Ibraawe Asaassi
12 Simi nu yuushuwan wolqqaama shaaraa mala hegaa keena markkati deꞌiyo gishshawu, tooho ubbaanne nuna eesuwan shikkaabilliya nagaraa oli bayoos, qassi nu sinttan deꞌiya wottaa genccidi woxxoos; 2 nuna ammanuwawu kaalettiyanne nu ammanuwa poliya Yesuusa tishshi oottidi xeellana bessees. Ayssi giikko, I sinttappe keehi ufayttanaagaa eriyo gishshawu genccidi mittaa bolli hayqqiis, qassi yeellaa qexe gibeennanne Xoossaa araatawu ushachcha baggan uttiis. 3 Banttana qohiyaba gidikkonne, nagaranchchati keehi gaaddetidi darobaa haasayishin genccidaagaa loytti qoppite; yaatikko, intte daafurekketanne aggibayekketa.*
4 Intte he nagaraa eqettidi baaxetiyaba gidikkokka, intte suuttay gukkana gakkanaashin biron baaxetibeekketa. 5 Qassi naata zoriyogaadan hagaadan giidi zoridobaa intte muleera dogideta: “Ta naꞌawu, Yihoowa zoriya xaasaya xeelloppa, qassi I nena zuuqqiyo wode salettoppa; 6 ayssi giikko, Yihoowi siiqiyogeeta seerees, ubbakka, naꞌadan ekkiyogeeta ubbaa qayxaarees.”*
7 Intte seerettanawu* hegan gencceeta. Xoossay ba naata hegaadan oottees. Ayssi giikko, aawi seerenna naꞌi awun deꞌii? 8 Shin intte ubbay hegaadan seerettibeennaba gidikko, kareppe yelettidaageetappe attin, tumu naata gidekketa. 9 Hegaa bollikka, ashuwan nu aawati* darotoo nuna seeridosonanne nuuni eta bonchchida. Nu ayyaana deꞌuwa Aawaayyo hegaappe aarobay bessennee? Nuuni deꞌana mala ayyo azazettana koshshennee? 10 Ayssi giikko, eti banttawu loꞌꞌo milatidaagaadan nuna guutta wodiyawu seeridosona, shin I nuuni aagaadan geeshsha gidana mala, nuuni goꞌettanaadan seerees. 11 Nuuni seerettiyo wode azzanoosippe* attin, ufayttennaagee tuma, shin nuuni seeraa ekkikko, guyyeppe nuuyyo ayfiya immees; he ayfee sarotettaanne xillotettaa.
12 Hegaa gishshawu, goolattiya kushetanne shuggida gulbbatata minttite, 13 qassi intte tohuwawu ogiya sittayiyogaa aggoppite; yaatiyogee wobbe gediya patteesippe attin, kuriyappe kessi olenna. 14 Asa ubbaara sarotettan deꞌanawunne geeshsha deꞌo deꞌanawu mintti koyite; yaatana xayikko, ooninne Godaa beꞌenna. 15 Ooninne laggetiyabi baynna Xoossaa kehatettaa ekkennan attenna mala naagettite, qassi ooninne marzze xaphoy dicciyagaa mala gidennaadan naagettite, he asi waysseesinne darota moorees; 16 qassi intte giddon pokkiya tuna nagaraa* oottiya asi woy issitoo miyo qumawu giidi ba bayratettaa anjjuwa aggi bayida Eesawadan geeshshabaa nashshenna asi deꞌenna mala naagettite. 17 Hegaappe guyyiyan, I anjjuwa ekkanawu koyikkonne, phenqqeshettidoogaa* ereeta; I yeekkiiddi qofaa* laamissanawu wozanappe malikkonne, hegee danddayettibeenna.*
18 Ayssi giikko, intte tamay oyqqin lacottiya, beꞌananne bochchana danddayiyobaakko shiiqibeekketa, qassi dulkkida shaaraa, sakkana xumaanne wolqqaama carkkuwa beꞌibeekketa. 19 qassi malkkataa gunttaanne asay siyidi harabaa gujjidi yootenna mala woossido, saluwappe haasayiyo cenggurssaa siyibeekketa. 20 Ayssi giikko, “Haray atto meheekka deriya bochchikko, shuchchan caddidi worana bessees” yaagidi azazidobaa eti yayyidosona. 21 Qassi beettiyabay keehi yashshiyo gishshawu, Muusee, “Tana yashsheesinne kokkorssees” yaagiis. 22 Gidoppe attin, intte Xiyone deriyanne merinawu deꞌiya Xoossaa katamaa, saluwa Yerusalaame, qassi yaaꞌan deꞌiya cora* kiitanchchatukko yiideta, 23 eta sunttay saluwan xaafettido bayratu galchchaa, qassi ubbaa Daannaakko, Xoossaakkonne I wottiyobi baynnaageeta oottido xillotu ayyaana deꞌuwawu yiideta, 24 ooratta maachchaa maacissiya Yesuusakko, qassi caccafettida suuttaakko yiideta, he suuttay Aabeela suuttaappe loꞌꞌo ogiyan haasayees.
25 Haasayiyagee yootiyobaa ezggennan ixxenna* mala naagettite; ayssi giikko, saꞌan deꞌiyageeti naagettanaadan Xoossay odidobaa ezggennan ixxida asati kessi ekkibeennaba gidikko, saluwappe yootiyagee haasayiyobaa nuuni ezggennan ixxikko, hegaappe aaruwan kessi ekkokko! 26 He wode I haasayin saꞌay gajigajiis, shin haꞌꞌi I, “Taani biron issitoo saꞌaa xalaala gidennan, saluwakka gajigajissana” yaagiis. 27 “Biron issitoo” geetettidaagee oonakko oottido gajigajiyabata Xoossay xayssanaagaa bessees; yaatin, gajigajissibeennabati deꞌana. 28 Hegaappe denddidaagan, nuuni gajigajana danddayenna Kawotettaa ekkanaagaa eriyo gishshawu, Xoossaayyo yayyiiddinne ayyo hoola giiddi, A ufayssiya geeshsha haggaazaa haggaazana danddayiyo, laggetiyabi baynna A kehatettan simi ubbatoo goꞌettoos. 29 Nu Xoossay xayssiya tama.