“Haiqqida Asai Waanidi Denddanee?”

1-2. Ubba Kiristtaaneti saluwan deꞌanawu denddiyoogaabaa erana koshshiyoy aybissee?

HA WODIYAN Yihoowawu haggaaziya daro asay saꞌan merinawu deꞌanawu hidootees. SHin Yihooway tiyido amarida Kiristtaaneti saluwan deꞌanawu hidootoosona. He tiyettidaageeti sinttappe bantta deꞌoy ay mala gidanaakko eranawu keehi koyoosona; saꞌan deꞌanawu hidootiyaageeti hegaa eranawu koyana bessiyoy aybissee? Nuuni beꞌanaagaadan, saluwan deꞌanawu denddiyo denddoy saꞌan merinawu deꞌanawu hidootiyaageetikka anjjuwaa demmanaadan maaddana. Yaatiyo gishshawu, nu hidootay saluwaana gidin saꞌaana gidin, saluwan deꞌanawu denddiyo dendduwaabaa nuuni erana koshshees.

² Koyro xeetu layttan deꞌida Yesuusi erissiyo ashkkaratuppe amaridaageeti saluwan deꞌanawu denddiyo hidootaabaa xaafanaadan Xoossay denttettiis. Kiitettida Yohaannisi hagaadan giis: “Ha77i nuuni Xoossaa naata; nuuni ai hananaakko biron erettibeenna; shin Kiristtoosi qoncciyo wode, nuuni a milatanaagaa eroos.” (1 Yoh. 3:2) Hegaa gishshawu, tiyettida Kiristtaaneti hayquwaappe denddidi saluwaa biyo wode yan deꞌoy ay mala gidanaakko erokkona. Gidoppe attin, eti bantta woytuwaa ekkiyo wode Yihoowa beꞌana. Saluwan deꞌanawu denddiyo dendduwaabaa Geeshsha Maxaafay ubbabaa yootana xayikkonne, kiitettida PHawuloosi hegaabaa amaridabaa yootiis. Kiristtoosi ‘halaqatetta ubbaa, godatetta ubbaanne wolqqa ubbaa’ xayssiyo wode tiyettidaageeti aara gidana. Eti wurssetta ‘morkkiyaa hayquwaakka’ xayssana. Wurssettan, Yesuusinne aara haaranaageeti Yihoowawu haarettana. (1 Qor. 15:24-28) Hegee keehi ufayssiya wode gidana!b

3. Koyro Qoronttoosa 15:30-32y yootiyoogaadan, PHawuloosi dendduwan ammaniyoogee I ay oottanaadan maaddidee?

³ PHawuloosi dendduwan ammaniyoogee dumma dumma paaceta genccanaadan A maaddiis. (Koyro Qoronttoosa 15:30-32 nabbaba.) I Qoronttoosan deꞌiyaageetussi taani “wonttin wonttin haiqqais” giidi yootiis. Gujjidikka I, ‘Taani Efisoonan doꞌaara baaxetaas’ yaagiis. I Efisoonan deꞌiya isttaadeemiyan tumu doꞌaara baaxettidoogaabaa yootennan aggenna. (2 Qor. 1:8; 4:10; 11:23) Woy I doꞌaa mala gidida Ayhudatinne hara asati bana eqettidoogaa odennan aggenna. (Oos. 19:26-34; 1 Qor. 16:9) PHawuloosa wolqqaama metoy gakkiis. Gidikkonne I sinttappe ufayssiyaaba demmanaagaa ammaniyoogaa aggibeenna.—2 Qor. 4:16-18.

4. Dendduwaa hidootay ha wodiyan deꞌiya Kiristtaaneta waati minttettidee? (Koyro sinttan deꞌiya misiliyaa xeella.)

⁴ Nuuni keehi iita wodiyan deꞌoos. Nu ishanttuppe amaridaageeti danobay gakkin qohettidosona. Harati olay deꞌiyo heeran deꞌiyo gishshawu hirggoosona. Issi issi biittatun Yihoowa asay laꞌatettan sabbakenna, qassi eti hegaa gaasuwan qashettana woy hayqqana danddayikkonne aggennan awu haggaazoosona. SHin he ubba ishanttinne michchontti aggennan Yihoowawu goynniyoogan nuussi loꞌꞌo leemiso. Eti ha wodiyan hayqqiyaaba gidikkonne, Yihooway sinttappe etawu keehi loꞌꞌobaa immanawu qaalaa gelidoogaa eriyo gishshawu aybanne yayyokkona.

