Pheexiroosi Xaafido Koyroogaa
4 Kiristtoosi ashuwan waayettido gishshawu, inttekka aagaadan qoppanawu* gixxi denddite; ayssi giikko, ashuwan waayettiya asi nagaraa aggiis; 2 yaatikko, I ashuwan deꞌana wodiyan Xoossay koyiyobaappe attin, asi amottiyobaa oottenna. 3 Intte yeelli baynnabaa haniyogan,* teqettenna amuwan, bessiyagaappe aattidi uyiyogan, dajje allattan, ushshaa gibraaninne iita eeqan saꞌaa asay koyiyogaadan kase oottido wodee gidana. 4 Intte etaagaadan dajjetiyabaa haniyogaa aggidoy aybissakko etawu kirqqi giis; hegaappe denddidaagan, inttena cayoosona. 5 Shin he asati paxa deꞌiyageetubaanne hayqqidaageetubaa pirddanawu giigi uttida daannaa sinttan eqqana. 6 Mishiraachchoy hayqqidaageetuyyokka awaajjettidoy hegaassa; hegaappe denddidaagan, asay ba qofaadan ashuwan eta yiggi xeellikkokka, Xoossaa xeelan eti ayyaanay kaalettin deꞌana danddayoosona.
7 Shin ubbabawu wurssettay matattiis. Hegaa gishshawu, suurebaa qoppite, qassi awudenne woossanawu giigi* uttite. 8 Ubbaappe aaruwan, siiqoy uulla* nagaraa kammiyo gishshawu, issoy issuwa mintti siiqite. 9 Zuuzummennan, issoy issuwa wozanappe mokki ekkite.* 10 Intte ubbay imotaa ekkideta; hegaa gishshawu, Xoossay dumma dumma ogiyan bessido laggetiyabi baynna A kehatettan goꞌettanaadan maaddiya oosanchchatudan he imotan issoy issuwawu haggaazite. 11 Ooninne yootikko, Xoossay kiittidobaa yootiyabadan hegaa ootto; ooninne haggaazikko, Xoossay immiyo wolqqan zemppiyabadan hegaa ootto; hegaappe denddidaagan, Xoossay Yesuus Kiristtoosan ubbaban bonchchettana danddayees. Bonchchoynne wolqqay ayyo meri merinawu gido. Aminꞌꞌi.
12 Siiqo ishatoo, inttena paacciya tama mala paaciya oorattabi haniyabadan xeellidi malaalettoppite. 13 Shin intte Kiristtoosa waayiya koxxidoogaa keenan ufayttiyogaa aggoppite; yaatikko, A bonchchoy qoncci beettiyo wode intte ufayttananne ililana danddayeeta. 14 Kiristtoosa sunttaa gaasuwan asay inttena borikko* intte ufaytteeta; ayssi giikko, bonchchuwa ayyaanay, ee, Xoossaa ayyaanay inttenan deꞌees.
15 Gidoppe attin, intteppe ooninne asa woriyagaa woy kayso woy iitabaa oottiyagaa woy hara asatu yohuwan geliyagaa gidiyogan waayettana koshshenna. 16 Gidikkokka, ooninne Kiristtaane gidiyo gishshawu waayettikko, yeellatana koshshenna; shin I he sunttan xeegettiiddi Xoossaa sabbiyogaa aggoppo. 17 Ayssi giikko, pirdday Xoossaa keettan doommana mala keerettida wodee hagaa. Pirdday koyro nunan doommiyaba gidikko, Xoossaa mishiraachchuwawu azazettennaageeti waananee? 18 Xillo asi keehi baaxetidi attiyaba gidikko, Xoossaayyo yayyenna asinne nagaranchchay waananee? 19 Hegaa gishshawu, Xoossaa sheniyadan deꞌiiddi waayettiyageeti loꞌꞌobaa oottiiddi, nuna medhdhida ammanettidaagawu simi banttana* sheedhdhona.*