Ibraawe Asaassi
5 Ayssi giikko, asaa giddoppe gita kahine gididi doorettiya asi ubbi Xoossaayyo goynniyogaara gayttidabatun asaayyo oottanawu sunttettees; hegaappe denddidaagan, I imotaanne nagaraa yarshshuwa yarshshana danddayees. 2 Erenna gishshawu mooridaageetuyyo* I qarettana* danddayees; ayssi giikko, I mino gidennaagee akka qofissees;* 3 hegaa gishshawu, I asaa nagarawu yarshshuwa yarshshiyogaadan, ba nagarawukka yarshshana bessees.
4 Issi asi bawu koyidi gita kahine gidanawu danddayenna, shin Xoossay Aaroona sunttidoogaadan A sunttiyo wode xalaalan he maataa ekkees. 5 Hegaadankka, Kiristtoosi bawu gita kahine gididi bana xoqqissibeenna, shin, “Neeni ta naꞌaa; taani hachchi ne aawaa gidaas” yaagida Xoossay A xoqqu xoqqu oottiis. 6 Qassikka, I hara sohuwan, “Neeni merinawu Malkkixedeqa mala kahine” yaagees.
7 Kiristtoosi saꞌan deꞌiyo wode,* watiwatiiddi, ba qaalaa xoqqu oottidi yeekkiiddinne afuxxiiddi, hayquwappe bana ashshana danddayiya Xoossaa woossiis; I Xoossaayyo yayyiyo gishshawu, Xoossay A woosaa siyiis. 8 I naꞌa gidikkonne, waayettido waayiyappe azazettiyogaa tamaariis. 9 Qassi I wottiyobi baynnaagaa gidi simmin, ayyo azazettiyageeti ubbay an merinawu attana danddayoosona. 10 Ayssi giikko, Xoossay A Malkkixedeqa mala gita kahine oottidi sunttiis.
11 Nuuni abaa yootiyo darobay deꞌees, shin intte akeekanawu baaxetenna gishshawu hegaa intteyyo qonccissanawu metees. 12 Hannoode* intte asttamaare gidana koshshees, shin Xoossaa qaalaappe koyro tamaaridobata haranttuwa inttena tamaarissiya asi koshshees, qassi mino quma gidennan, maattay koshshiyo asa mala gidideta. 13 Ayssi giikko, maattaa uyiyogaa aggenna asi guutta naꞌa gidiyo gishshawu xillotettaa qaalaa erenna. 14 Shin mino qumay suurebaynne moorobay aybakko shaakkanawu qoppiyogaa meezetida,* gamma gakkida asaassa.