5. Dendduwan nu ammaniyoogaa shugissana danddayiya iita qofay aybee?

⁵ “Hayqqidaageeti hayquwaappe denddennabaa gidikko, ‘simmi moosinne uyoos; ayssi giikko, nuuni wontto hayqqana’” giidi amaridaageeti qoppiyo iita qofaappe ba ishantti naagettanaadan PHawuloosi yootiis. Hegaadan qoppiya amarida asay PHawuloosa wodeppe kasekka deꞌees. Israaꞌeelatu eeshshaa qonccissiya Isiyaasa 22:13n deꞌiya qofaappe I hegaa yootennan waayi aggana. Eti Xoossaa mintti siiqanawu baaxetiyoogaa aggidi banttana ufayssiyaaba xallaa koyidosona. Awudenne hayqqiyoogee attenna gishshawu, hachchi ufayttana koshshees giidi Israaꞌeelati qoppiyo qofay ha wodiyankka meeze gididaba. SHin he iita qofaa gaasuwan Israaꞌeela deriyaa bolli iitabay gakkidoogaa Geeshsha Maxaafay yootees.—2 Odi. 36:15-20.

6. Hayqqidaageeti denddanaagaa ammaniyoogee, laggiyaa dooriyo wode nuna waati maaddana koshshii?

⁶ Yihooway hayqqidaageeta denttanaagaa nuuni eriyoogee, nuuni laggiyaa dooriyo wode nuna maaddana koshshees. Qoronttoosan deꞌiya ishantti dendduwan ammanennaageetuura laggetennaadan naagettana koshshiis. Hegaappe nuuni tamaariyoobay deꞌees: Nuuni sinttappe aybi hananaakko qoppennanne banttana ufayssiyaaba xallaa qoppiya laggetuura daro wodiyaa aattiyaaba gidikko, eti nuna qohana. Issi Kiristtaane hegaa mala uraara daro wodiyaa aattikko, A loꞌꞌo qofaynne eeshshay moorettana danddayees. He asati Xoossay ixxiyoobata oottanaadan A denttettanakka danddayoosona. Hegaa gishshawu PHawuloosi, “Xillotettaakko simmite. Nagara oottoppite” giidi minttidi zoriis.—1 Qor. 15:33, 34.

AY MALA BOLLA GIDANEE?

7. Koyro Qoronttoosa 15:35-38y yootiyoogaadan, dendduwaa xeelliyaagan amaridaageeti woygi oychchidonaa?

⁷ Koyro Qoronttoosa 15:35-38 nabbaba. Harati dendduwaabaa siranaadan oottanawu koyiya amaridaageeti, “Haiqqida asai waanidi denddanee?” giidi oychchidosona. Ha wodiyan deꞌiya daroti asay hayqqi simmin waaniyaakko dumma dummabaa qoppiyo gishshawu, PHawuloosi yootido zaaruwaabaa qoppiyoogee nuna maaddees. SHin Geeshsha Maxaafay ay tamaarissii?

8. Saluwan deꞌanawu denddiyoogaabaa akeekanaadan nuna maaddana danddayiya leemisoy awugee?

⁸ Issi uri hayqqiyo wode, A bollay musees. SHin saluwaanne saꞌaa medhdhidaagee he ura hayquwaappe denttidi awu koshshiya bollaa immana danddayees. (Doo. 1:1; 2:7) Xoossay kaseegaa mala bollaara denttana koshshennaagaa PHawuloosi issi leemisuwan qonccissiis. Zeriyo kattaa ayfiyaa qoppa. He kattaa ayfee biittan zerettiyo wode mokkidi ooratta katta gidees. He mokkida kattay zerettida qeeri ayfiyaappe keehi dummatees. PHawuloosi nuna Medhdhidaagee ‘ba dosido bollaa immana’ danddayiyoogaa ha leemisuwan qonccissiis.

