaa ubbaa nagaraa gishshawu yarshshettiis. 3 Qassi nuuni ubbatoo A azazota naagikko, A eriyogee hegan erettees. 4 “Taani A erays” giiddi, A azazota naagenna asi worddanchcha, qassi tumay an baawa. 5 Shin A qaalaa naagiya ooninne tumuppe Xoossaa siiqiyogee erettees. Nuuni aara issuwa gidiyogaa hegan eroos. 6 Aara issuwa gidada deꞌays giya asi Yesuusi hemettidoogaadan hemettana bessees.
7 Taani siiqiyogeetoo, taani intteyyo xaafiyo azazoy doomettaappe intte siyido beniigaappe attin, ooratta azazo gidenna. Ha beni azazoy intte siyido qaalaa. 8 Hegaa bollikka, I naagidonne inttekka naagiyo ooratta azazuwa taani intteyyo xaafays; ayssi giikko, xumay kichchiiddi deꞌees, qassi tumu pooꞌoy pooꞌiiddi deꞌees.
9 Pooꞌuwan deꞌays giiddi ba ishaa ixxiya asi xuman deꞌees. 10 Ba ishaa siiqiya asi pooꞌuwan deꞌees, qassi xubettanaadan oottiyabi an baawa. 11 Shin ba ishaa ixxiya asi xuman deꞌeesinne xuman hemettees, qassi xumay A ayfiya qooqissido gishshawu, I awa biyakko erenna.
12 Taani siiqiyo naatoo, A sunttaa gaasuwan intte nagaray atto geetettido gishshawu, intteyyo xaafays. 13 Aawatoo, doomettaappe deꞌiyagaa intte erido gishshawu, intteyyo xaafays. Yelagatoo, intte Dabloosa* xoonido gishshawu, intteyyo xaafays. Naatoo, intte Aawaa erido gishshawu, intteyyo xaafays. 14 Aawatoo, doomettaappe deꞌiyagaa intte erido gishshawu, intteyyo xaafays. Yelagatoo, intte mino gidiyo gishshawu, Xoossaa qaalay inttenan deꞌiyo gishshawunne intte Dabloosa xoonido gishshawu, intteyyo xaafays.
15 Saꞌaa* woy saꞌan deꞌiyabaa siiqoppite. Ooninne saꞌaa siiqikko, Aawaa siiqoy an baawa; 16 ayssi giikko, saꞌan deꞌiya ubbabay, hegeekka, ashuwa amoy, ayfee amottiyobaynne bawu deꞌiyaban axiraariyogee* saꞌaappe pulttiyabappe attin, Aawaappe pulttiyaba gidenna. 17 Hegaa bollikka, saꞌaynne A amoy kichchiiddi deꞌees, shin Xoossay koyiyobaa oottiya asi merinawu deꞌana.
18 Naatoo, hagee wurssetta saate, qassi intte siyidoogaadan, Kiristtoosaara gaaddetiyagee yiiddi deꞌees; Kiristtoosaara gaaddetiya daroti haray atto haꞌꞌikka denddidosona; hegaa gishshawu, hagee wurssetta saate gidiyogaa eroos. 19 Eti nu giddoppe kiyidosona, shin nu mala* gidokkona; ayssi giikko, eti nu mala gidiyakko nunaara deꞌana. Shin ubbay nu mala gidennaagee erettana mala, eti nu giddoppe kiyidosona. 20 Hegaa bollikka, geeshshay inttena dooriis, qassi inttessi ubbaassi eray deꞌees. 21 Intte tumaa erenna gishshataassa gidennan, intte tumaa eriyo gishshawunne worddobi aybinne tumaappe pulttenna gishshawu, intteyyo xaafays.
22 Yesuusi Kiristtoosa gidiyogaa kashi erikke giya urappe attin, worddanchchay oonee? Kirsttoosaara gaaddetiyagee hegaa; I Aawaanne Naꞌaa kashi erikke gees. 23 Naꞌaa kashi erikke giya ooyyonne Aawaykka baawa. Shin Naꞌaa ammanays giya ooyyonne Aawaykka deꞌees. 24 Intte doomettaappe siyidobay inttenan deꞌana bessees. Intte doomettaappe siyidobay inttenan deꞌikko, Naꞌaarakka Aawaarakka issuwa gididi deꞌana. 25 Hegaa bollikka, I nuuyyo immana giidobay merinaa deꞌuwa.
26 Taani inttena balettanawu maliyageetubaa hageeta intteyyo xaafays. 27 Hegaa bollikka, Xoossay inttena ba ayyaanan dooriisinne he ayyaanay inttenan deꞌees, qassi inttena ooninne tamaarissana koshshenna; I inttena doorido dooruwappe denddidaagan, intte ubbabaa tamaariiddi deꞌeeta, qassi hegee tuma, worddo gidenna. He dooruwan intte tamaaridoogaadan, aara issuwa gididi deꞌite. 28 Simi naatoo, aara issuwa gididi deꞌite; yaatikko, I qoncci beettiyo wode yayyennan haasayana danddayoos, qassi I simmidi nunaara takkiyo wode yeellatidi A sinttappe wora beennan aggana danddayoos. 29 Intte I xillo gidiyogaa erikko, xillobaa oottiya ubbay appe yelettidoogaakka ereeta.