Yohaannisi Xaafido Koyroogaa
3 Aaway nuna ay mala siiquwa siiqidaakko qoppite; nuuni Xoossaa naata geetettida! Qassi nuuni tumukka A naata. Shin ha saꞌaa asay A eribeenna gishshawu, nuna erenna. 2 Taani siiqiyogeetoo, nuuni haꞌꞌi Xoossaa naata, shin nuuni ay mala gidanaakko biron qonccibeenna. Nuuni A beꞌanaagee attenna gishshawu, I qoncci beettiyo wode nuuni A mala gidanaagaa eroos. 3 Qassi I geeshsha gidiyogaadan, ha hidootay an deꞌiyo ubbay bana geeshshees.
4 Nagaraa oottiya ubbay higgiya kanttees, qassi nagaray higgiya kanttiyogaa. 5 I nu nagaraa xayssanawu qoncci beettidoogaakka ereeta, qassi I mule nagara oottenna. 6 Aara issuwa gididi deꞌiya ubbay nagaraa oottenna; nagaraa oottiya ooninne A beꞌibeenna woy A eribeenna. 7 Naatoo, inttena ooninne balettoppo; I xillo gidiyogaadan, xillobaa oottiya asi xillo. 8 Nagaraa oottiya asi Dabloosa qullees; ayssi giikko, Dabloosi doomettaappekka* nagaraa oottiiddi deꞌees. Xoossaa Naꞌay Dabloosa oosuwa gaacci xayssanawu qoncci beettidoy hegaassa.
9 Xoossaa zerettay* izaawun deꞌiyo gishshawu, A naꞌi ubbi nagaraa oottenna, qassi I Xoossaa naꞌa gidiyo gishshawu, nagaraa oottana danddayenna. 10 Xoossaa naatinne Dabloosa naati erettiyoy hagaana: Xillobaa oottenna ooninne woy ba ishaa siiqenna asi Xoossaa kaallenna. 11 Intte doomettaappe siyido azazoy hagaa: nuuni issoy issuwa siiqana koshshees; 12 nuuni Qaaꞌeela mala gidana koshshenna; I Dabloosa qulliisinne ba ishaa woriis. I ayssi A woridee? I iitabaa oottikkonne A ishay suurebaa oottido gishshawu woriis.
13 Ta ishatoo, saꞌaa asay inttena ixxiyogan garamettoppite. 14 Nuuni ishata siiqiyo gishshawu, hayquwappe deꞌuwawu pinnidoogaa eroos. Siiqenna asi hayqqi uttiis. 15 Ba ishaa ixxiya ubbi shemppo woriya asa, qassi shemppo woriya asi merinawu deꞌennaagaa ereeta. 16 Yesuus Kiristtoosi ba shemppuwa* nu gishshataassi aatti immido gishshawu, nuuni siiquwa hegan erida, qassi nuuni nu ishatu gishshawu nu shemppuwa* aatti immana bessees. 17 Shin aquwawu peeshshawu gidiyabay deꞌiyo ooninne ba ishay metootiyogaa beꞌiiddi ayyo qarettennan ixxikko, Xoossaa siiqoy ayba ogiyan an deꞌii? 18 Naatoo, haasayiyoban woy inxxarssan gidennan, nuuni oosuwaninne tuman siiqettana koshshees.
19 Nuuni tumaaba gidiyogaa hegan eroos, qassi hegee nuuni A sinttan ammanettanaadan oottees; 20 qassi nu wozanay nu bolli pirddiyakkokka, Xoossay nu wozanaappe aadhdheesinne ubbabaa erees. 21 Taani siiqiyogeetoo, nu wozanay nu bolli pirddana xayikko, nuuni yayyennan Xoossaa woossana danddayoos. 22 Nuuni A azazota naagiyo gishshawunne A ufayssiyabaa oottiyo gishshawu, nuuni oychchiyobaa aybanne I nuuyyo immana. 23 I azazidobay hagaa: I nuna azazidoogaadan, nuuni A Naꞌaa Yesuus Kiristtoosa sunttan ammanananne issoy issuwa siiqana koshshees. 24 Hegaa bollikka, A azazuwa naagiya asi aara issuwa gididi deꞌeesinne ikka izaawura issuwa gididi deꞌees. Qassi I nunaara issuwa gididi deꞌiyogaa, I nuuyyo immido ayyaanan eroos.