9. Dumma dumma bollaa qommuwaa xeelliyaagan 1 Qoronttoosa 15:39-41 yootiyoobay aybee?

⁹ Koyro Qoronttoosa 15:39-41 nabbaba. Xoossay ubba bollaa issi mala oottidi medhdhibeennaagaa PHawuloosi qonccissiis. Leemisuwawu, miizzatu, kafotunne moletu ubbaa bollay dumma dumma. Awa ayfiyaanne aginaa giddon dummatettay deꞌiyoogaa nuuni akeekiyoogaa PHawuloosi yootiis. Qassi I “issi xoolinttee hinkko xoolinttiyaappe bonchchuwan” dummatiyoogaa yootiis. Nuuni he dummatettaa nu ayfiyan beꞌana xayikkonne hegee tuma. Saynttistteti dumma dumma xoolinttetu qommoy deꞌiyoogaa yootoosona; amaridaageeti gita, amaridaageeti guutta, amaridaageeti zoꞌꞌo, amaridaageeti bootta, qassi amaridaageeti awa ayfiyaadan adilꞌꞌe ciishsha milatoosona. PHawuloosi “saluwaa bollatinne sa7aa bollati” deꞌiyoogaakka yootiis. I woyganawu koyidee? Saꞌan nuussi ashuwaa bollay deꞌees; shin saluwan kiitanchchatuyyo deꞌiyaagaa mala ayyaana bollay deꞌees.

10. Saluwan deꞌanawu denddanaageeti ay mala bollaara denddanee?

¹⁰ PHawuloosi kaallidi giidobaa akeekite: “Haiqqidaageeti haiquwaappe denddiyo wode hegaadan hanana; haiqqiya bollai moogettidi, haiqqenna bolla gididi denddana.” Issi uri hayqqiyo wode, A bollay musiyoogaanne zaarettidi biitta gidanaagaa nuuni eroos. (Doo. 3:19) Yaatin, hegee waani “haiqqenna bolla gididi denddana” danddayii? PHawuloosi yootidoy Eelaasi, Elssaꞌinne Yesuusi saꞌan deꞌanawu denttido asaabaa gidenna. PHawuloosi saluwan deꞌanawu ‘ayyaana bollaara’ denddiya uraabaa yootiis.—1 Qor. 15:42-44.

11-12. Yesuusi hayquwaappe denddiyo wode laamettidabay aybee, qassi tiyettidaageeti aagaadan waani hananee?

¹¹ Yesuusi saꞌan deꞌiyo wode, ayyo ashuwaa bollay deꞌees. SHin I hayquwaappe denddido wode ‘deꞌuwaa immiya ayyaana gididi’ saluwaa simmiis. Hegaadankka, tiyettida Kiristtaaneti ayyaana mereta gididi denddana. PHawuloosi hagaadan giis: “Nuuni biittaappe merettidaagaa meraa maayidoogaadan, saluwaappe yiidaagaa meraakka qassi maayana.”—1 Qor. 15:45-49.

¹² Yesuusi asaagaa mala bollaara denddibeennaagaa hassayiyoogee keehi koshshiyaaba. PHawuloosi dendduwaa xeelliyaagan qonccissidobaa wurssana haniyo wode, “ashoinne suutti [saluwan] Xoossaa kawotettaa laattana danddayenna” giiyoogan hegee aybissakko qonccissiis. (1 Qor. 15:50) Kiitettidaageetinne tiyettida harati musana danddayiya ashoynne suuttay deꞌiyo bollaara saluwaa bookkona. Eti denddanay awudee? PHawuloosi eti hayqqosaara gidennan sinttappe denddanaagaa yootiis. PHawuloosi 1 Qoronttoosa xaafiyo wode, amarida erissiyo ashkkarati “haiqqidosona”; leemisuwawu kiitettida Yaaqoobi hegeetuppe issuwaa. (Oos. 12:1, 2) Kiitettida haratinne ayyaanan tiyettidaageeti hegaappe simmin “haiqqidosona.”—1 Qor. 15:6.

