Kandduwaabaa Timirttiyaa

Timirtte keettay darajjayissin issi heeraa beꞌanawu biishin, bantta mala attuma tamaaretuura wolqqan mattumaa gayttanawu malidosona giidi amarida yelaga attumaageeta mootidosona. Eti ubbay Kanaada biittan issi keehi erettida buzo timirtte keettan tamaariyaageeta. He hanotaappe simmin, Liꞌonard Isterni Ottawa Sitizin giyo gaazeexan hagaadan xaafiis: “Gooba asa gidiyoogee, loꞌꞌo timirttiyaa tamaariyoogeenne dure gidiyoogee yelagati iitabaa oottennaadan teqqenna.”

Isterni hagaadankka giis: “Yelidaageeti bantta naata tamaarissanawu keehi koshshiyaabay suure gididabaanne suure gidennabaa gaada neeni qoppiyoogee bessiyaaba. SHin, yelida daroti bantta naati daro miishshaa demmana mala timirttiyan gooba gidiyoogaanne loꞌꞌo ooso demmiyoogaa keehi koshshiyaaba giidi qoppiyaaba milatees.”

Timirttee keehi koshshiyaaba gidiyoogee tuma. Gidoppe attin, keehi loꞌꞌo giyo timirtteekka issi uri iitabaa amottennaadan diggenna. Yaatikko, nuuni kandduwaaban kaaletuwaa demmanaadan maaddiya timirttiyaa awuppe demmana danddayiyoo?

KANDDUWAABAANINNE AYYAANAABAN KAALETO GIDIYA TIMIRTTIYAA

Geeshsha Maxaafay herega mala. Nuuni Geeshsha Maxaafaa xannaꞌikko, nuussi danddayettennabaanne nuuni shugo gididobaa loytti akeekoos. (Yaaqooba 1:23-25) SHin Geeshsha Maxaafay nuuni harabaakka akeekanaadan oottees. I nuuni koshshiyaaban laamettanaadan, tumu sarotettawunne issippetettawu koshshiya eeshshati deꞌiyoogeeta gidanaadan nuna maaddees. Loꞌꞌotettay, kehatettay, danddayay, bana naagiyoogeenne siiqoy he eeshshatuppe amaridaageeta. Qassi siiqoy ‘ubbabaa issippe shiishshi qachchiyaagaa’ geetettiis. (Qolasiyaasa 3:14) Siiqoy keehi dumma gidiyoy aybissee? Ha eeshshaabaa Geeshsha Maxaafay yootiyoobaa akeeka.

• “Siiqoi danddayanchcha. Siiqoi kehees. Siiqoi qanaatenna. Ceeqettenna; qassi otorettenna. Siiqoi baassi bessennabaanne oottenna. Uuzettenna. Yiillotenna. Siiqoi naaqettidobaakka paidenna. Siiqoi tumatettan ufaittiyoogaappe attin, wordduwan ufaittenna. Siiqoi ubbabaa danddayees. . . . Ubbabaa genccees. Siiqoi mulekka xayenna.”—1 Qoronttoosa 13:4-8.

• “Ba shooruwaa siiqiya ooninne ayyo iitabaa oottenna.”—Roome 13:10.

• “Siiqoi daro nagaraa kammiyo gishshau, ubbabaappe aattidi issoi issuwaara wozanappe siiqettite.”—1 PHeexiroosa 4:8.

Nena siiqiya asaara neeni deꞌiyo wode, neessi aybi siyettii? Neeni woppu giyoogeenne hirggennaagee qoncce. Ee, eti neessi loꞌꞌobaa amottiyoogaa eraasa, eti eriiddi nena mule qohokkona.

Siiqoy haratu goꞌꞌaa gishshawu asay ba goꞌꞌaa aggibayanaadan, haray attoshin ba deꞌuwaa hanotaa laammanaadan denttettana danddayees. Leemisuwawu, Jorj giyo bitaniyaa naꞌiyaa yelido wode, I ba naꞌee naꞌaara wodiyaa aattanawu keehi koyiis. SHin metoy deꞌees. I sijaaraa keehi uyiyo gishshawu, A naꞌee azinay I guutta naꞌaa mati shiiqanaadan koyibeenna. Jorji waatidee? I 50 gidiya layttawu sijaaraa uyikkonne, ba naꞌee naꞌaa gishshawu he amaliyaa aggiis. Ee, siiquwawu gita wolqqay deꞌees!

Siiqoy nuuni tamaariyo eeshsha. Bantta naati harata waati siiqanaakko tamaarissiyo gita aawatettay yelidaageetussi deꞌees. Eti bantta naata mizoosonanne naagoosona; qassi qohettiyo woy sahettiyo wode eta maaddoosona. Loꞌꞌo aawati woy aayoti bantta naatuura haasayoosonanne eta tamaarissoosona. Qassi eti bantta naata seeroosona; likkebaanne likke gidennabaa xeelliyaagan loꞌꞌo maarata tamaarissiyoogee yaatiyo issi oge. Hegaa bollikka, loꞌꞌo aawati woy aayoti bantta naatussi loꞌꞌoban leemiso gidoosona.

SHin issi issi aawatinne aayoti banttappe koyettiyaabaa maara oottennaagee azzanttiyaaba. Hegaa giyoogee eta naati mule loꞌꞌo asa gidokkona giyoogee? CHii! Iita keettan diccida issota issota gujjin, gastta asati darotikka gidin, qoppiyaanne ammanettiya asa gidiyoogan maalaalissiya hanotan bantta deꞌuwan laamettidosona. Mule laamettokkona giidi harati qoppiyoogeeta gujjin, amaridaageetubaa nuuni kaalliya huuphe yohuwan beꞌana!