Ximootiyosassi Xaafettida Koyroogaa
1 Nuna ashshiya Xoossaa aawatettaaninne an nuuyyo hidootay deꞌiyo Kiristtoos Yesuusaagan, Kiristtoos Yesuusi kiittido Phawuloosi, 2 ammanuwa ogiyan ta tumu naꞌawu Ximootiyosawu* hagaa kiittays:
Laggetiyabi baynna Xoossaa Aawaa kehatettay, maarotaynne sarotettay, qassi nu Godaa Kiristtoos Yesuusaagee neeyyo gido.
3 Taani Maqidooniya baana haniyo wode nena oychchidoogaadan, worddo timirtteta tamaarissennaadan neeni issota issota azazana mala Efisoonan takkanaadan haꞌꞌikka oychchays; 4 qassi worddo oduwanne mayzzaa qoruwa qocirenna mala azazanaadankka oychchays. Hegeeti aynne maaddokkona; hegeeti asay coo malanaadan oottoosonappe attin, ammanuwa minttiya, Xoossay immiyobaara aybiiranne gayttidaba gidokkona. 5 Taani hagaa azaziyo* gaasoy ubbaykka geeshsha wozanaaninne kahan, qassi cimoy baynna ammanuwan siiqanaadaana. 6 Issoti issoti hageetuppe wora simmidi, pattennabaa haasayoosona. 7 Eti higgiya asttamaare gidanawu koyoosona, shin eti yootiyobaa woy keehi midiididi tamaarissiyobaa akeekokkona.
8 Higgee loꞌꞌo gidiyogaa eroos, shin issi asi hegaa maara* kaallana bessees; 9 qassi higgee kiyidoy higgiya kanttiyanne makkalanchcha asatussa, Xoossaayyo azazettennanne nagaranchcha asatussa, ammanettennanne* geeshshabaa xaasayiya asatussa, qassi bantta aawata, bantta aayotanne harata woriya asatussappe attin, xillo asassa gidenna; 10 qassi pokkiya tuna nagaraa oottiya asatussa, attuma asaara zinꞌꞌiya attuma asatussa, gubaayiya* asatussa, worddotiya asatussa, caaqqidobaa koliya* asatussanne tumu* timirttiya phalqqiya hara ubbabaassa; 11 ufayttiya Xoossay taayyo immido A gita mishiraachchuwara he timirttee maayees.
12 Nu Goday Kiristtoos Yesuusi tana ammanettiya asadan xeellidi geeshsha oosuwa immido gishshawu, tawu wolqqaa immida A galatays; 13 shin kase taani Xoossaa toochchiya, A asaa naaqqiyanne kariya asa. Gidoppe attin, taani era xayadanne ammanennan hegaadan oottido gishshawu, I tana maariis. 14 Shin nu Goday laggetiyabi baynna kehatettaa tawu kehiis, qassi taani A kaalliyo gishshawu, Kiristtoos Yesuusi taayyo ammanuwanne siiquwa immiis. 15 Taani yootiyo ha yohoy tumanne wozanappe ammanana koshshiyaba: Kiristtoos Yesuusi nagaranchchata ashshanawu ha saꞌaa yiis. Taani eta ubbaappe iita nagaranchcha. 16 Gidoppe attin, Kiristtoos Yesuusi tanan ubbaappe iita nagaranchchan ba gita danddayaa bessanawu tana maariis; merinawu deꞌanawu aani ammananaageetuyyo tanan bessanawu I hegaa oottiis.
17 Beettennanne appe hara Xoossi baynna, merinaa Kawuwawu, merinawu deꞌiya Xoossawu meri merinawu bonchchoynne sabay gido. Aminꞌꞌi.
18 Ta naꞌawu Ximootiyosaa, Xoossay nebaa kase odissidobaara maayiya ha azazuwa* taani neeyyo immays; I odissidobay neeni loytta olettiyogaa aggennaadan maaddana; 19 yaataydda, ammanuwanne geeshsha kahaa naaga; issoti issoti sheneho giido gishshawu, markkabee meqqiyogaadan eta ammanoy xayiis. 20 Hemeneyosinne Iskkinddirikka he asatu mala; Xoossaa toochchenna mala seerin eti tamaaranaadan, taani eta Seexaanawu aattada immaas.