HAYQUWAA XOONIYOOGAA

13. Yesuusi ‘qoncciyo’ wode aybi hananee?

¹³ Yesuusikka PHawuloosikka keehi koshshiya wodee yaanaagaa kasetidi yootidosona. He wodee Kiristtoosi qoncciyo wodiyaa. Kiristtoosi qoncciyo wodiyan, kumetta alamiyan olaynne harggee denddana, biittay qaaxxana, qassi hara iitabati hanana. Geeshsha Maxaafay yootiyo ha hiraagay 1914⁠ppe doommidi polettiiddi deꞌiyoogaa nuuni beꞌoos. He malaataappe keehi koshshiya issibaykka hanana. Xoossaa Kawotettay haariiddi deꞌiyoogaa yootiya mishiraachchoy ‘saꞌa ubban odettanaagaanne hegaappe guyyiyan, wurssettay gakkanaagaa’ Yesuusi yootiis. (Maa. 24:3, 7-14) ‘Hayqqida’ tiyettidaageeti ‘Goday qoncciyo gallassi’ denddidi saluwan deꞌanawu baanaagaa PHawuloosi yootiis.—1 Tas. 4:14-16; 1 Qor. 15:23.

14. Kiristtoosi qoncciyo wodiyan hayqqiya tiyettida Kiristtaaneti waananee?

¹⁴ Ha wodiyan hayqqiya tiyettida Kiristtaaneti saluwan deꞌanawu liphida ayfee xeellanaashin baana. PHawuloosi 1 Qoronttoosa 15:51, 52n hagaadan giis: “Nuuni ubbai haiqqokko. SHin wurssetta malkkatai punettiyo wode, liphida aifee xeellanaassi hassayennan laamettana.” PHawuloosi yootido he qofay polettiiddi deꞌees! Ha Kiristtoosa ishantti denddi simmidi, ‘Godaara issippe ubba wode deꞌiyoogan’ keehi ufayttana.—1 Tas. 4:17.

15. ‘Liphida ayfee xeellanaashin’ laamettanaageeta naagiya oosoy aybee?

¹⁵ ‘Liphida ayfee xeellanaashin’ laamettiyaageeti saluwan oottanabaa Geeshsha Maxaafay yootees. Yesuusi etawu hagaadan giis: “Xoonidaagaayyoonne wurssettai gakkanaassi ta oosuwaa naagidaagaayyo, asa zare ubbaa haarana mala, taani ta Aawaappe ekkido maataa malaa ayyo immana; i eta birata dullan haarananne urqqa miishsha menttiyoogaadan menttana.”(Ajj. 2:26, 27) Eti Yesuusa kaallidi birata dullan saꞌaa asaa haarana.—Ajj. 19:11-15.

16. Daro asay hayquwaa waati xoonanee?

¹⁶ Tiyettidaageeti hayquwaa xoonanaagee qoncce. (1 Qor. 15:54-57) Eti denddiyoogee Armmageedoona olaa wode iitatetta ubbaa xayssiyoogan hashetanaadan oottana. “Daro waayiyaa waayidi [yiida]” miilooniyan qoodettiya hara Kiristtaaneti xayuwaappe attidi ooratta alamiyaa gelana. (Ajj. 7:14) Beni hayqqida biilooniyan qoodettiya asay denddiyo wode, paxa kanttidaageeti hayqoy xoonettiyo hara xoonuwaa beꞌana. He maalaalissiyaabay haniyo wode, nuuni ay keena ufayttanaakko qoppa! (Oos. 24:15) Qassi Yihoowawu kumetta wozanan ammanettidi deꞌida ubbay Addaameppe laattido hayquwaa xoonana. Eti merinawu deꞌana.

17. Koyro Qoronttoosa 15:58y nu ha wodiyan ay oottanaadan minttettii?

¹⁷ PHawuloosi dendduwaa xeelliyaagan Qoronttoosan deꞌiyaageetuyyo xaafido minttettiya qofaa gishshawu ha wodiyan deꞌiya Kiristtaaneti ubbay galatana koshshees. “Godaa oosuwaa” oottanaadan PHawuloosi zoridobaa azazettanawu ha wodiyan nuussi danddayettida ubbabaa oottiyo loꞌꞌo gaasoy deꞌees. (Koyro Qoronttoosa 15:58 nabbaba.) Nuuni nuuyyo danddayettida ubban he oosuwaa oottikko, sinttappe demmana keehi ufayssiya deꞌuwaa yeemuwan naagana danddayoos. He wodee nuuni qoppana danddayiyo aybippenne aadhdhiya ufayssiyaagaa gidana. Hegee Godaara gayttidaagan nu oottido oosoy hada gidennaagaa nuussi qonccissana.