Yaaqoobi Xaafidoogaa
5 Dure asatoo, siyite; intteyyo tiran kiyana kayyuwawu yeekkitenne zilaalite. 2 Intte duretay wooqqiis, qassi intte maayuwa bilꞌꞌay miis. 3 Intte worqqaynne biray shiyiis, qassi shiyidaagee intte bolli markkattananne intte ashuwa tamaadan maana. Intte dagayidobay wurssetta gallassatun tama mala gidana. 4 Beꞌite! Intte gadeppe kattaa cakkida oosanchchatuyyo miishshaa intte immibeenna gishshawu, eti Xoossawu waassoosona; eti banttana saluwa kiitanchchata haariya Yihoowi maaddana mala waassiyogaa I siyiis. 5 Intte saꞌan keehi ishalidi deꞌidetanne koyidobaa aybanne oottideta. Intte wozanaynne shuhettiyo gallassay gakkanaashin modhdhiya mehee issi mala. 6 Intte callideta; xilluwa worideta. I intteban ufayttenna.
7 Hegaa gishshawu, ishatoo, Goday simmidi nunaara takkiyo wodee gakkanaashin danddayite. Beꞌite! Goshshanchchay badhdheesaa iraynne balgguwa iray bukkana gakkanaashin danddayidi, biittay ayfiyo loꞌꞌo ayfiya naagiiddi takkees. 8 Inttekka danddayite; Goday simmidi nunaara takkiyo wodee matido gishshawu, intte wozanaa minttite.
9 Ishatoo, Goday intte bolli pirddenna mala, issoy issuwa bolli zuuzummoppite.* Beꞌite! Daannay penggen eqqiis. 10 Ishatoo, Yihoowa sunttan I erissidobaa yootidaageetudan hanite; eti daro ogiyan waayettidosonanne danddayidi genccidosona. 11 Beꞌite! Nuuni genccidaageeta ufayttiya* asata geettees. Intte Iyyooba genccaabaa siyideta, qassi Yihoowi gomppan keehi mishettiyogaanne* qarettiyogaa A anjjido anjjuwan beꞌideta.
12 Ubbaappe aaruwan, ta ishatoo, saluwan woy saꞌan woy hara ayba caaquwanne caaqqiyogaa aggite. Gidoppe attin, intte “Ee” giikko, giidobaa polite; shin “Chii” giikkokka, giidobaa polite; yaatikko, Xoossay intte bolli pirddenna.
13 Intte giddon waayettiya asi deꞌii? I woossiyogaa aggoppo. Ufayttiya asi deꞌii? I goynuwa yettaa yexxo. 14 Intte giddon sahettiya asi deꞌii? I galchchaa cimata baakko xeego; yaatin, eti Yihoowa sunttan A bolli zaytiya tiyidi ayyo woossona. 15 Hegaa bollikka, ammanuwa woosay harggidaagaa* pattana, Yihoowikka A denttana. Qassi I nagaraa oottidaba gidikko, Xoossay awu atto gaana.
16 Hegaa gishshawu, issoy issuwawu intte nagaraa paaxitenne issoy issuwawu woossite; yaatikko, intte paxana danddayeeta. Xillo asi wozanappe woossiyo woosay wolqqaamabaa oottees.* 17 Eelaasi nu mala* asa, shin I iray bukkennaadan mintti woossido wode, biittan heezzu layttanne usuppun agina gakkanaashin iri bukkibeenna. 18 Hegaappe simmin I haranttuwakka woossiis, qassi saluwappe iray bukkiisinne biittay kattaa ayfiis.
19 Ta ishatoo, issi asi intteppe oonanne tumaappe wora zaarin, haray I laamettanaadan oottikko, 20 nagaranchchaa wora biyosaappe zaariya ooninne hayquwappe A* ashshanaagaanne daro nagaraa kammanaagaa erite.