Qoronttoosa Asaassi Xaafettida Koyroogaa
12 Ta ishatoo, Xoossay immiyo imotaabaa intte loytti eranaadan taani koyays. 2 Intte ammaniya asa gidibeenna wode, haasayenna eeqa misileti inttena kaalettiyosaa awanne kaallidi, etayyo goynnidoogaa ereeta. 3 Ooninne Xoossaa ayyaanay maaddin haasayiyaba gidikko, “Yesuusi qanggetto!” gaana danddayennaagaanne ooninne geeshsha ayyaanay maaddin haasayennaba gidikko, “Yesuusi Goda!” gaana danddayennaagaa intte eranaadan koyays.
4 Dumma dumma imotati deꞌoosona, shin ayyaanay issuwa; 5 qassi dumma dumma haggaazati deꞌoosona, shin Goday issuwa; 6 qassi asay darobaa oottanaadan geeshsha ayyaanay eta giddon dumma dumma ogiyan oottees, shin asi ubbi hegeeta ubbaa oottanaadan maaddiyagee issi Xoossaa. 7 Shin asi ubbi harata goꞌꞌiyabaa oottanaadan geeshsha ayyaanay A maaddiyogee qoncci beettees. 8 Ayssi giikko, issoy hayyuwa yootanaadan he issi ayyaanay maaddees, qassi haray eraa yootanaadan he ayyaanay maaddees, 9 he issi ayyaanan issuwawu ammanoy, qassi harawu harggidaageeta pattiyo imotay imettees, 10 he issi ayyaanan harawu malaaliyabata oottiyo, harawu Xoossay erissidobaa yootiyo, harawu odettidabay Xoossaappe gidiyogaa woy gidennaagaa akeekiyo, harawu dumma dumma doonata* haasayiyo, qassi harawu dumma dumma doonata birshshiyo imotay imettees. 11 Shin ubbawu ba koyiyogaadan gishidi, he oosota ubbaa oottiyagee he issi ayyaanaa.
12 Bollay issuwa gidikkonne shaahoti daro gidiyogaadan, qassi shaahoti daro gidikkonne bollay issuwa gidiyogaadan, Kiristtoosa bollaykka hegaadaana. 13 Ayssi giikko, nuuni Ayhuda woy Giriike, woykko aylle woy goqa gidin, issi ayyaanan muukettida, qassi issi bolla gidida; hegaa bollikka, nuuni ubbay issi ayyaanaa ekkida.
14 Ayssi giikko, issi shaaho xalla gidennan, daro shaahoti issippe issi bolla gidoosona. 15 Tohoy, “Taani kushe gidenna gishshawu, bollaa shaaho gidikke” giyakkokka, I bollaa shaaho gidiyogee attenna. 16 Qassi hayttay, “Taani ayfe gidenna gishshawu, bollaa shaaho gidikke” giyakkokka, I bollaa shaaho gidiyogee attenna. 17 Kumetta bollay ayfe gidiyakko, I waati siyanee? Kumetta bollay haytta gidiyakko, I waati singganee? 18 Shin Xoossay bollaa shaahota ba koyidoogaadan eta sohuwan sohuwan wottiis.
19 Bollaa shaahoti ubbay issi mala gidiyakko, waanidi bollaa gidanee? 20 Shin shaahoti cora gidikkokka, issi bolla. 21 Ayfee kushiya, “Neeni taassi koshshakka” gaanawu danddayenna, woy qassi, huuphee tohuwa, “Neeni taassi koshshakka” gaanawu danddayenna. 22 Gidoppe attin, bollaa shaahotuppe darin koshshennaba milatiyageetikka keehi koshshoosona, 23 qassi nuuni bollaa shaahotuppe darin bonchchettennaba giidi qoppiyogeeta haratuppe aaruwan bonchchoos; hegaa gishshawu, bollaa shaahotuppe yeellayiyageeta haratuppe aaruwan bonchchoos, 24 shin loꞌꞌiya bollaa shaahotussi bonchchoy koshshenna. Gidoppe attin, Xoossay bollaa shaahotuppe darin bonchchettennaageeti haratuppe aaruwan bonchchettanaadan oottidi bollaa waaxiis; 25 hegaappe denddidaagan, bollaa shaahoti issoy issuwawu qoppana koshsheesippe attin, bollay shaahettana koshshenna. 26 Bollaa shaahotuppe issoy qohettikko, harati ubbay aara issippe seelettoosona; woykko etappe issoy bonchchettikko, hara shaahoti ubbay aara issippe ufayttoosona.
27 Intte Kiristtoosa bollaa, qassi intte ubbay A bollaa shaaho. 28 Qassi Xoossay galchchan deꞌiyageeta hagaadan mooddiis: koyro, kiitettidaageeta; naaꞌꞌantto, Xoossay erissidobaa yootiyageeta; heezzantto, asttamaareta; yaatidi malaaliyabata oottiyageeta, harggidaageeta pattiyo imotaa, harata maaddiyageeta, kaalettiyo hiillaa, qassi dumma dumma doonata haasayiyageeta. 29 Eti ubbay kiitettidaageetee? Eti ubbay Xoossay erissidobaa yootiyageetee? Eti ubbay asttamaaretee? Eti ubbay malaaliyabaa oottiyonaa? 30 Eti ubbay harggidaageeta pattiyo imotaa ekkidonaa? Eti ubbay dumma dumma doonata haasayiyonaa? Eti ubbay birshshiyageetee?* 31 Shin haratuppe aadhdhiya imotata ekkanawu baaxetiyogaa* aggoppite. Gidoppe attin, haratuppe keehi aadhdhiyabaa taani inttena bessana.